Read Caribbean Javanese Yohanes 13 Bible Online

Yohanes 13 - Caribbean Javanese bible

Yohanes 13

¹Nalika arep tekané dina riyaya Paskah, Yésus wis weruh, yèn wis tekan wantyiné enggoné bakal lunga sangka ndonya iki nemoni marang Bapak. Pada kayadéné Panjenengané enggoné tansah trésna marang para duwèké ing ndonya, mengkono uga saiki Panjenengané enggoné trésna kuwi nganti tekan ing pungkasané.

²Nalika pada mangan bebarengan, iblis wis mbisiki rantyaman ing atiné Yudas Iskariot, anaké Simon, supaya ngiyanati Panjenengané.

³Yésus weruh, yèn Bapak wis masrahké samubarang kabèh marang Panjenengané lan yèn Panjenengané kuwi tekané sangka Gusti Allah lan mulih marang Gusti Allah.

⁴Yésus terus ngadek lan ngutyuli jubahé. Panjenengané njupuk mori terus diubetké ing Panjenengané,

⁵terus ngesokké banyu ing wadah, lan wiwit ngisuhi sikilé para muridé lan diulapi karo mori sing diubetké ing Panjenengané mau.

⁶Bareng tekan gilirané Simon Pétrus. Pétrus terus ngomong: “Gusti, Panjenengan arep ngisuhi sikil kula?”

⁷Yésus nyauri, tembungé: “Apa sing tak tindakké, saiki kowé durung nyandak tegesé, nanging mbésuk kowé bakal mengertèni.”

⁸Pétrus ngomong marang Panjenengané: “Panjenengan aja nganti ngisuhi sikil kula ing sak lawasé.” Yésus nyauri, tembungé: “Yèn Aku ora ngisuhi kowé, kowé ora nduwé panduman ing Aku.”

⁹Semauré Simon Pétrus marang Panjenengané: “Gusti, aja mung sikil kula waé, nanging uga tangan lan sirah kula pisan.”

¹⁰Yésus nyauri, tembungé: “Sapa waé sing wis adus, ora usah adus menèh, kejaba mung ngisuhi sikilé waé, awit badané sekujur wis resik. Mengkono uga kowé kuwi wis resik, mung waé ora kabèh.”

¹¹Awit Panjenengané weruh sapa sing bakal ngiyanati Panjenengané. Awit sangka kuwi Panjenengané ngomong: “Kowé kuwi ora kabèh resik.”

¹²Sakwisé ngisuhi sikilé para muridé mau, Panjenengané nganggo jubahé menèh terus njagong lan ngomong: “Apa kowé pada mengertèni tegesé penggawéan-Ku marang kowé iki mau?

¹³Kowé pada nyebut Aku Guru lan Gusti, lan panyebutmu kuwi bener, awit Aku iki pantyèn Guru lan Gusti.

¹⁴Dadi yèn Aku iki sing dadi Gusti lan Gurumu wis ngisuhi sikilmu, dadi kowé ya pada wajip pada gentènan ngisuhi sikil.

¹⁵Awit Aku wis ngekèki tulada marang kowé, supaya kowé kabèh uga nindakké kaya sing wis Tak tindakké marang kowé.

¹⁶Sak temené Aku ngomong marang kowé: Abdi kuwi ora ngungkuli bendarané, utawa kongkonan ya ora ngungkuli sing ngutus.

¹⁷Yèn kowé pada mengertèni perkara kuwi kabèh, rahayu kowé, yèn kowé kabèh pada nglakoni.

¹⁸Tembung-Ku iki ora kanggo kowé kabèh. Aku weruh, sapa sing wis Tak pilih. Nanging kudu kedadian tenan tulisan sing tembungé ngéné: Wong sing mèlu mangan roti-Ku, kuwi wis ngangkat tungkaké marang Aku.

¹⁹Saiki kowé pada Tak omongi sak durungé bab kuwi kelakon, supaya yèn bab kuwi kelakon, kowé pada pertyaya, yèn ya Aku iki Panjenengané.

²⁰Sak temené Aku ngomong marang kowé, sapa sing nampani wong sing Tak utus, kuwi nampani Aku; lan sapa sing nampani Aku, kuwi nampani Panjenengané sing ngutus Aku.”

²¹Sakwisé Yésus ngomong mengkono, Panjenengané banget trenyuh ing ati, terus ngekèki paseksi ngéné: “Sak temen-temené Aku ngomong marang kowé: Wong siji sangka tunggalmu bakal ngiyanati Aku.”

²²Para muridé terus pada pandeng-pandengan, karo mangga-mara sapa sing dikarepké kuwi.

²³Salah sijiné muridé, ya kuwi muridé sing ditrésnani Panjenengané, lungguh sèndèn sandingé Panjenengané, ing sisih tengené.

²⁴Muridé kuwi mau dibisiki karo Simon Pétrus lan diomongi: “Njaluka weruh sapa sing diomongné kuwi.”

²⁵Muridé sing lungguh tyedak Yésus mau terus nolèh lan ngomong marang Panjenengané: “Gusti, sapa wongé?”

²⁶Yésus nyauri: “Wongé ya kuwi sing bakal Tak wènèhi roti sakwisé Tak tyelupké.” Sakwisé ngomong mengkono, terus njupuk roti lan dityelupké terus dikèkké marang Yudas, anaké Simon Iskariot.

²⁷Lan sakwisé nampani roti kuwi, Yudas terus ketèmpèlan sétan. Yésus terus ngomong marang Yudas: “Apa sing arep kok lakoni, kuwi gelis tindakna!”

²⁸Nanging ora ana wong siji-sijia ing antarané para muridé sing pada kembulan kuwi sing mengertèni, apa karepé Yésus ngomong mengkono marang Yudas kuwi.

²⁹Awit Yudas sing nyekel kas duwit, ana sing nduwé pangira yèn Yésus ngutus wong kuwi tuku apa-apa sing perlu kanggo riyaya kuwi, utawa dipréntahké ngekèki apa-apa marang wong mlarat.

³⁰Yudas nampani roti kuwi terus gelis-gelis lunga. Nalika kuwi wantyiné wis mbengi.

³¹Sakwisé Yudas lunga, Yésus terus ngomong: “Saiki Putrané Manungsa diluhurké lan Gusti Allah diluhurké ing Panjenengané.

³²Yèn Gusti Allah diluhurké ing Panjenengané, Gusti Allah ya bakal ngluhurké Panjenengané ing Panjenengané piyambak, malah Panjenengané terus bakal diluhurké.

³³Hé, anak-anak-Ku, enggon-Ku ngantyani kowé mung kari sedilut. Kowé bakal pada nggolèki Aku, kayadéné enggon-Ku wis ngomongi marang wong Ju: Menyang ngendi paran-Ku, kowé ora bakal pada bisa mrana; mengkono uga saiki Aku ngomong marang kowé.

³⁴Aku ngekèki pepakon anyar marang kowé, ya kuwi supaya kowé pada trésna-tinrésnaa; kaya enggon-Ku wis trésna marang kowé, kaya mengkono uga kowé ya pada trésna-tinrésnaa.

³⁵Karo mengkono wong kabèh bakal pada mengertèni, yèn kowé pada dadi murid-Ku, ya kuwi yèn kowé pada trésna-tinrésnan.”

³⁶Simon Pétrus terus ngomong: “Gusti, Gusti lunga menyang ngendi?” Semauré Yésus: “Menyang ngendi paran-Ku, kowé ora bisa mèlu Aku saiki, nanging mbésuk kowé bakal pada mèlu Aku.”

³⁷Pétrus ngomong marang Panjenengané: “Gusti, kenèng apa kula ora bisa mèlu Gusti saiki? Kula arep nanggungké nyawa kula kanggo Gusti.”

³⁸Semauré Yésus: “Nyawamu bakal kok kèkké kanggo Aku? Sak temen-temené Aku ngomong marang kowé: Sak durungé pitik jago kluruk, kowé wis nyélaki Aku dibalèni kaping telu.”