Read Caribbean Javanese Rum 2 Bible Online

Rum 2 - Caribbean Javanese bible

Rum 2

¹Mulané, hé manungsa, sapa waé sing ngadili wong liyané, kowé déwé ora nduwé dasar kanggo mbélani awakmu déwé awit karo kowé ngadili wong, kowé ngadili awakmu déwé, awit kowé sing ngadili wong kuwi, kelakuanmu déwé ya mengkono.

²Kita pada mengertèni yèn paukumané Gusti Allah kuwi mlakuné karo adil ing atasé sapa waé sing nglakoni mengkono.

³Nanging kowé, hé manungsa sing ngadili wong sing nandangi mengkono mau, nanging kowé déwé uga nglakoni, apa kowé ngira, yèn kowé bakal utyul sangka paukumané Gusti Allah?

⁴Apa kowé arep ngrèmèhké lubèré kawelasan lan kesabarané Gusti Allah? Apa kowé ora mengertèni yèn kawelasané Gusti Allah kuwi nuntun kowé marang mratobat?

⁵Nanging sangka wangkoté atimu sing ora gelem mratobat kuwi, dadiné kowé numpuk bebendu kanggo awakmu déwé, nganti tekan ing dinané ditibakké bebendu lan paukumané Gusti Allah sing adil,

⁶Panjenengané bakal mbales marang saben wong miturut penggawéané,

⁷ya kuwi urip langgeng kanggo wong sing sregep nglakoni penggawé betyik, tansah nggolèki kamulyan lan kaluhuran lan perkara sing ora bisa entèk,

⁸nanging wong sing nguber kepentingané déwé, ora mbangun turut marang apa sing bener, rumaket karo duraka, kuwi bakal pada nampani nesu-Né lan bebendu-Né.

⁹Kasusahan lan kasangsarané bakal nekani marang saben wong sing nindakké sing ala, wiwitan wong Ju, semono uga wong Yunani,

¹⁰nanging kamulyan, kaluhuran lan katentreman bakal dikèkké marang wong kabèh sing nindakké kabetyikan, wiwitan wong Ju, mengkono uga wong Yunani.

¹¹Awit Gusti Allah ora pilih-sih.

¹²Awit sak kabèhé wong sing nggawé dosa tanpa angger-anggeré Torèt kuwi bakal pada entèk ya tanpa angger-anggeré Torèt; lan sak kabèhé wong sing nggawé dosa ing sak njeruhné angger-anggeré Torèt, kuwi bakal pada diadili perkarané karo angger-anggeré Torèt.

¹³Awit wong sing bener ing ngarepé Gusti Allah kuwi duduk sing ngrungokké angger-anggeré Torèt, nanging sing netepi angger-anggeré Torèt.

¹⁴Yèn bangsa-bangsa kapir sing ora pada nduwèni angger-anggeré Torèt awit sangka batiné nglakoni apa sing ketulis ing angger-anggeré Torèt, ya wong-wong kuwi mau sing dadi angger-anggeré Torèt kanggo awaké déwé, senajan ora pada nduwèni angger-anggeré Torèt.

¹⁵Mengkono kuwi, wong-wong mau pada mbuktèkké, yèn pepakoné angger-angger wis ketulis ing atiné lan swarané atiné mèlu nyeksèni lan angen-angené pada gentèn nyalahké utawa gentèn mbenerké.

¹⁶Bab kuwi bakal ketara ing dina yèn Gusti Allah lantaran Kristus Yésus ngadili manungsa, tyotyok karo Injil sing tak wartakké.

¹⁷Nanging yèn kowé kuwi nyebut awakmu déwé wong Ju, lan ngendelké marang angger-anggeré Torèt, uga nggedèkké Gusti Allah,

¹⁸lan mengertèni sing dadi karepé awit diwulangi karo angger-anggeré Torèt, bisa mbédakké endi sing betyik lan endi sing ala,

¹⁹yèn kowé yakin kowé kuwi dadi pinuntuné wong lamur, lan pepadangé wong ing pepeteng,

²⁰panggulawentahé wong bodo, guruné wong sing durung déwasa; awit ing angger-anggeré Torèt kuwi, kowé kanggonan wujudé kaweruh lan kabeneran.

²¹Terus kepriyé kanggo kowé, sing mulangi wong liyané, apa kowé ora mulangi awakmu déwé? Kowé sing mulangi: “Aja nyolong,” kenèng apa kowé déwé kok nyolong?

²²Kowé sing omong: Aja mlaku bédang, kenèng apa kowé déwé kok mlaku bédang? Kowé sing geting marang brahala, kenèng apa kowé déwé kok malah ngrampasi omah brahala?

²³Kowé sing nggedèkké angger-anggeré Torèt, kenèng apa kowé kok malah ora ngajèni Gusti Allah karo nerak angger-anggeré Torèt kuwi?

²⁴Kaya sing ketulis, tembungé: “Ya awit sangka kowé, jenengé Gusti Allah dadi tyatyatan ing antarané bangsa-bangsa liya.”

²⁵Sunat kuwi pantyèn ana paédahé, yèn kowé temen-temen netepi angger-anggeré Torèt, nanging yèn kowé nerak angger-anggeré Torèt, sunatmu kuwi ora ana gunané menèh.

²⁶Dadi yèn wong sing ora sunat netepi angger-anggeré Torèt, apa kuwi ora bakal dianggep pada karo wong sing wis sunat?

²⁷Yèn mengkono, wong sing ora sunat nanging netepi angger-anggeré Torèt, kuwi bakal ngadili kowé sing nduwèni angger-angger sing ketulis lan sunat, nanging nerak angger-anggeré Torèt.

²⁸Awit sing diarani Ju kuwi duduk tata lairé, lan sing diarani sunat sing sejati kuwi uga duduk sunat ing tata lairé.

²⁹Nanging sing diarani wong Ju sejati kuwi ya kuwi sing ora kétok Juné, lan sunat sing sejati kuwi sunat ati ya kuwi pernatan kasukman, duduk sing kétok njaba. Lan kuwi olèh pamuji sangka Gusti Allah, duduk sangka manungsa.