Read Caribbean Javanese Para Rasul 11 Bible Online

Para Rasul 11 - Caribbean Javanese bible

Para Rasul 11

¹Para rasul lan sedulur-sedulur tunggal pertyaya ing Yudéa pada krungu, yèn bangsa kapir uga nampani tembungé Gusti Allah.

²Bareng Pétrus teka ing Yérusalèm wong-wong golongan sunat pada padudon karo piyambaké,

³tembungé: “Sampéyan wis mlebu ing omahé wong-wong sing ora sunat lan mangan bareng karo wong-wong kuwi.”

⁴Nanging Pétrus terus nerangké samubarang kabèh karo ketata, tembungé:

⁵“Kula ijik ndedonga ing kuta Yopé, dadakan roh kula dikwasani karo pangwasané Gusti Allah, kula terus weruh wahyu: ana barang sing ujut mori amba, nggantung ing pojokané papat didunaké sangka langit nganti teka ing ngarep kula.

⁶Bareng kula tamatké, kula weruh sak wernané kéwan ing njeruhné, kéwan sikil papat, kéwan alasan, kéwan mbrangkang lan manuk-manuk.

⁷Kula terus krungu swara sing ngomong marang kula: ‘Ngadeka, Pétrus, mbelèha lan mangana!’

⁸Nanging kula ngomong: ‘Ora, Gusti, awit durung naté ana barang sing haram utawa sing ora resik, sing mlebu ing tutuk kula.’

⁹Nanging swara sangka swarga iki terus ngomong marang kula sing kaping pindoné: ‘Apa sing diomongké karo Gusti Allah, yèn kuwi halal, aja kok arani haram!’

¹⁰Bab kuwi kedadian nganti kaping telu, kabèh mau banjur diangkat menèh menyang langit.

¹¹Sak nalika kuwi ana wong telu sing ngadek ing ngarepé omah, sing kula inepi; wong-wong iki kongkonan sangka Kaisaréa nemoni kula.

¹²Kula banjur diomongi karo Roh, ‘Lungaa bebarengan karo wong-wong kuwi lan aja mangga-mara!’ Sedulur enem iki mèlu. Bareng kula mlebu ing omahé wong mau,

¹³wong kuwi terus tyerita marang kita, enggoné weruh mulékat ngadek ing omahé lan ngomong marang dèwèké: ‘Ngongkona wong menyang Yopé metuk Simon sing dityeluk Pétrus.

¹⁴Kuwi bakal ngekèki kabar marang kowé, sing bakal nekakké keslametan kanggo kowé uga sak brayatmu kabèh.’

¹⁵Bareng kula wiwit omongan, wong-wong mau terus pada kedunan Roh Sutyi, pada kaya kita waktu mbiyèn.

¹⁶Kula banjur kèlingan marang tembungé Gusti: ‘Yohanes mbaptis nganggo banyu, nanging kowé kabèh bakal dibaptis karo Roh Sutyi.’

¹⁷Dadi yèn Gusti Allah ngekèki kawelasané marang wong-wong iki pada kaya marang kita nalika kita wiwit pertyaya marang Gusti Yésus Kristus, kepriyé anggèn kula bisa nulak karepé Gusti Allah?”

¹⁸Bareng krungu sing mengkono kuwi, pasamuan terus bisa nampani lan pada ngluhurké Gusti Allah, tembungé: “Dadiné Gusti Allah uga ngekèki mratobat marang bangsa kapir, supaya nampa urip anyar.”

¹⁹Awit sangka panganiaya sing kelakon sakwisé Stéfanus diukum pati, okèh sedulur tunggal pertyaya pada buyar nganti tekan Fénisia, Siprus lan Antiokia, nanging enggoné ngabaraké Injil mung marang wong Ju.

²⁰Nanging ana tunggalé wong Siprus lan wong Kiréne, sing teka ing Antiokia lan terus rerembukan karo wong-wong sing nggunakké basa Yunani lan ngabaraké Gusti Yésus.

²¹Tangané Gusti nunggal karo wong-wong mau, terus okèh sing pada dadi pertyaya lan mratobat marang Panjenengané.

²²Kabar bab wong-wong mau dikrungu karo pasamuan ing Yérusalèm; Barnabas terus diutus karo pasamuan menyang Antiokia.

²³Bareng wis teka kono lan weruh kawelasané Gusti Allah, Barnabas bungah. Lan ngekèki pitutur marang wong-wong mau, supaya pada tetep setia marang Gusti,

²⁴awit Barnabas kuwi apik atiné, kebak karo Roh Sutyi lan pertyaya. Banjur ana wong okèh sing pada ditambahké ing pasamuané Gusti.

²⁵Barnabas terus lunga menyang Tarsus nggolèki Saulus. Bareng wis ditemokké terus diajak menyang Antiokia,

²⁶lan pada bebarengan karo pasamuan nganti setaun suwéné, lan mulangi marang wong okèh. Ing Antiokia kono para murid wiwit pada disebut Kristen.

²⁷Nalika semono ana nabi[5] sing teka ing Antiokia sangka Yérusalèm.

²⁸Ana siji sing jenengé Agabus, ngadek lan awit sangka kwasané Roh ngomong, yèn ing sak ubengé jagat bakal katekan patyeklik gedé, sing ya kelakon nalika jamané Klaudius.

²⁹Para murid terus pada mutusi arep nglumpukké sumbangan miturut kekuwatané déwé-déwé, bakal dikirimké marang para sedulur tunggal pertyaya ing Yudéa.

³⁰Kuwi ya kelakon lan terus dikirimké marang para pinituwa lantaran Barnabas lan Saulus.