Read Caribbean Javanese Andarané Torèt 18 Bible Online

Andarané Torèt 18 - Caribbean Javanese bible

Andarané Torèt 18

¹“Awit para imam wong Lévi lan sakkèhé taleré Lévi kabèh aja pada mèlu nduwèni lemah panduman bebarengan karo wong Israèl; sing dadi pandumané ya kuwi kurban bakaran sing dipasrahké marang GUSTI lan apa sing disutyèkké kanggo Panjenengané.

²Aja nduwèni lemah panduman ing antarané para seduluré; GUSTI déwé sing dadi duwèké, kaya sing wis dijanjèkké.

³Iki sing dadi duwèké para imam kanggo rayat ya kuwi enggoné nampani sangka para umat sing pada masrahaké kurban sing dibelèh, dadia sapi utawa wedus, kuwi mengkéné: imam kuwi kèkana sampilé ngarep siji, rahangé loro uga babaté.

⁴Wiwitané panènanmu gandum lan anggur lan lenga uga wiwitané guntingané wuluné wedusmu kuwi ya pasrahna.

⁵Awit GUSTI, Gusti Allahmu, wis milih wong kuwi sangka antarané sakkèhé talermu, supaya tansah ngladèni GUSTI lan nganakké pangabekti, ya dèwèké lan para anaké sak lawas-lawasé.

⁶Yèn ana wong Lévi teka sangka salah sakwijiné kuta sing mlebu panggonané Israèl, ya manggon dadi wong neneka, lan karo karepé déwé nekani panggonan sing bakal dipilih karo GUSTI,

⁷lan terus nganakké pangabekti atas asmané GUSTI, Gusti Allahé, pada kaya seduluré wong Lévi sing pada ngladèni GUSTI ing kono,

⁸kuwi kebutuhané digawé pada, kuwi ora diitung karo payuné enggoné ngedol barang warisané sangka leluhuré.”

⁹“Yèn kowé wis mlebu ing negara sing dikèkké karo GUSTI, Gusti Allahmu, marang kowé, kowé aja terus sinau nglakoni rereget sing ditindakké karo bangsa-bangsa ing kono.

¹⁰Ing tengah-tengahmu aja ana sing ngurbanké anaké lanang utawa wadon karo diobong, utawa dadi tukang santèt, tukang mbedèk, tukang pétungan, tukang sihir,

¹¹sing nandangi jopa-japu, sing njaluk ngerti marang roh pepeteng utawa marang rohé tukang mbedèk, lan sing njaluk tulung marang wong mati.

¹²Awit sapa sing nglakoni penggawé sing kaya mengkono kuwi reget ing ngarepé GUSTI, lan ya awit sangka regeté kuwi para bangsa mau pada ditundung metu sangka ngarepmu karo GUSTI, Gusti Allahmu.

¹³Uripmu kudu tanpa tyiri ing ngarepé GUSTI, Gusti Allahmu.

¹⁴Awit para bangsa sing negarané arep kok enggoni kuwi pada njaluk tulung marang tukang santèt lan tukang mbedèk, nanging kowé kuwi ora dililani karo GUSTI, Gusti Allahmu, kowé nindakké sing kaya mengkono mau.

¹⁵Ana nabi sing sangka tengahmu, sangka antarané para sedulurmu kaya aku iki, bakal didekké karo GUSTI, Gusti Allahmu, kanggo kowé, ya kuwi sing kudu kok rungokké.

¹⁶Tyotyok karo apa sing kok jaluk marang GUSTI, Gusti Allahmu, ing mbiyèn ing gunung Horeb, waktu kumpulan pangabekti, tembungmu: Aja nganti kula krungu pitutur-pituturé GUSTI, Gusti Allah, kula aja menèh, weruh geni gedé kuwi, supaya kula aja nganti nemoni pati.

¹⁷GUSTI terus ngomong marang aku: Apa sing diutyapké kuwi apik.

¹⁸Nabi sing kanggo dèkné kuwi sangka seduluré kaya kowé, kuwi bakal Tak angkat kanggo wong-wong kuwi, lan tembung-Ku bakal Tak dèkèk ing tutuké, lan apa sing Tak préntahaké kuwi bakal diomongké marang wong-wong mau.

¹⁹Sapa wong sing ora ngrungokké tembung-Ku sing bakal diomongké karo nabi kuwi kanggo asma-Ku, kuwi mesti Tak jaluki tanggung jawapé.

²⁰Nanging nabi sing kewanenen ngutyapké ngomong atas asma-Ku, nanging duduk Aku sing mréntah ngutyapké, utawa sing nduwé ngomong atas jenengé allah liyané, nabi kaya mengkono kuwi kudu diukuma pati.

²¹Yèn kowé nduwé pikiran ing sak njeruhné atimu: Kepriyé bisané ngerti marang pitutur sing duduk tembungé GUSTI.

²²Kuwi mengkéné: Endi sing diutyapké karo nabi atas asmané GUSTI, nanging tembungé kuwi ora kelakon lan ora bener, kuwi pitutur sing duduk tembungé GUSTI; nabi mau kewanènen enggoné ngutyapaké, aja wedi karo wong sing kaya mengkono kuwi.”