Read Caribbean Javanese Andarané Torèt 8 Bible Online

Andarané Torèt 8 - Caribbean Javanese bible

Andarané Torèt 8

¹“Sakkèhé pepakon, sing tak omongké marang kowé ing dina iki, kuwi pada lakonana karo temen-temen, supaya kowé pada tetep urip lan tangkar tumangkar, supaya pada bisa mlebu lan ngenggoni negara sing wis dijanjèkké GUSTI karo sumpah marang para leluhurmu.

²Uga menèh kowé élinga, enggonmu wis mlaku awit Kekarepané GUSTI, Gusti Allahmu, ing ara-ara samun sak njeruhné patang puluh taun iki, karepé ndadèkké andap asormu lan njajal marang kowé, supaya kétok apa ing sak njeruhné atimu, ya kuwi apa kowé netepi pepakoné apa ora.

³Mulané atimu diasorké, kowé ditégakké keluwèn, lan kowé dikèki mangan manna, sing durung tau kok weruh lan para leluhurmu ya durung tau weruh, supaya kowé ngerti yèn uripé manungsa kuwi ora mung awit sangka roti waé, nanging manungsa kuwi uripé awit sangka samubarang sing diomongké karo GUSTI.

⁴Sandanganmu ora dadi lawas, lan sikilmu ora nganti abuh ing sak njeruhné patang puluh taun iki.

⁵Mulané kowé ngertia sing tenan, yèn GUSTI, Gusti Allahmu enggoné mulangi marang kowé kaya piwulangé wong tuwa marang anaké.

⁶Awit kuwi pada netepana pepakoné GUSTI, Gusti Allahmu, lan mlakua ing dalan sing diduduh-Ké uga wedia lan ngajènana marang Panjenengané;

⁷awit GUSTI, Gusti Allahmu nuntun kowé mlebu ing negara sing apik, negara sing ana kaliné, ana sumberé, sing mili sangka legokan-legokan lan sangka gunung-gunung.

⁸Negara sing sugih gandum lan jewawut, wit anggur, wit anjir lan wit mulwa; negara sing ana wité saitun lan ana maduné,

⁹negara sing ora kekurangan pangan, lan kowé ora bakal pada kekurangan apa-apa; negara sing watuné ana wesiné lan sangka gunungé kowé bakal ngeduk tembaga.

¹⁰Kowé bakal mangan nganti warek, lan kowé terus bakal pada ngluhurké GUSTI, Gusti Allahmu, awit sangka negara sing apik sing dikèkké marang kowé kuwi.

¹¹Sing ati-ati, aja nganti lali marang GUSTI, Gusti Allahmu, nganti ora netepi pepakoné, pernatané lan katetepané sing tak gelarké marang kowé ing dina iki;

¹²lan yèn kowé wis mangan nganti warek, supaya terus pada gawé omah sing apik sing pada kok enggoni,

¹³lan yèn sapi lan wedusmu wis pada tambah-tambah, uga emas lan slaka wis mundak okèh, ya sembarang duwèkmu mundak okèhé,

¹⁴atimu aja nganti gemunggung, terus lali marang GUSTI, Gusti Allahmu, sing wis ngetokké kowé sangka negara Egipte, sangka omah penggawéan peksa;

¹⁵lan sing wis nuntun mlakumu ngliwati ara-ara samun sing amba lan medèni, panggonan ula mandi lan kalajengking, sing tanahé garing tanpa banyu. Panjenengané sing nggawé metuné banyu sangka gunung watu sing atos kanggo kowé;

¹⁶sing ngekèki pangan manna marang kowé ing ara-ara samun, sing durung tau diweruh karo para leluhurmu, karepé ngasorké atimu lan njajal marang kowé, karepé mung arep nindakké kabetyikan marang kowé, ing pungkasané.

¹⁷Mulané kowé aja nganti pada nduwé pikiran ing atimu: Awit pangwasaku lan kekuwatanku sing njalari aku olèh kasugihan iki.

¹⁸Nanging kowé élinga marang GUSTI, Gusti Allahmu, awit ya Panjenengané kuwi sing ngekèki kekuwatan marang kowé nganti kowé bisa olèh kasugihan, karepé nguwatké perjanjiané sing wis dijanjèkké marang para leluhurmu karo sumpah, kaya ing dina iki.

¹⁹Nanging yèn kowé lali marang GUSTI, Gusti Allahmu, lan ngetutké lan ngabekti lan sujut nyembah marang allah liyané, ing dina iki kowé tak élingké, yèn kowé mesti bakal pada mati;

²⁰kaya para bangsa sing dientèkké karo GUSTI ing ngarepmu, mengkono uga kowé ya bakal pada dientèkké, awit kowé ora pada gelem ngrungokké tembungé GUSTI, Gusti Allahmu.”