Read Caribbean Javanese Para Rasul 1 Bible Online

Para Rasul 1 - Caribbean Javanese bible

Para Rasul 1

¹Téofilus, sing dihurmati, ing kitab kula sing kaping pisan, kula nyeritakké kabèh penggawéané lan piwulangé Yésus,

²nganti teka ing dina enggoné munggah menyang swarga. Sak durungé, Panjenengané wis ngekèki tembung lantaran Roh Sutyi marang para rasul sing dipilih.

³Bareng wis rampung enggoné ngalami sangsara, Panjenengané terus ngétok marang para rasul kuwi, lan karo tanda okèh ngekèki bukti, yèn Panjenengané urip. Awit nganti patang puluh dina suwéné enggoné bola-bali ngétok lan ngekèki tembung bab Kratoné Gusti Allah marang para rasul kuwi.

⁴Ing sakwijiné dina nalika Yésus mangan bebarengan karo para rasul, pada ora dililani ninggal Yérusalèm, lan pada dipréntahké tetep ing kono, ngentèni janjiné Bapak, sing ngéné tembungé: “Kowé wis pada krungu sangka Aku.

⁵Yohanes kuwi enggoné mbaptis nganggo banyu, nanging ora suwé menèh kowé bakal pada dibaptis karo Roh Sutyi.”

⁶Para rasul sing pada ngumpul kuwi terus njaluk ngerti: “Gusti, apa saiki Panjenengan arep mulihké kraton kanggo Israèl?”

⁷Yésus nyauri: “Kowé ora perlu weruh kapan lan wantyiné, sing ditentokké karo Bapak piyambak, miturut pangwasané.

⁸Nanging kowé bakal pada nampa pangwasa, yèn Roh Sutyi wis medun ing kowé kabèh, lan kowé bakal pada dadi seksi-seksi-Ku ing Yérusalèm lan ing Yudéa lan Samaria kabèh, lan tekan ing pungkasané bumi.”

⁹Sakwisé ngomong mengkono, Panjenengané terus diangkat menyang swarga, diseksèni karo para rasul, terus wis ora kétok, awit kaling-kalingan mendung.

¹⁰Nalika ijik pada ndangak menyang langit nyawang enggoné Panjenengané tekan kuwi, dadakan ana wong lanang loro ing sak tyedaké, pada nganggo jubah putih,

¹¹lan terus ngomongi ngéné: “Hé, wong-wong Galiléa, kenèng apa kowé pada ngadek ndangak menyang langit? Yésus, sing diangkat menyang swarga, ninggalké kowé kabèh iki, bakal teka menèh karo tyara kaya sing pada kok deleng nalika Panjenengané munggah menyang swarga.”

¹²Para rasul terus pada bali menyang Yérusalèm sangka gunung Saitun, sing sangka Yérusalèm adohé mung sak lakonan ing dina sabat.[1]

¹³Sak tekané ing kuta, terus pada munggah menyang kamar nduwur, sing dipondoki, ya kuwi: Pétrus lan Yohanes, Yakobus lan Andréas, Filipus lan Tomas, Bartoloméus lan Matius, Yakobus, anaké Alféus, lan Simon wong Sélot lan Yudas, anaké Yakobus.

¹⁴Kabèh pada bebarengan enggoné mempeng ing pandonga, bebarengan karo wong wadon liyané lan Maria, ibuné Yésus, lan para seduluré Yésus.

¹⁵Nalika semono Pétrus terus ngadek ing tengahé para sedulur tunggal pertyaya, sing ijik pada nglumpuk, tyatyahé 120 wong lan ngomong:

¹⁶“Hé, para sedulur, tembungé ing Kitab, sing diomongké karo Roh Sutyi lantaran Daved, kuwi kudu kedadian tenan, ya kuwi bab Yudas, sing dadi pemimpiné wong-wong sing nyekel Yésus.

¹⁷Mauné wong kuwi klebu ing golongan kita lan mèlu nindakké penggawéan ngladèni iki.”

¹⁸Yudas kuwi wis tuku lemah karo upahé alané, terus tiba mengkurep, wetengé bedah, nganti jeroané mbrodol kabèh.

¹⁹Bab kuwi wong Yérusalèm kabèh pada weruh, mulané lemah mau terus dijenengké nganggo basané wong-wong mau déwé: Hakal-Dama, tegesé Lemah Getih.

²⁰Awit ing kitab Masmur ketulis ngéné: ‘Panggonané dadia suwung, aja nganti ana sing ngenggèni.’ Lan: ‘Jagongané dijukuk karo wong liya.’

²¹Awit sangka kuwi anaa siji sing ditambahké marang kita sangka tunggalé wong-wong sing tansah kumpulan karo kita, nalika Gusti Yésus ijik bebarengan karo kita,

²²ya kuwi wiwit sangka pembaptisané Yohanes nganti tekan dina munggahé Yésus menyang swarga, ninggalké kita, supaya mèlu dadi seksi bab tanginé.”

²³Wong-wong terus ngusulké wong loro: Yosèf sing diarani Barsabas lan sing uga diarani Yustus lan Matias.

²⁴Kabèh terus pada ndedonga lan ngomong: “Duh, Gusti, Panjenengan sing weruh atiné kabèh wong, supaya gelem ngekèki pinuntun, wong loro kuwi endi sing Panjenengan pilih,

²⁵supaya nampani pangkat ngladèni, ya kuwi pangkat rasul, sing ditinggal karo Yudas, sing wis lunga marang panggonan sing sak mestiné kanggo wong mau.”

²⁶Terus pada dilotré lan sing kena Matias, mulané terus ditambahké marang para rasul sewelas.