Read Caribbean Javanese Yohanes 9 Bible Online

Yohanes 9 - Caribbean Javanese bible

Yohanes 9

¹Nalika Yésus liwat, Panjenengané weruh wong sing lamur wiwit lairé.

²Para muridé terus takon marang Panjenengané: “Rabbi, sapa sing nggawé dosa, wong kuwi déwé apa wong liyané, awit wiwit lairé lamur mengkéné?”

³Semauré Yésus: “Duduk wong iki lan ya duduk wong tuwané, nanging supaya penggawéané Gusti Allah dikétokké ing wong kuwi.

⁴Aku lan kowé kabèh kudu pada nindakké penggawéané Panjenengané sing ngutus Aku, pumpung ijik awan. Ana waktuné mbengi lan ora ana wong sing bisa nandangi penggawéan.

⁵Sak suwéné Aku ing ndonya, Aku iki pepadangé jagat.”

⁶Sakwisé ngomong mengkono kuwi, Panjenengané terus ngidu ing lemah, lan nggawé lendut nganggo idu-Né lan lemah mau, terus dilèlètké ing mripaté wong lamur kuwi.

⁷Panjenengané terus ngomong: “Lungaa, adusa menyang blumbang padusan ing Siloam.” Siloam tegesé: “Sing diutus”. Wong lamur kuwi terus budal lan adus; terus bali menèh lan wis bisa ndeleng.

⁸Nanging tangga-tanggané lan wong-wong sing mauné weruh enggoné ngemis terus pada ngomong: “Apa wong kuwi duduk sing tukang ngemis?”

⁹Ana sing nyauri: “Bener, ya kuwi wongé.” Ana menèh sing ngomong: “Duduk, mung mada rupa waé.” Wong kuwi déwé terus ngomong: “Bener, ya kula kuwi wongé.”

¹⁰Wong-wong terus pada takon: “Kepriyé mripatmu bisané melèk?”

¹¹Semauré: “Wong sing asmané Yésus nggawé lendut lemah, terus dilèlètké ing mripat kula; kula terus dikongkon: Lungaa menyang Siloam, adusa! Kula terus budal lan sakwisé adus terus bisa weruh iki.”

¹²Wong-wong mau takon menèh: “Wong kuwi saiki ana ngendi?” Semauré: “Kula ora ngerti.”

¹³Wong sing mauné lamur mau terus pada dituntun ngadep para Farisi.

¹⁴Lan enggoné Yésus nggawé lendut lemah lan melèkaké mripaté wong lamur mau pinuju dina sabat.

¹⁵Mulané, para Farisi terus takon marang wong mau, kepriyé bisané melèk. Semauré: “Panjenengané nglèlètké lendut lemah ing mripat kula, kula terus adus, saiki kula bisa weruh.”

¹⁶Sakwijiné para Farisi mau ana sing ngomong: “Wong kuwi ora sangka Gusti Allah, awit ora netepi pernatan dina sabat.” Liyané menèh ana sing ngomong: “Wong sing ngalami dosa kepriyé bisané gawé mujijat sing kaya mengkono kuwi?” Sak nalika pada tukaran.

¹⁷Para Farisi terus takon menèh marang wong sing mauné lamur kuwi: “Panemumu marang wong kuwi kepriyé, awit kowé sing dielèkaké mripatmu?” Tembungé sing ditakoni: “Panjenengané kuwi nabi.”

¹⁸Nanging wong-wong Ju pada ora ngandel yèn wong kuwi mauné lamur lan mentas waé bisa weruh, terus pada nyeluk wong tuwané,

¹⁹lan ditakoni: “Apa iki anakmu sing kok omongné yèn lamur wiwit lair? Yèn mengkono kepriyé saiki anakmu bisa weruh?”

²⁰Semauré wong tuwané mau: “Sing kita ngertèni, yèn kuwi anak kita, lan lamur wiwit lair,

²¹nanging kepriyé saiki bisa weruh, kita pada ora ngerti, lan sapa sing melèké mripaté, kita uga pada ora ngerti. Anak kita wis déwasa, sampéyan takoni piyambak, dèwèké bakal bisa ngomongké kahanané awaké déwé.”

²²Tembungé wong tuwané sing kaya mengkono kuwi awit pada wedi marang wong Ju, awit wong Ju wis pada setuju, yèn saben wong sing ngakoni Panjenengané kuwi Kristus, bakal ditundung sangka sinaguk.

²³Mulané wong tuwané mau ngomong: “Dèwèké wis déwasa, takon déwé.”

²⁴Wong-wong mau terus pada nyeluk sepisan menèh marang wong sing mauné lamur kuwi, lan dipituturi: “Kowé ngurmatana Gusti Allah; kita pada mengertèni yèn wong kuwi wong dosa.”

²⁵Semauré wong mau: “Wong kuwi apa wong dosa, kula ora ngerti; nanging siji perkara sing kula ngertèni, kula sak durungé lamur lan saiki bisa weruh.”

²⁶Pitakoné menèh: “Kowé dikapakké? Kepriyé enggoné melèkké mripatmu?”

²⁷Semauré wong mau: “Kula wis ngomong marang sampéyan lan sampéyan ora ngrungokké; kenèng apa sampéyan arep ngrungokké menèh? Apa sampéyan ya kepéngin dadi muridé?”

²⁸Wong mau terus dipisuhi, tembungé: “Kowé kuwi muridé, nanging kita iki murid-muridé Moses.

²⁹Kita pada mengertèni yèn Gusti Allah wis ngomongké tembungé marang Moses, nanging kanggo wong kaé kita pada ora weruh tekané.”

³⁰Wong mau terus nyauri: “Lah, kuwi apa ora anèh, awit sampéyan malah pada ora ngerti tekané, nanging Panjenengané wis melèké mripat kula.

³¹Kita pada ngerti, yèn Gusti Allah kuwi ora ngrungokké marang wong dosa, nanging ngrungokké wong-wong bener lan sing nandangi karepé.

³²Wiwit mbiyèn nganti saiki durung naté krungu yèn ana wong sing bisa melèkké mripat wong sing lamur wiwit lair.

³³Yèn wong kuwi ora sangka Gusti Allah, Panjenengané ora bisa nindakké apa-apa.”

³⁴Semauré wong-wong kuwi: “Kowé kuwi dilairké sak njeruhné dosa, kok arep mulangi kita?” Wong kuwi ditundung metu.

³⁵Yésus krungu yèn wong sing mauné lamur mau wis ditundung. Bareng Panjenengané nemoni wong mau terus diomongi: “Apa kowé pertyaya marang Putrané Manungsa?”

³⁶Semauré: “Panjenengané kuwi sapa, Gusti, supaya kula pertyaya marang Panjenengané?”

³⁷Tembungé Yésus: “Kowé ora mung weruh Panjenengané waé, nanging Panjenengané sing omongan karo kowé, ya kuwi Panjenengané.”

³⁸Semauré wong mau: “Kula pertyaya, Gusti.” Wong mau terus sujut marang Panjenengané.

³⁹Tembungé Yésus: “Tekaku ing jagat iki arep ngadili, supaya sapa sing ora weruh pada bisa weruh, lan sapa sing weruh pada dadia lamur.”

⁴⁰Tembungé kuwi dikrungu karo para Farisi sing ijik ing kono, wong-wong kuwi terus ngomong: “Kita iki apa ya pada lamur?”

⁴¹Yésus nyauri marang wong-wong mau: “Yèn kowé lamur, kowé pada ora nduwé dosa. Nanging awit kowé pada ngomong: Aku pada weruh, dadi tetep dosamu.”