Read Caribbean Javanese Yohanes 5 Bible Online

Yohanes 5 - Caribbean Javanese bible

Yohanes 5

¹Sakwisé kuwi, ana riyayané wong Ju, Yésus lunga menyang Yérusalèm.

²Ing Yérusalèm, sak tyedaké gapura Wedus, ana blumbang, ing tembung Ibrani diarani: Bètèsda, sing ana bangsalé lima.

³Ing kono okèh banget wong lara pating gluntung: wong lamur, wong pintyang, wong lumpuh. [Pada ngentèni kotyaké banyu.

⁴Awit yèn ana mulékaté Gusti medun ing blumbang kono banyuné kotyak; lan yèn banyu mau kotyak, sapa waé sing njegur ndisik déwé dadi waras, senajan apa waé larané.][4]

⁵Ing kono ana wong sing ngalami lara wis telung puluh wolu taun suwéné.

⁶Bareng Yésus weruh wong mau nggluntung ing kono lan Panjenengané weruh yèn wong mau wis suwé enggoné mengkono kuwi, terus diomongi: “Kowé apa kepéngin waras?”

⁷Semauré wong sing lara mau: “Bendara, ora ana wong sing nyemplungké kula nang blumbang yèn banyuné wiwit kotyak. Angger kula ijik marani, terus ana wong liya sing nyemplung ndisiki kula.”

⁸Yésus terus ngomong: “Tangia, peturonmu angkaten lan mlakua!”

⁹Sak nalika wong mau dadi waras, terus ngangkat ambèné lan terus mlaku. Nanging dina kuwi pinuju dina sabat.

¹⁰Awit sangka kuwi wong-wong Ju pada ngelokké wong sing mentas waé waras mau, tembungé: “Iki dina sabat, kowé ora kena ngangkat peturonmu!”

¹¹Nanging semauré wong mau: “Wong sing maraské kula kuwi sing ngongkon kula: Peturonmu angkaten, mlakua!”

¹²Wong-wong mau terus pada takon: “Sapa wongé sing ngongkon kowé: Peturonmu angkaten, mlakua?”

¹³Nanging wong sing mentas waé waras ora mengertèni, kuwi sapa, awit Yésus wis ngilang ing tengahé wong okèh ing kono.

¹⁴Sakwisé mengkono Yésus nemoni wong mau ing Griya Sutyi, terus diomongi: “Kowé wis waras, aja gawé dosa menèh, supaya kowé aja nganti ngalami sing luwih èlèk.”

¹⁵Wongé terus lunga, nyritakké marang wong-wong Ju yèn sing maraské kuwi Yésus.

¹⁶Lan awit sangka kuwi, wong-wong Ju pada ngupaya arep nglarani Yésus, awit Panjenengané nindakké sing mengkono kuwi ing dina sabat.

¹⁷Nanging Yésus ngomong: “Bapak-Ku nyambutgawé nganti saiki, mulané Aku uga nindakké penggawéan-Ku.”

¹⁸Awit sangka kuwi wong Ju mundak nemen menèh enggoné ngarah matèni Panjenengané, awit ora mung nerak dina sabat waé, nanging uga awit nganggep yèn Gusti Allah kuwi Bapaké déwé, dadi Panjenengané dipadakké karo Gusti Allah.

¹⁹Yésus nyauri, tembungé: “Sak temené Aku ngomong marang kowé: Putra ora bisa nindakké apa-apa sangka Dèkné déwé, yèn Panjenengané ora weruh sing ditindakké karo Bapak. Awit apa sing ditindakké karo Bapak, kuwi uga ditindakké karo Putra.

²⁰Awit Bapak trésna marang Putra lan nduduhké sembarang sing ditindakké Piyambak marang Panjenengané, malah ya bakal nduduhké marang Panjenengané penggawé sing luwih gedé menèh tenimbang karo kuwi, nganti kowé pada nggumun.

²¹Awit pada kaya Bapak enggoné nangèkké lan nguripké wong sing pada mati, mengkono uga Putra ya nguripké saben wong sing dikarepké.

²²Bapak ora ngadili sapa waé, nanging wis masrahké pengadilan kuwi marang Putra,

²³supaya wong kabèh pada ngurmati marang Putra kayadéné enggoné ngurmati Bapak. Sapa sing ora ngurmati marang Putra, kuwi uga ora ngurmati marang Bapak sing ngutus Panjenengané.

²⁴Sak temené Aku ngomong marang kowé: Saben wong sing ngrungokké pitutur-Ku, lan pertyaya marang sing ngutus Aku, kuwi pada nduwèni urip langgeng, lan ora katut diukum, jalaran wis ngalih sangka pati marang urip.

²⁵Sak temen-temené Aku ngomong marang kowé, bakal tekan wantyiné, malah wis tekan, yèn wong mati pada krungu swarané Putrané Gusti Allah, lan sapa sing ngrungokké kuwi bakal urip.

²⁶Awit pada kaya Bapak nduwé urip ing Panjenengané Piyambak, mengkono uga Putra ya wis diwènèhi nduwé urip ing Panjenengané Piyambak.

²⁷Lan menèh wis dikèki pangwasa nggawa pengadilan, awit Panjenengané kuwi Putrané Manungsa.

²⁸Kowé aja pada nggumun marang perkara kuwi, awit bakal tekan wantyiné yèn sak kabèhé wong ing kubur pada krungu swarané,

²⁹sing kelakuané betyik bakal metu lan tangi nuju marang urip langgeng, nanging sing kelakuané ala bakal tangi nuju paukuman.

³⁰Aku ora bisa nindakké apa-apa sangka awak-Ku déwé, enggon-Ku ngadili kuwi miturut karo apa sing Tak krungu, lan pengadilan-Ku kuwi adil, awit Aku ora nuruti karep-Ku déwé, nanging miturut karepé sing ngutus Aku.

³¹Yèn Aku nyeksèkké bab awak-Ku déwé, paseksi-Ku kuwi ora bener.

³²Ana liyané sing nyeksèkké kanggo Aku lan Aku mengertèni yèn paseksi sing diomongaké bab Aku kuwi bener.

³³Kowé wis pada kongkonan marang Yohanes, lan wong kuwi wis nyeksèni bab kabeneran.

³⁴Nanging Aku ora mbutuhké paseksi sangka manungsa, nanging Aku ngomong mengkono kuwi supaya kowé pada dislametké.

³⁵Yohanes kuwi minangka dimar sing murup lan sing madangi, nanging kowé kuwi mung sak untara waktu waé enggonmu ngrasakaké padangé.

³⁶Nanging Aku iki nduwèni paseksi sing ngungkuli paseksiné Yohanes, ya kuwi sak kabèhé penggawéan sing dikèkké Bapak marang Aku, supaya Tak tindakké. Penggawéan kuwi ya sing Tak tindakké saiki, lan kuwi dadi paseksi enggoné Bapak ngutus Aku.

³⁷Bapak sing ngutus Aku, Panjenengané sing nyeksèni Piyambak kanggo Aku. Kowé ora tau krungu swarané utawa weruh rupané,

³⁸uga tembungé ora tetep manggon ing kowé, awit kowé pada ora pertyaya marang Panjenengané sing diutus.

³⁹Kowé pada nliti Kitab, awit kowé nyangka sangka kuwi kowé pada nduwèni urip langgeng. Nanging senajan Kitab kuwi nyeksèni bab Aku,

⁴⁰senajan mengkono kowé pada ora gelem marani Aku supaya pada nduwèni urip kuwi.

⁴¹Aku ora mbutuhké panghurmaté manungsa.

⁴²Nanging kanggo kowé, Aku wis mengertèni, yèn ing atimu pada ora kanggo katrésnan marang Gusti Allah.

⁴³Teka-Ku iki ing asmané Bapak-Ku, nanging kowé pada ora nampani Aku. Yèn ana wong liyané teka kanggo jenengé déwé kuwi bakal kok tampani.

⁴⁴Kowé kuwi enggonmu bisa pada pertyaya kepriyé, nanging pertyayamu mung pada ngarah elem-elemané manungsa, nanging kehormatan sing sangka Gusti Allah kuwi ora pada kok upaya.

⁴⁵Kowé aja pada nduwé pangira yèn Aku sing bakal nggugat kowé ing ngarepé Bapak; sing nggugat kowé, ya kuwi Moses sing dadi dunungé pengarep-arepmu.

⁴⁶Awit yèn kowé pada pertyaya marang Moses, mestiné ya pertyaya marang Aku, awit piyambaké wis nulis bab Aku.

⁴⁷Nanging yèn kowé pada ora pertyaya marang sing ditulis Moses, kepriyé enggonmu bakal pada pertyaya marang sing Tak omongké?”