Read Caribbean Javanese Rum 10 Bible Online

Rum 10 - Caribbean Javanese bible

Rum 10

¹Para sedulur, sing dadi kepénginané atiku lan pandongaku marang Gusti Allah ya kuwi, supaya wong-wong mau pada dislametké.

²Awit aku nyeksèni, yèn pantyèn pada mempeng enggoné pada ngabekti marang Gusti Allah, nanging tanpa pangertèn sing bener.

³Awit, pada ora mangertèni marang penggawéané Gusti Allah sing mbenerké, lan nggolèki beneré déwé, mulané pada ora nyembah marang apa sing bener kanggo Gusti Allah.

⁴Awit Kristus kuwi sing dadi panggenepé anger-angeré Torèt, terus saben wong sing pertyaya terus dibeneraké.

⁵Awit Moses nulis apa sing bener miturut anger-angeré Torèt, ngéné: “Sapa sing nglakoni angger-angger, kuwi bakal urip awit sangka kuwi.”

⁶Nanging apa sing bener awit sangka pertyaya, kuwi uniné ngéné: “Aja mikir ing sak njeruhné atimu: Sapa ta sing bakal tekan menyang swarga?” Ya kuwi kanggo nggawa Kristus medun,

⁷utawa: “Sapa ta sing bakal medun menyang jurangé pati?” Ya kuwi: Kanggo ngunggahké Kristus sangka antarané wong mati.

⁸Nanging kepriyé uniné? Ngéné: “Tembungé Gusti kuwi tyedak karo kowé, ing tutukmu lan ing atimu.” Ya kuwi tembungé Gusti bab pertyaya, sing tak wartakké.

⁹Awit, yèn karo tutukmu kowé ngakoni yèn Yésus kuwi Gusti, lan atimu ngandel yèn Gusti Allah wis nangèkké Panjenengané sangka antarané wong mati, kowé bakal dislametké.

¹⁰Awit, karo ati wong enggoné pertyaya lan dibeneraké, lan karo tutuk wong enggoné ngakoni pertyayané lan dislametké.

¹¹Awit Kitab ndunungké, ngéné: “Sapa sing pertyaya marang Panjenengané, ora bakal kewirangan.”

¹²Awit wong Ju lan wong Yunani kuwi ora ana bédané. Awit, Gustiné wong kabèh, kuwi sejatiné pada, lan lubèr katrésnan marang saben wong sing pada nyebut marang Panjenengané.

¹³Awit: “sapa sing nyebut asmané Gusti bakal dislametké.”

¹⁴Nanging kepriyé wong bisa nyebut marang Panjenengané sing durung dipertyaya? Kepriyé wong bisa pertyaya marang Panjenengané, yèn durung tau krungu bab Panjenengané? Kepriyé wong bisa krungu bab Panjenengané yèn ora ana sing ngabaraké?

¹⁵Lan kepriyé wong bisa ngabaraké bab Panjenengané, yèn ora diutus? Kaya sing ketulis, tembungé: “Tenan enggoné nyenengké tekané wong sing pada nggawa kabar betyik.”

¹⁶Nanging ora saben wong pada nampani kabar betyik kuwi mau. Awit Yésaya ngomong, ngéné: “Duh Gusti, sapa sing arep pertyaya marang apa sing kita kabaraké?”

¹⁷Dadiné, pertyaya kuwi tukulé awit sangka krungu, lan krungu sangka tembungé Kristus.

¹⁸Nanging aku takon: Apa wong-wong kuwi ora pada krungu? Sejatiné wis pada krungu: “Swarané wong-wong sing ngabaraké wis sumrambah ing sak lumahé bumi. Lan pekabarané wis tekan ing pungkasané jagat.”

¹⁹Nanging aku takon menèh: Apa kira-kira Israèl ora mangertèni? Wiwitan ana tembungé Moses, ngéné: “Aku bakal ndadèkké mèriné marang wong-wong sing duduk umat, lan ndadèkké nesumu marang bangsa sing bodo.”

²⁰Lan karo kendel Yésaya ngomong: “Aku wis nglilani wong sing ora nggolèki Aku pada nemokké Aku. Aku wis ngétok marang wong-wong sing ora nakokké Aku.”

²¹Nanging kanggo Israèl tembungé, ngéné: “Sedina muput tangan-Ku ngelungké marang bangsa sing ora mbangun turut lan tukang mbantah.”