Read Caribbean Javanese Yohanes 7 Bible Online

Yohanes 7 - Caribbean Javanese bible

Yohanes 7

¹Sakwisé mengkono Yésus mlaku ngubengi Galiléa. Awit Panjenengané ora gelem ngubengi ing Yudéa, awit wong Ju pada ngarah patiné.

²Nalika kuwi arep tekané riyayané wong Ju, ya kuwi riyaya ngadekké Tarup.

³Kanggo kuwi para seduluré Yésus pada ngomong marang Panjenengané: “Hayuk Panjenengan lunga menyang Yudéa, supaya para murid Panjenengan ya pada bisa weruh penggawéané sing Panjenengan tandangi.

⁴Awit ora ana wong sing nandangi karo meneng-meneng, yèn ngupaya diakoni wong okèh. Yèn Panjenengan nindakké penggawéané sing mengkéné kuwi, hayuk Panjenengan kétoké marang jagat.”

⁵Awit para seduluré déwé ya pada ora pertyaya marang Panjenengané.

⁶Yésus terus ngomong marang para seduluré mau: “Durung tekan wantyi-Ku, nanging kanggo kowé kabèh, tansah ana wantyiné.

⁷Jagat kuwi ora bisa sengit marang kowé, nanging sengit marang Aku, awit Aku nyeksèkké yèn penggawéané jagat kuwi ala.

⁸Kowé pada lungaa nekani riyaya kuwi. Aku durung budal mrana, awit durung tekan wantyi-Ku.”

⁹Sakwisé ngomong mengkono, Panjenengané terus kèri ing Galiléa.

¹⁰Nanging bareng para seduluré wis budal nekani riyaya mau, Panjenengané ya lunga mrana, nanging ora kebukak, dadi karo meneng-meneng.

¹¹Nalika riyaya wong-wong Ju pada nggolèki Panjenengané, lan ngomong: “Wongé ing ngendi?”

¹²Sangka antarané wong okèh mau krungu rembukan bab Panjenengané. Ana sing ngomong ngéné: “Kuwi wong betyik.” Liyané menèh: “Ora, kuwi nasarké wong okèh.”

¹³Nanging ora ana wong siji-sijia sing wani rembukan kebukak bab Panjenengané, awit pada wedi marang wong Ju.

¹⁴Bareng wis nengah-nengahi riyaya, Yésus mlebu ing Griya Sutyi lan mulangi.

¹⁵Wong Ju pada nggumun, tembungé: “Wong kuwi olèhé kaweruh sing kaya mengkono kuwi sangka ngendi, senajan ora nganggo sinau!”

¹⁶Yésus nyauri: “Piwulang-Ku iki duduk piwulang-Ku déwé, nanging piwulangé sing ngutus Aku.

¹⁷Saben wong sing gelem nglakoni karepé, mesti bakal mengertèni piwulang-Ku iki, apa sangka Gusti Allah, apa sangka tembung-tembung-Ku déwé.

¹⁸Saben wong sing rembuké sangka karepé déwé kuwi ngarah kaluhurané déwé. Nanging wong sing nggolèki kaluhurané sing ngutus, kuwi sing temen, lan ora kanggonan goroh.

¹⁹Apa duduk Moses sing mréntah angger-anggeré Torèt marang kowé? Nanging tunggalmu ora ana siji-sijia sing netepi angger-anggeré Torèt mau. Awit apa kowé pada ngarah pati-Ku?”

²⁰Semauré wong okèh: “Panjenengan kuwi ketèmpèlan demit. Sapa sing arep matèni Panjenengan?”

²¹Yésus nyauri marang wong-wong mau: “Mung ana penggawé siji sing Tak lakoni, nanging kowé kabèh pada nggumun.

²²Dadiné, Moses mréntah pernatan sunat marang kowé - sak temené pernatan sunat kuwi ora sangka Moses, nanging sangka para leluhur kita - lan ing dina sabat kowé ya pada nyunati wong.

²³Yèn wong disunati ing dina sabat, supaya angger-anggeré Moses aja nganti diterak, kenèng apa kowé pada panas atimu marang Aku, awit Aku maraské awak sekujur ing dina sabat?

²⁴Enggonmu ngadili aja miturut apa sing kétok, nanging ngukuma karo adil.”

²⁵Wong Yérusalèm pada ngomong: “Apa duduk wong kuwi sing diarah patiné?

²⁶Delengen, Panjenengané ngomong karo sak kepénaké waé tembungé, lan wong-wong ora pada nesoni apa-apa. Apa para pemimpin kita ya wis weruh yèn Panjenengané kuwi Kristus?

²⁷Nanging kanggo wong kuwi kita wis mengertèni tekané, nanging yèn Kristus kuwi teka, ora ana sing weruh tekané.”

²⁸Nalika Yésus mulangi ing Griya Sutyi, Panjenengané ngomong ngéné: “Pantyèn kowé pada kenal marang Aku, lan ya pada weruh asal-usul-Ku sangka ngendi; nanging teka-Ku ora sangka karep-Ku déwé. Aku diutus karo Panjenengané sing maha bener, sing kowé pada ora kenal.

²⁹Aku kenal Panjenengané, awit Aku teka sangka Panjenengané, lan ya Panjenengané kuwi sing ngutus Aku.”

³⁰Wong-wong mau pada ngarah nyekel Panjenengané, nanging ora ana sing nganti nggepok Panjenengané, awit durung tekan wantyiné.

³¹Nanging ing antarané wong okèh kuwi, okèh sing pada pertyaya marang Panjenengané lan tembungé: “Yèn Kristus teka, apa ya bakal nindakké mujijat luwih okèh tenimbang karo sing ditindakké karo Panjenengané iki?”

³²Para Farisi pada krungu yèn wong okèh pada grenengan kaya mengkono bab Panjenengané, mulané para pengarepé imam lan para Farisi terus pada kongkonan para tukang njaga Griya Sutyi dikongkon nyekel Panjenengané.

³³Yésus terus ngomong: “Mung kari waktu setitik enggon-Ku ing tengahmu, terus Aku bakal lunga marang sing ngutus Aku.

³⁴Kowé bakal pada nggolèki Aku, nanging ora bakal ketemu, awit kowé pada ora bisa teka ing ngendi Aku ana.”

³⁵Wong-wong Ju terus pada rerasanan: “Panjenengané kuwi arep lunga menyang ngendi, nganti kita pada ora bisa ketemu Panjenengané? Apa arep marani wong sing pada nglembara ing antarané wong Yunani, arep mulangi wong Yunani?

³⁶Apa tegesé tembung sing diutyapké: Kowé bakal pada nggolèki Aku, nanging ora bakal ketemu karo Aku, lan kowé ora bakal pada bisa teka ing ngendi Aku ana?”

³⁷Bareng dina pungkasan, ya kuwi nalika gedé-gedéné riyaya mau, Yésus ngadek lan ngomong: “Sapa sing ngelak, kuwi teka marang Aku lan ngombéa!

³⁸Sapa sing pertyaya marang Aku kuwi kaya tembungé kitab: ing atiné bakal mili ilèn-ilèn banyu urip!”

³⁹Sing dikarepké kuwi mau ya kuwi Roh, sing bakal ditampa karo wong-wong sing pada pertyaya marang Panjenengané; awit nalika semono Roh durung teka, awit Yésus durung dimulyakaké.

⁴⁰Ana wong ing antarané wong okèh kuwi sing pada krungu tembungé kuwi mau, terus pada ngomong: “Panjenengané kuwi tenan Nabi sing pada kita entèn-entèni.”

⁴¹Liyané pada ngomong: “Panjenengané kuwi Kristus.” Nanging sing liyané menèh ana sing ngomong: “Duduk, Kristus kuwi ora lair sangka Galiléa!

⁴²Awit miturut tembungé Kitab, Kristus kuwi mesti lair sangka turunané Daved.”

⁴³Sak nalika wong okèh pada tukaran bab Panjenengané.

⁴⁴Ana tunggalé sing pada arep nyekel Panjenengané, nanging ora ana sing nganti wani nggepok Panjenengané.

⁴⁵Wong jaga mau terus pada bali menyang ngarepé para pengarepé imam lan para Farisi lan diomongi: “Kena apa wongé kok ora kok gawa?”

⁴⁶Semauré wong-wong kuwi: “Durung naté ana wong sing omongan kaya wong kuwi!”

⁴⁷Semauré para Farisi marang para wong jaga mau: “Apa kowé ya wis pada disasarké?

⁴⁸Apa ing antarané para pemimpin lan ing antarané para Farisi ana sing pada pertyaya marang wong kuwi?

⁴⁹Nanging wong okèh kuwi pada ora dunung karo Torèt, pada kenaa karo bebendu.”

⁵⁰Nikodémus, salah sijiné wong tunggalé, sing mbiyèn tau nemoni Panjenengané, ngomong:

⁵¹“Apa angger-anggeré Torèt kita ngukum wong, sak durungé wong kuwi dipriksa lan dititèni tumindakké?”

⁵²Semauré wong-wong mau: “Apa Panjenengan ya wong Galiléa? Hayuk sampéyan mriksa Kitab, terus sampéyan bakal ngerti yèn ora ana nabi sing teka sangka Galiléa.”

⁵³[Wong-wong kuwi mau terus pada mulih pisah-pisahan.