Read Caribbean Javanese Yohanes 3 Bible Online

Yohanes 3 - Caribbean Javanese bible

Yohanes 3

¹Ana wong Farisi sing jenengé Nikodémus, pengarepé wong Ju,

²nemoni Yésus ing wantyi mbengi lan ngomong: “Rabbi, kula ngerti yèn teka Panjenengan dadi guru kuwi diutus karo Gusti Allah, awit ora ana wong sing bisa nindakké tanda kaya sing Panjenengan tandangi kuwi, yèn Gusti Allah ora nunggal.”

³Yésus nyauri, tembungé: “Sak temené Aku ngomong marang kowé: yèn wong ora dilairké menèh, kuwi ora bisa weruh Kratoné Gusti Allah.”

⁴Semauré Nikodémus: “Kepriyé bisané wong dilairké, yèn wis tuwa? Apa bisa mlebu menèh nang wetengé ibuné, terus dilairké menèh?”

⁵Yésus nyauri, tembungé: “Sak temené Aku ngomong marang kowé: yèn wong ora dilairké sangka banyu lan Roh, kuwi ora bisa mlebu ing Kratoné Gusti Allah.

⁶Apa sing lair sangka daging, kuwi sipaté daging lan apa sing lair sangka Roh, kuwi sipaté roh.

⁷Aja nggumun, nanging Aku ngomong marang kowé: Kowé kudu dilairké menèh.

⁸Angin[2] kuwi tekané miturut sak karepé, lan kowé krungu uniné, nanging ora mengertèni tekané lan parané. Kaya mengkono kuwi kahanané saben wong sing dilairké sangka Roh!”

⁹Nikodémus ngomong, tembungé: “Perkara kuwi bisané kedadian kepriyé?”

¹⁰Yésus nyauri, tembungé: “Kowé kuwi guruné wong Israèl, kok ora mengertèni perkara kuwi?

¹¹Sak temené Aku ngomong marang kowé: Sing pada Kita rembuk kuwi, ya sing pada Kita mengertèni, lan sing pada Kita seksèkké ya sing pada Kita weruh, nanging kowé ora pada nampani paseksi Kita.

¹²Yèn nalika kowé Tak pituturi bab kadonyan pada ora ngandel, kepriyé bisamu pada ngandel yèn Tak tuturi bab swarga?

¹³Ora ana wong siji-sijia sing wis tekan menyang swarga, kejaba mung Panjenengané sing wis mudun sangka swarga, ya kuwi Putrané Manungsa.

¹⁴Kayadéné Moses enggoné manjer ula-ulaan ing ara-ara samun, ya mengkono uga Putrané Manungsa enggoné pestiné dipanjer,

¹⁵supaya saben wong sing pertyaya marang Panjenengané pada nduwèni urip langgeng.

¹⁶Awit Gusti Allah enggoné trésna marang jagat kuwi nganti masrahké Putrané sing ora ana tunggalé, supaya saben wong sing pertyaya marang Panjenengané aja nganti nemu karusakan, nanging nduwèni urip langgeng.

¹⁷Awit Gusti Allah enggoné ngutus Putrané nekani jagat kuwi ora supaya ngadili jagat, nanging supaya jagat ditulungi rahayu karo Panjenengané.

¹⁸Sapa sing pertyaya marang Panjenengané, kuwi ora bakal diukum; nanging sapa sing ora pertyaya, kuwi wis ditibani paukuman, awit ora pertyaya ing asmané Putrané Gusti Allah sing ora ana tunggalé.

¹⁹Lan paukuman kuwi ngéné: Pepadang kuwi wis tekan ing jagat, nanging manungsa pada luwih rumaket marang pepeteng, tenimbang karo pepadang, awit penggawé-penggawéné ala.

²⁰Awit sapa waé sing nindakké sing ala mesti sengit marang pepadang lan nyingkur pepadang, supaya aja nganti kétok penggawéané sing ala kuwi.

²¹Nanging sapa sing nandangi bener kuwi marani pepadang, supaya ketara yèn penggawéané kuwi ditindakké ing njeruhné Gusti Allah.”

²²Sakwisé mengkono Yésus lunga menyang Yudéa ditutké karo para muridé; terus mandek ing kono lan mbaptis.

²³Yohanes uga enggoné mbaptis ing Enon, sak tyedaké Salim, awit ing kono okèh banyuné. Wong-wong terus pada teka mrana supaya dibaptis,

²⁴awit nalika semono Yohanes durung dilebokké ing pakunjara.

²⁵Nalika semono ana bantahan para muridé Yohanes karo wong Ju bab nyutyèkké urip.

²⁶Para murid mau terus pada nemoni Yohanes lan ngomong: “Rabbi, wong sing bareng karo panjenengan ing sabrangé laut Yordan lan sing wis panjenengan kèki paseksi kuwi ya mbaptis lan wong okèh pada nemoni mrana.”

²⁷Yohanes nyauri, tembungé: “Wong ora bisa nduwèni apa-apa yèn ora dikèki sangka swarga.

²⁸Kowé déwé pada bisa gawé paseksi yèn aku wis ngomong: Aku iki duduk Kristus, nanging aku diutus mlaku ndisiki Panjenengané.

²⁹Sing pada nduwèni pengantèn wadon kuwi pengantèn lanang; nanging kantyané pengantèn lanang sing ngadek ing sak tyedaké lan ngrungokké, kuwi bungah banget ngrungokké swarané pengantèn lanang kuwi. Ya kuwi kabungahanku lan saiki kabungahanku wis katekan.

³⁰Panjenengané kuwi pestiné saya mundak, nanging aku iki saya suda.

³¹Sing tekané sangka nduwur kuwi ngungkuli sak kabèhé, sing tekané sangka bumi kuwi ya sangka bumi, lan rembuké ya kanggo perkara-perkara ing bumi. Sing tekané sangka swarga kuwi ngungkuli sak kabèhé.

³²Panjenengané ngekèki paseksi bab apa sing wis didelok lan apa sing wis dirungokké, nanging ora ana wong siji-sijia sing nampani paseksiné.

³³Sapa sing nampani paseksiné kuwi, ngakoni yèn Gusti Allah kuwi bener.

³⁴Awit sing diutus karo Gusti Allah kuwi sing ngomongké tembungé Gusti Allah, awit Gusti Allah enggoné ngekèkké Rohé tanpa wates.

³⁵Sang Bapak trésna marang Putra, lan wis masrahké samubarang kabèh marang Panjenengané.

³⁶Sapa sing pertyaya marang Putra, kuwi pada nduwèni urip langgeng, nanging sapa sing ora manut marang Putra, kuwi bakal ora ngalami urip, nanging malah langgeng enggoné nampani bebenduné Gusti Allah.”