Read Caribbean Javanese Yohanes 1 Bible Online

Yohanes 1 - Caribbean Javanese bible

Yohanes 1

¹Ing wiwitan mbiyèn Tembung kuwi wis ana, Tembung kuwi nunggal karo Gusti Allah lan Tembung kuwi Gusti Allah.

²Panjenengané kuwi ing wiwitan mbiyèn wis nunggal karo Gusti Allah.

³Samubarang kabèh digawé karo Panjenengané lan samubarang sing dadi ora ana siji-sijia sing ora digawé karo Panjenengané.

⁴Ing Panjenengané kuwi urip lan urip kuwi sing dadi pepadangé manungsa.

⁵Pepadang kuwi semlorot sak njeruhné pepeteng lan pepeteng ora ngwasani.

⁶Ana wong lanang teka diutus karo Gusti Allah, jenengé Yohanes.

⁷Tekané dadi seksi, kanggo nyeksèkké bab pepadang, supaya lantaran piyambaké, wong kabèh pada pertyaya.

⁸Piyambaké kuwi duduk pepadangé déwé, mung dipasrahi nyeksèkké bab pepadang.

⁹Pepadang sing sejati sing madangi saben wong, kuwi nekani jagat.

¹⁰Panjenengané wis ing jagat lan jagat kuwi digawé karo Panjenengané, nanging jagat kuwi ora kenal marang Panjenengané.

¹¹Tekané nemoni duwèké, nanging para duwèké kuwi ora gelem nampani.

¹²Nanging sak kabèhé wong sing nampani Panjenengané kuwi dikèki wewenangé dadi para anak Gusti Allah, ya kuwi wong kabèh sing pada pertyaya marang jenengé,

¹³sing lairé ora sangka getih, ya ora sangka karepé daging utawa sangka karepé wong lanang, nanging sangka Gusti Allah.

¹⁴Sang Tembung wis dadi Manungsa lan manggon ing antarané kita lan kita wis pada nyawang kamulyan-Né, ya kuwi kamulyan sing dikèkké marang Panjenengané ya kuwi Putrané Bapak sing ora ana tunggalé, sing kebak karo kawelasan lan kabeneran.

¹⁵Yohanes nyeksèni bab Panjenengané lan mbengok banter, tembungé: “Ya Panjenengané kuwi sing tak karepké nalika aku ngomong ngéné: Panjenengané sing teka sakwisé aku wis ndisiki aku, awit anané sak durungé aku.”

¹⁶Awit sangka kasampurnané, kita kabèh wis nampa berkah kawelasan lan katrésnan sing tanpa mandek.

¹⁷Awit angger-angger kuwi enggoné dikèkké lantaran Moses, nanging kawelasan lan kabeneran kuwi tekané sangka Yésus Kristus.

¹⁸Ora ana wong siji-sijia sing wis tau weruh Gusti Allah. Nanging Putrané sing ora ana tunggalé ing pangkonané Bapak, kuwi sing nerangké kanyataané.

¹⁹Iki paseksiné Yohanes nalika wong Ju sangka Yérusalèm kongkonan para imam lan para wong Lèwi, supaya takon: “Sampéyan kuwi sapa?”

²⁰Yohanes ngakoni karo bèrès: “Aku iki duduk Kristus.”

²¹Sing dikongkon terus pada takon: “Yèn mengkéné sampéyan kuwi sapa? Apa Elia?” Yohanes nyauri: “Duduk.”

²²Ing kono sing dikongkon pada ngomong: “Sampéyan kuwi sapa, supaya kita pada bisa ndunungké marang sing ngongkon kita. Pengaku sampéyan kanggo sampéyan déwé kuwi sapa?”

²³Tembungé Yohanes: “Aku iki swarané wong sing nyuwara banter ing ara-ara samun: Pada lentyengna dalan kanggo Gusti! Kaya sing wis diomong karo nabi Yésaya.”

²⁴Ing antarané para sing dikongkon mau ana wong Farisi.

²⁵Terus pada njaluk weruh menèh: “Kenèng apa sampéyan mbaptis, yèn sampéyan duduk Kristus, duduk Elia, duduk nabi?”

²⁶Yohanes nyauri, tembungé: “Aku mbaptis nganggo banyu; nanging ing sak tengahmu Panjenengané wis ngadek, nanging kowé pada ora kenal,

²⁷ya kuwi Panjenengané, sing tekané sakwisé aku. Senajan mung ngutyuli taliné sepatuné waé aku ora pantes.”

²⁸Kanggo kedadiané kuwi mau ing Bétania, ing sabrangé laut Yordan, panggonané Yohanes mbaptis.

²⁹Esuké Yohanes weruh Yésus nemoni; piyambaké terus ngomong: “Delengen kuwi Tyempéné Gusti Allah sing ngresiki dosané jagat.

³⁰Ya Panjenengané kuwi sing Tak karepké nalika aku ngomong ngéné: Ana wong lanang teka sakwisé aku, sing wis ndisiki aku, awit anané sak durungé aku.

³¹Mauné aku déwé ya ora kenal marang Panjenengané, mulané aku teka lan mbaptis nganggo banyu supaya turunané Israèl kenal marang Panjenengané.”

³²Lan menèh paseksiné Yohanes ngéné: “Aku wis weruh Roh medun sangka swarga kaya manuk dara, manggon ing Panjenengané.

³³Mauné aku ya ora kenal marang Panjenengané, nanging sing ngutus aku mbaptis nganggo banyu, wis ngomong: Yèn kowé weruh Roh kuwi teka ing sakwijiné wong lan manggon ing Panjenengané, Panjenengané kuwi sing bakal mbaptis karo Roh Sutyi.

³⁴Aku wis weruh lan nyeksèni yèn Panjenengané kuwi Putrané Gusti Allah.”

³⁵Esuké Yohanes ngadek ing panggonan kono menèh, karo muridé loro.

³⁶Nalika weruh Yésus liwat, Yohanes ngomong: “Lah kuwi Tyempéné Gusti Allah!”

³⁷Muridé loro mau pada krungu enggoné Yohanes ngomong mengkono kuwi, terus pada mèlu Yésus.

³⁸Nanging Yésus terus nolèh. Panjenengané weruh yèn murid mau pada mèlu, terus ngomong:

³⁹“Kowé pada golèk apa?” Tembungé sing pada ditakoni: “Rabbi, panggonan Panjenengan ing ngendi?” (Rabbi tegesé: Guru.)

⁴⁰Tembungé Yésus: “Hayuk, kowé bakal pada weruh!” Terus pada nemoni lan weruh panggonané lan ing dina kuwi terus pada manggon ing kono karo Panjenengané; wantyiné kuwi udakara jam papat.

⁴¹Murid loro sing wis krungu tembungé Yohanes terus pada mèlu Yésus mau, sing siji ya kuwi Andréas, seduluré Simon Pétrus.

⁴²Ndisiké Andréas ketemu karo Simon, seduluré, terus diomongi: “Aku wis pada ketemu karo Mésias (tegesé: Kristus).”

⁴³Simon mau terus diajak menyang ngarepé Yésus. Yésus terus weruh Simon lan ngomong: “Kowé kuwi Simon, anaké Yohanes. Kowé bakal dijenengké Kéfas tegesé: Pétrus.”[1]

⁴⁴Esuké menèh Yésus arep lunga menyang Galiléa. Panjenengané ditemokké karo Filipus, terus ngomong: “Mèlua Aku!”

⁴⁵Filipus mau wong sangka Bètsaida, kutané Andréas lan Pétrus.

⁴⁶Filipus ketemu Natanaèl, terus diomongi ngéné: “Aku wis pada ketemu karo sing diarani karo Moses ing sak njeruhné kitab Torèt lan karo para nabi, ya kuwi Yésus, anaké Yosèf, sangka Nasarèt.”

⁴⁷Tembungé Natanaèl: “Apa ana barang sing betyik sangka Nasarèt?” Semauré Filipus: “Hayuk, delengen déwé!”

⁴⁸Bareng Yésus weruh Natanaèl nemoni ing ngarepé, terus ngomong: “Lah, kuwi wong Israèl sejati, sing ora kanggonan goroh.”

⁴⁹Natanaèl terus ngomong: “Panjenengan weruh kula sangka ngendi?” Yésus nyauri, tembungé: “Sak durungé Filipus ngajak kowé, Aku weruh kowé ing sak ngisoré wit anjir.”

⁵⁰Natanaèl ngomong menèh: “Rabbi, Panjenengan kuwi Putrané Gusti Allah, Panjenengan kuwi Ratuné Israèl.”

⁵¹Yésus nyauri, tembungé: “Awit Aku ngomong marang kowé: Aku weruh kowé ing sak ngisoré wit anjir, kowé terus pertyaya? Kowé bakal weruh lelakon-lelakon sing luwih nggumunaké tenimbang karo kuwi.”

⁵²Yésus terus ngomong, ngéné: “Sak temené Aku ngomong marang kowé, kowé bakal pada weruh langit menga lan para mulékaté Gusti Allah pada munggah-mudun marang Putrané Manungsa.”