Read Caribbean Javanese Rum 13 Bible Online

Rum 13 - Caribbean Javanese bible

Rum 13

¹Saben wong manuta marang pemrintah sing nggawa pangwasa, awit ora ana pangwasa sing asalé ora sangka Gusti Allah; lan para pangwasa sing ana kuwi pada ditetepaké karo Gusti Allah.

²Mulané sapa sing mbruntak marang pemrintah, tegesé mbangkang marang pernatané Gusti Allah, lan sapa waé sing mbruntak, bakal nekakké paukuman kanggo awaké déwé.

³Awit sapa sing nandangi betyik, ora usah wedi marang pemrintah, mung yèn nglakoni penggawé ala waé. Apa kowé gelem urip tanpa wedi marang pemrintah? Nandangana apa sing betyik, nganti kowé bakal pada olèh pangalemé.

⁴Awit pemrintah kuwi abdiné Gusti Allah kanggo kabetyikanmu. Nanging yèn kowé nindakké sing ala, pantyèn ya kudu wedi, awit ora tanpa nggawé enggoné pemrintah kuwi nyekel pedang. Pemrintah kuwi abdiné Gusti Allah kanggo mbaleské bebenduné Gusti Allah kanggo sing pada nindakké ala.

⁵Mulané kita perlu pada manut, ora mung jalaran bebenduné Gusti Allah waé, nanging uga sangka obahé swarané ati kita.

⁶Ya awit sangka kuwi enggonmu pada mbayar pajek. Awit sing pada ngurusi kuwi mau pada dadi abdiné Gusti Allah.

⁷Mbayara marang wong kabèh apa waé sing kudu kok bayar. Pajek marang wong sing kwasa nampani pajek, bayaran marang wong sing kwasa nampani bayaran; ngelem marang wong sing pantes nampani pangaleman lan wong sing pantes nampani panghurmatan.

⁸Kowé aja pada nduwé utang apa-apa marang sapa waé, kejaba mung utang trésna-tinrésnan. Awit sapa sing nrésnani pepadané, kuwi wis netepi anger-angeré Torèt.

⁹Awit tembung: “Aja mlaku bédang, aja matèni, aja nyolong, aja mélék,” uga tembung liyané, wis ketyakup ing tembungé iki, ya kuwi: “Trésnaa marang sak pepadamu kaya marang awakmu déwé!”

¹⁰Katrésnan kuwi ora nindakké sing ala marang sak pepadané, mulané katrésnan kuwi nggenepi anger-angeré Torèt.

¹¹Perkara iki kudu kok tindakké, awit kowé mangertèni kahanané waktu saiki, ya kuwi wis tekan wantyiné kowé tangi sangka enggonmu turu. Awit saiki wantyi sing kanggo nylametké kita wis saya tyedak, tenimbang nalika kita dadi wong pertyaya.

¹²Wantyiné wis lingsir wengi, wis mèh ésuk. Mulané hayuk kita pada ngutyuli sak kabèhé penggawé sing peteng, lan nganggo gamané pepadang!

¹³Hayuk kita pada urip sing apik, kaya ing wantyi awan, aja pada nguja mangan lan mendem-mendeman; aja pada mlaku bédang lan ngumbar hawa-nepsuné; aja pada tukar padu lan mèri.

¹⁴Nanging pada kanggokna Gusti Yésus Kristus lan aja nuruti watek sing sipaté daging kanggo ngumbar kepénginané.