Read Caribbean Javanese Rum 9 Bible Online

Rum 9 - Caribbean Javanese bible

Rum 9

¹Aku ngomongké apa sing bener ing Kristus, aku ora goroh. Awit swarané atiku mèlu nyeksèni awit Roh Sutyi,

²yèn aku ngalami kasusahan banget lan tansah sedih.

³Malah aku saguh nampani bebendu, lan pisah sangka Kristus awit para sedulurku, golongané bangsaku sak tyara daging.

⁴Awit wong-wong kabèh kuwi wong Israèl sing wis diangkat dadi anak lan wis dikèki kamulyan lan perjanjian-perjanjian lan anger-angeré Torèt, uga pangibadah lan janji-janji.

⁵Wong-wong kuwi pada tyedak turunané para bapak leluhur, sing sak tyara kedagingan nurunké Kristus, sing ngungkuli samubarang kabèh. Panjenengané kuwi Gusti Allah sing kudu dipuji-puji ing sak lawas-lawasé. Amin.

⁶Nanging tembungé Gusti Allah kuwi mokal yèn ta nganti gagal. Awit ora kabèh wong sing asalé sangka Israèl kuwi wong Israèl,

⁷lan ya ora kabèh sing ijik kegolong anaké Abraham kuwi tyedak turunané Abraham sing sejati, nanging: “Sing asalé sangka Isak kuwi sing bakal disebut turunanmu.”

⁸Tegesé: Duduk anak-anak sing tyara kedagingan sing dadi para anaké Gusti Allah, nanging para anak perjanjiané sing diitung dadi turunan sing sah.

⁹Awit tembungé kuwi isi perjanjian, ngéné: “Ing pendaké waktu iki Aku bakal teka, lan Sara bakal nduwé anak lanang.”

¹⁰Malah ora mung kuwi waé. Sing luwih tyeta menèh ya kuwi Ribka sing mbobot sangka wong lanang siji, ya kuwi Isak, bapak leluhur kita.

¹¹Awit nalika bayi-bayi mau durung pada lair, lan durung nglakoni penggawé betyik utawa ala, supaya rantyamané Gusti Allah bab pilihané tetepa, ora karo penggawé nanging karo dasar panggilan-Né

¹²diomongké marang Ribka, ngéné: “Sing tuwa bakal ngabdi marang sing nom,”

¹³ya kaya sing ketulis, tembungé: “Yakub tak trésnani, nanging Esau tak sengiti.”

¹⁴Yèn mengkono, apa sing bakal kita omongaké? Apa Gusti Allah ora adil? Mokal!

¹⁵Awit Panjenengané wis ngomong marang Moses, ngéné: “Aku bakal mbetyiki marang sapa waé sing Tak karepaké Tak betyiki, lan Aku bakal ngekèki kawelasan marang sapa waé sing Tak karepaké Tak wènèhi kawelasan.”

¹⁶Dadi bab kuwi ora gumantung marang karepé wong utawa réka-dayané wong, nanging gumantung marang kabetyikané Gusti Allah.

¹⁷Awit ing Kitab ana tembung marang Parao, ngéné: “Ya mengkono kuwi sebabé enggon-Ku ngangkat kowé, ya kuwi supaya Aku bisa ngétokké pangwasa-Ku ing kowé, lan asma-Ku supaya kasuwurna ing sak lumahé bumi.”

¹⁸Dadi Panjenengané ngekèki kawelasan marang sapa waé sing dikarepké, lan Panjenengané mangkotké sapa waé sing dikarepké.

¹⁹Saiki kowé arep ngomong marang aku: “Yèn mengkono, apa menèh sing ijik dianggep salah karo Panjenengané? Awit sapa sing bisa nglawan karepé Gusti?”

²⁰Nanging, hé manungsa, kowé kuwi sapa ta nanging kok nesoni Gusti Allah? Apa ya bisa ta, sing digawé ngomong marang sing nggawé, ngéné: “Kenèng apa nanging enggonmu nggawé aku kok kaya ngéné?”

²¹Apa tukang kendi kuwi ora nduwé wewenangé kanggo lempungé; sangka prongkolan sing pada, sak pérangan digawé barang sing mulya, sak pérangan digawé barang liyané sing lumrah?

²²Dadiné, yèn kanggo ngétokké bebendu lan ngétokké pangwasané, Gusti Allah ngekèki kesabaran sing gedé marang barang-barang bebendu, sing wis dityawiské kanggo karusakan,

²³nanging kuwi malah kanggo ngétokké enggoné sugihé kamulyan marang barang-barang katrésnan-Né, sing wis dityawiské marang kamulyan-Né?

²⁴Ya kuwi kita, sing wis pada dipanggil, ora mung sangka antarané wong Ju waé, nanging uga sangka antarané bangsa kapir,

²⁵kaya sing wis diomongké uga ing kitab Hoséa, tembungé: “Sing duduk umat-Ku bakal tak sebut umat-Ku, lan sing duduk katrésnan, kuwi tak sebut katrésnan.”

²⁶Lan ing panggonan sing wong-wongé diomongi, “Kowé kuwi duduk umat-Ku,” ing kono wong-wong mau bakal diomongi, “Para anaké Gusti Allah sing urip.”

²⁷Lan Yésaya mbengok kanggo Israèl, ngéné: “Senajan turunané Israèl kuwi tyatyahé kaya wediné segara, nanging mung karèné waé sing bakal dislametké.

²⁸Awit apa sing wis diomongké, bakal terus ditindakké karo Gusti ing bumi, karo sampurna lan endang waé.”

²⁹Kaya sing sak durungé wis dinubuatké karo Yésaya, ngéné, “Yèn Gusti sing ngwasani langit lan bumi ora ninggalaké turunan marang kita, kita wis dadi kaya Sodom lan pada kaya Gomora.”

³⁰Yèn mengkono, apa sing bakal kita omongaké? Sak temené: Bangsa kapir sing pada ora nggolèki apa sing bener, wis pada dibeneraké, ya kuwi dibeneraké awit sangka pertyaya.

³¹Nanging: Bangsa Israèl senajan nggolèki apa sing bener lantaran angger-angger, ora bisa netepi angger-angger mau.

³²Kenèng apa kok ora? Awit bangsa Israèl enggoné ngupaya ora karo pertyaya, nanging karo penggawé. Bangsa kuwi pada kesandung ing watu sandungan,

³³kaya sing ketulis, tembungé: “Ing Sion Aku sèlèhi watu sandungan lan watu gedé sing njalari wong tiba, lan sapa sing pertyaya marang Panjenengané, ora bakal kewirangan.”