Read Caribbean Javanese Yohanes 2 Bible Online

Yohanes 2 - Caribbean Javanese bible

Yohanes 2

¹Ing dina kaping teluné ana pésta mantu ing Kana, bawah Galiléa lan ibuné Yésus ing kono.

²Yésus uga para muridé uga diulemi mrana.

³Bareng pada kekurangan anggur, ibuné Yésus terus ngomong marang Panjenengané: “Pada kentèkan anggur.”

⁴Tembungé Yésus: “Ibu, sampéyan ngarepké apa marang Kula? Durung teka wantyi Kula.”

⁵Nanging ibuné Yésus terus ngongkon marang para peladèn: “Apa sak omongé marang kowé pada lakonana.”

⁶Ing kono ana gentong watu wadah banyu enem, sing dityawiské kanggo wisuhan miturut adaté wong Ju, isiné saben gentong mau udakara 120 liter.

⁷Yésus terus ngongkon marang para peladèn mau: “Gentongé pada kebakana banyu!” Terus diisèni nganti kebak.

⁸Yésus terus ngomong: “Saiki tyiduken lan pasrahna marang pemimpiné pésta!” Terus pada masrahaké.

⁹Pemimpiné pésta kuwi bareng ngityipi banyu sing wis dadi anggur mau - lan ora mengertèni sangka ngendi tekané, awit sing mengertèni mung para peladèn sing pada nyiduki banyuné - terus ngomongi pengantèn lanang,

¹⁰lan ngomong: “Saben wong nyuguhi anggur kuwi sing apik ndisik lan sakwisé para dayohé ngombé okèh terus nyugguhké sing kurang apik. Nanging sampéyan kok nyimpen anggur sing apik nganti saiki.”

¹¹Perkara kuwi mau ditindakké Yésus ing Kana panggonan Galiléa, dadi wiwitan mujijat-mujijat lan karo mengkono Panjenengané wis nggelarké kaluhurané. Para muridé terus pada pertyaya marang Panjenengané.

¹²Sakwisé mengkono Yésus terus lunga menyang Kapernaum, bebarengan karo ibuné lan para seduluré lan para muridé, lan ing kono mung pada mandek dina waé.

¹³Nalika arep tekané riyaya Paskahé wong Ju, Yésus lunga menyang Yérusalèm.

¹⁴Ing Griya Sutyi Yésus weruh wong-wong sing adol sapi, wedus gèmbèl, manuk dara, uga wong-wong tukang ngijoli duwit pada dasaran ing kono.

¹⁵Panjenengané njupuk tali kanggo petyut, terus nundungi wong-wong mau kabèh uga wedus gèmbèl lan sapiné, sangka Griya Sutyi. Duwité tukang ngijoli duwit pada digulingké, méjané pada digulingké.

¹⁶Bakul-bakul dara pada dikongkon ngéné: “Kabèh iki pada singkirna sangka kéné! Griyané Bapak-Ku aja kok enggo panggonan bakulan.”

¹⁷Para muridé terus pada kèlingan yèn ana tulisan ngéné: “Katrésnan marang Griya Panjenengan kuwi nganti ngobong ati Kula.”

¹⁸Wong-wong Ju terus pada ngomong marang Yésus: “Panjenengan bisa nggawé mujijat apa sing bisa Panjenengan kétokké marang kita, yèn Panjenengan pantes nindakké kaya mengkéné?”

¹⁹Yésus nyauri, tembungé: “Bubrahen Griya Sutyi iki, sak njeruhné telung dina bakal tak dekné menèh.”

²⁰Semauré wong Ju: “Griya Sutyi kuwi dibangun ing njeruhné patang puluh enem taun, nanging Panjenengan kok arep ngadekké ing njeruhné telung dina?”

²¹Nanging sing diomongné Griya Sutyi kuwi Panjenengané piyambak.

²²Sakwisé Yésus tangi sangka antarané wong mati, para muridé pada kèlingan, yèn Panjenengané wis tau ngomong mengkono mau, terus pada pertyaya marang Kitab lan marang tembungé sing diomongké karo Yésus.

²³Nalika Yésus ing Yérusalèm sak njeruhné riyaya Paskah, wong okèh pada pertyaya marang Panjenengané, awit pada weruh mujijat-mujijat sing ditindakké.

²⁴Nanging Yésus déwé ora nganggep marang pertyayané wong-wong mau, awit Panjenengané wis weruh wong-wong mau

²⁵lan ora perlu ana wong sing ngekèki paseksi bab manungsa marang Panjenengané, jalaran Panjenengané wis weruh déwé apa ing atiné manungsa.