Read Caribbean Javanese Andarané Torèt 25 Bible Online

Andarané Torèt 25 - Caribbean Javanese bible

Andarané Torèt 25

¹“Yèn ana wong perkaran sak untara sing pada ngadep marang pengadilan njaluk adil, sing bener ya dibenerna lan sing salah diukuma.

²Nanging yèn sing salah kuwi apik diukum gebuk, rèkter terus kongkona wong mau mengkurep, terus ngongkona nggebuki ing ngarepé, tyatyahé gebukané gumantung gedé tyiliké kesalahané.

³Gebukané aja luwih sangka kaping patang puluh; supaya sedulurmu kuwi aja nganti asor ing ngarepmu, yèn gebukané luwih sangka semono okèhé.

⁴Kowé aja mbrangus tyangkemé sapi sing ijik dienggo nggiling.”

⁵“Yèn ana sedulur lanang pada manggon dadi siji, nanging sing siji mati ora ninggal anak lanang, ing kono randané sing mati mau aja omah-omah karo wong liyané sing duduk brayaté, nanging seduluré sing lanang kuwi sing wajip ngepèk bojo, lan karo mengkono dadi nindakké kuwajipan perkawinan ipé.

⁶Terus anak lanang mbarep sing lair kuwi dianggep anaké seduluré sing wis mati, supaya jenengé aja nganti entèk sangka antarané wong Israèl,

⁷nanging yèn wong kuwi ora seneng ngepèk ipéné mau, ipéné terus ngadep menyang para tuwa-tuwa ing gapura lan ngomonga: Ipé kula ora gelem nguripké jenengé seduluré ing Israèl, ora gelem netepi kuwajipan perkawinan ipé marang kula.

⁸Ing kono para tuwa-tuwané kuta nyeluka ipé sing mbangkang mau lan dipituturi; nanging yèn meksa emoh lan ngomong: Kula ora seneng jikuk bojo wong kuwi,

⁹terus dityedké karo tilas bojoné seduluré kuwi ing ngarepé para tuwa-tuwa, dityopota sepatuné lan rainé diidonana karo ngomonga: Kaya mengkéné iki sing mesti kudu ditindakké marang wong sing ora gelem ngetokké turun marang seduluré.

¹⁰Lan turunané wong kuwi ing Israèl bakal disebut: turunané wong sing sepatuné dityepot karo wong.”

¹¹“Yèn ana wong lanang pada gelut, nanging bojoné sing siji terus nyedaki arep mitulungi sing lanang sangka tangané sing mentung, karo ngadek nyekel kewirangané mungsuhé sing lanang,

¹²wong wadon kuwi ketoken tangané, aja kok mesakké.”

¹³“Ing kantongmu aja ana watu timbangan rong werna, gedé lan tyilik.

¹⁴Ing omahmu aja ana takeran éfa rong werna, gedé lan tyilik.

¹⁵Watu timbanganmu kudu sing wutuh lan tyotyok; lan takeranmu éfa kudu sing wutuh lan tyotyok, supaya kowé didawakké umurmu ing negara pawèhé GUSTI, Gusti Allahmu, marang kowé.

¹⁶Saben wong sing nglakoni iki, ya kuwi wong sing ora jujur, GUSTI, Gusti Allahmu, sengit.”

¹⁷“Kowé élinga apa sing dadi penggawéné wong Amalèk marang kowé, ing dalan nalikané kowé metu sangka negara Egipte;

¹⁸ya kuwi enggoné metuki kowé ing dalan, lan merangi sak panunggalmu sing ringkih sing pada mlaku ing mburi, nanging kowé ijik kesel lan lemes. Wong mau pada ora wedi marang Gusti Allah.

¹⁹Mulané mbésuk yèn GUSTI, Gusti Allahmu, wis kelakon ngekèki tentrem marang kowé, utyul sangka sakkèhé mungsuh ing sak kiwa-tengenmu, ing negara sing dikèkké karo GUSTI, Gusti Allahmu, marang kowé dadi duwèkmu lan panggonan pandumanmu, kowé terus entèkna pengéling-éling marang Amalèk sangka sak ngisoré langit. Kuwi kowé aja nganti lali!”