Read Caribbean Javanese Yohanes 19 Bible Online

Yohanes 19 - Caribbean Javanese bible

Yohanes 19

¹Pilatus terus ngongkon nggawa Yésus supaya digebuki.

²Para suradadu pada ngenam eri digawé makuta, terus pasang ing sirahé. Wong-wong kuwi pada nganggokké jubah wungu,

³terus pada maju lan ngomong: “Slamet, ratuné wong Ju!” Wong-wong mau terus napuk praupan-Né.

⁴Pilatus terus metu menèh lan ngomong marang wong-wong mau: “Pada delengen, kuwi Wongé tak etokké ana ngarepmu, supaya kowé pada mengertèni, yèn aku, ora nemu kesalahané Wong kuwi.”

⁵Yésus terus metu, nganggo makuta eri lan jubah wungu. Pilatus ngomong marang wong-wong mau: “Sawangen Wong kuwi!”

⁶Nalika para pengarepé imam lan para pegawéné pada weruh Panjenengané, terus pada mbengok: “Kudu dipentèng, kudu dipentèng!” Tembungé Pilatus: “Gawanen lan salipen; awit kanggo aku Wong kuwi ora ana kesalahané apa-apa.”

⁷Semauré wong-wong Ju: “Kita pada nduwé angger-angger, lan miturut angger-angger kuwi, Wong kuwi kudu diukum mati, awit ngaku-ngaku Putrané Gusti Allah.”

⁸Bareng Pilatus krungu tembung sing mengkono kuwi, mundak tambah wediné,

⁹terus mlebu ing gedong pengadilan menèh lan ngomong marang Yésus: “Asal-usulé Panjenengan sangka ngendi?” Nanging Yésus ora nyauri.

¹⁰Mulané Pilatus terus ngomong: “Apa Panjenengan ora gelem tyerita marang kula? Apa Panjenengan ora ngerti, yèn kula kuwi nduwé pangwasa ngluwari Panjenengan lan uga kwasa nyalip Panjenengan?”

¹¹Semauré Yésus: “Sampéyan ora nduwé pangwasa apa-apa kanggo Aku, yèn pangwasa iki ora dikèkké marang sampéyan sangka nduwur. Mulané: wong sing ngekèkké Aku marang sampéyan, dosané luwih gedé.”

¹²Wiwit kuwi Pilatus ngupaya ngluwari Panjenengané, nanging wong-wong Ju pada mbengok: “Yèn sampéyan ngluwari wong kuwi, Panjenengan duduk kantyané kaisar. Awit wong sing ngaku-ngaku dadi ratu, kuwi nglawan marang kaisar.”

¹³Bareng Pilatus krungu tembung mengkono kuwi, terus ngongkon ngetokké Yésus lan terus njagong ing kursi pengadilan, ing panggonan sing diarani Litostrotos, ing basa Ibrani: Gabata.

¹⁴Nalika kuwi pinuju dina tyetyawisan Paskah, kira-kira jam rolas. Pilatus terus ngomong marang wong-wong Ju: “Sawangen ratumu!”

¹⁵Wong-wong mau pada mbengok: “Dipatèni! Dipatèni! Kudu dipentèng!” Tembungé Pilatus: “Apa aku kudu nyalip ratumu?” Semauré para pengarepé imam: “Kita pada ora nduwé ratu kejaba mung kaisar.”

¹⁶Pilatus terus masrahké Yésus marang wong-wong mau supaya dipentèng. Wong-wong nampani Yésus.

¹⁷Karo manggul salip, Yésus metu lan lunga menyang panggonan sing diarani panggonan Tyumplung sirah, ing basa Ibrani: Golgota.

¹⁸Ing kono, wong-wong mau pada nyalip Panjenengané, bareng karo wong loro liyané, ing kiwa lan tengené, nanging Yésus ing tengah.

¹⁹Pilatus uga ngongkon masang tulisan ing sak nduwuré salip, uniné: “Yésus sangka Nasarèt, Ratuné wong Ju.”

²⁰Okèh wong Ju sing pada matya tulisan mau, awit panggonan penyalipané Yésus kuwi tyedak kuta, lan tulisan mau nganggo basa Ibrani, Latin, lan Yunani.

²¹Para pengarepé imam bangsa Ju terus pada ngomong marang Pilatus: “Panjenengan aja nulis: Ratuné wong Ju, nanging pengakuné: Aku iki Ratuné wong Ju.”

²²Semauré Pilatus: “Apa sing wis tak tulis, tetep ketulis.”

²³Sakwisé para suradadu mau pada nyalip Yésus, terus pada njupuk penganggo-Né didum papat, saben suradadu sak bagéan lan penganggoné jubah ya dijukuk. Jubah kuwi ora nganggo dondoman, tenunané lajuran wiwit sangka nduwur tekan ngisor.

²⁴Mulané para suradadu mau pada rembukan: “Kuwi aja didum-dumké dadi suwèkan, nanging hayuk pada dilotré kanggo nemtokké sapa sing olèh.” Kuwi supaya kedadian tenan sing ketulis ing Kitab: “Sandangan Kula didum, lan jubah Kula dilotré.” Sing mengkono kuwi wis ditindakké karo para suradadu mau.

²⁵Ing sak tyedaké salipé Yésus kuwi ibuné lan seduluré ibuné, ya kuwi Maria bojoné Klopas lan Maria Makdaléna.

²⁶Bareng Yésus weruh ibuné lan muridé sing ditrésnani ngadek sak tyedaké kono, terus ngomong marang ibuné: “Ibu, kuwi anakmu!”

²⁷Terus ngomong marang muridé mau: “Kuwi ibumu!” Wiwit nalika kuwi muridé mau terus mboyong ibuné Yésus menyang omahé.

²⁸Sakwisé kuwi, awit Yésus weruh, yèn samubarang kabèh wis rampung, terus ngomong, supaya nyata sing ketulis ing Kitab: “Aku ngelak!”

²⁹Ing kono ana wadah sing kebak isi anggur ketyut. Terus ana wong sing nyelupké kembang karang ing anggur ketyut mau, terus ditantyepké ing pangé hisop, terus dilungakké ing tutuké Yésus.

³⁰Sakwisé nesep anggur ketyut mau, Yésus terus ngomong: “Wis rampung!” Panjenengané terus ndingklukké sirahé lan masrahké nyawané.

³¹Awit pinuju dina tyetyawisan lan supaya ing dina sabat layon-layon ora tetep ing kayu salip - awit dina sabat kuwi dina sabat sing gedé déwé - mulané para pengarepé wong Ju pada teka lan nduwé penjaluk marang Pilatus supaya sikilé wong-wong ing kayu salip pada kudu diremuk, lan layoné didunké.

³²Mulané para suradadu terus pada mara lan ngremuki sikilé wong siji lan sijiné sing dipentèng bareng karo Yésus.

³³Nanging bareng tekan enggoné Yésus lan weruh yèn Panjenengané wis ninggal, wong-wong kuwi ora pada ngremuk sikilé.

³⁴Senajan mengkono salah sijiné suradadu tunggalé kuwi njojoh wetengé Yésus nganggo tumbak, lan sak nalika metu getihé lan banyuné.

³⁵Wong sing ndeleng déwé bab kuwi, kuwi sing nyeksèni, lan paseksiné kuwi nyata, lan wong kuwi mengertèni, yèn paseksiné kuwi nyata, supaya kowé uga pada pertyaya.

³⁶Awit kedadiané kuwi mau supaya kedadian tenan sing ketulis ing Kitab: “Ora ana balungé sing diremuk.”

³⁷Lan ana tulisan menèh sing ndunungké: “Wong-wong bakal pada nyawang Panjenengané, sing wis dijojoh.”

³⁸Sakwisé kuwi mau, Yosèf sangka Arimatèa nduwé penjaluk marang Pilatus, supaya dililani ngedunké layoné Yésus. Yosèf kuwi muridé Yésus nanging karo meneng-meneng awit wedi karo para pangwasa Ju. Pilatus uga nglilani penjaluké kuwi. Mulané terus teka lan njukuk layoné Yésus.

³⁹Nikodémus uga teka mrana. Wong kuwi sing wiwitan teka ing ngarepé Yésus nalika wantyi mbengi. Nikodémus nggawa tyampuran lenga mur lan lenga garu, boboté kira-kira telung puluh kilo.

⁴⁰Wong-wong mau pada njukuk layoné Yésus lan dibunteli nganggo mori sing ana ambon-ambonan kaya adaté wong Ju yèn ngubur layon.

⁴¹Sak tyedaké panggonané Yésus dipentèng kuwi ana petamanan lan ing taman mau ana kuburan anyar sing durung tau dienggo ngubur wong.

⁴²Awit pinuju dina tyetyawisé wong Ju, lan kuburané kuwi tyedak, mulané Yésus terus dikubur ing kono.