Read Caribbean Javanese 1 Korintus 1 Bible Online

1 Korintus 1 - Caribbean Javanese bible

1 Korintus 1

¹Sangka Paulus, sing dipanggil dadi rasulé Kristus Yésus, awit sangka karepé Gusti Allah, lan sangka Sosténes, sedulur kita tunggal pertyaya.

²Marang pasamuané Gusti Allah ing Korintus, ya kuwi para sing disutyèkké ing Kristus Yésus, lan sing pada dityeluk dadi wong sutyi, uga sak kabèhé wong sing pada nyebut asmané Gusti kita Yésus Kristus, ya kuwi Gustiné wong-wong mau lan ya Gusti kita.

³Kawelasan lan katentreman sangka Gusti Allah, Bapak kita, lan sangka Gusti Yésus Kristus, anaa ing kowé kabèh.

⁴Aku tansah maturkesuwun marang Gusti Allahku awit kowé kabèh, jalaran sangka kawelasané Gusti Allah sing dikèkké marang kowé ing Kristus Yésus.

⁵Awit ing Panjenengané, kowé wis pada dadi sugih ing samubarang, ya sak rupané tetembungan lan kabèh kaweruh,

⁶tyotyok karo paseksi bab Kristus, sing wis disantosakké ing tengahmu.

⁷Terus kowé pada ora kekurangan ing bab kabèh berkah, sak njeruhné kowé pada ngentèn-entèni ngétokké Gusti kita Yésus Kristus.

⁸Panjenengané ya bakal nyantosakké kowé nganti tekan ing pungkasan, nganti kowé pada tanpa tyiri mbésuk ing dinané Gusti kita Yésus Kristus.

⁹Gusti Allah, sing wis manggil kowé marang kumpulan karo Putrané Yésus Kristus, Gusti kita, kuwi setia tuhu.

¹⁰Nanging penjalukku karo temen marang kowé kabèh, para sedulur, awit sangka asmané Gusti kita Yésus Kristus, kowé kabèh padaa dadi siji lan aja nganti tukaran ing tengahmu; nanging kowé padaa bebarengan, tunggal pikiran lan tunggal pangrasa.

¹¹Awit, para sedulurku, aku wis dikabari karo wong-wong sangka brayaté Kloé bab kowé kabèh, yèn ing tengahmu ana tukaran.

¹²Sing tak karepké ya kuwi siji-sijiné tunggalmu ngomong: Aku iki golongané Paulus! Aku golongané Apolos! Aku golongané Kéfas! Utawa aku golongané Kristus!

¹³Apa Kristus kuwi dibagi-bagi? Apa Paulus kuwi dipentèng awit sangka kowé? Utawa apa kowé pada dibaptis ing jenengé Paulus?

¹⁴Aku maturkesuwun awit siji waé sangka tengahmu ora ana sing tak baptis kejaba Krispus lan Gayus,

¹⁵terus ora ana wong sing bisa ngomong yèn kowé pada dibaptis ing jenengku.

¹⁶Aku ya mbaptis brayaté Stéfanas. Kejaba kuwi aku ora kèlingan, apa ijik ana wong liyané menèh sing tak baptis.

¹⁷Awit Kristus enggoné ngutus aku kuwi ora supaya mbaptis, nanging supaya ngabaraké Injil, lan bab kuwi ora nganggo kawityaksanané tembung, supaya salipé Kristus aja nganti tanpa guna.

¹⁸Awit kabar bab salip kuwi pantyèn dianggep bodo kanggo wong sing bakal pada mati, nanging kanggo kita sing pada dislametké, kabar kuwi kekuwatané Gusti Allah.

¹⁹Awit ana tulisan ngéné: “Aku bakal nglebur kawityaksanané para wong wityaksana, lan kepinterané para wong pinter bakal Tak sirnakké.”

²⁰Ing ngendi wong sing wityaksana? Ing ngendi juru Torèt? Ing ngendi tukang mbantah ing jaman iki? Gusti Allah apa ora wis ndadèkké kawityaksanané jagat iki dadi bodo?

²¹Awit sak njeruhné kawityaksanané Gusti Allah jagat ora kenal marang Panjenengané karo kawityaksanané, mulané wis dadi karepé Gusti Allah nylametaké marang wong sing pada pertyaya awit sangka kabar Injil sing dianggep bodo.

²²Wong Ju pada ngupaya tanda, lan wong Yunani pada nggolèki kawityaksanan,

²³nanging aku pada ngabaraké Kristus sing dipentèng: Kanggo wong Ju dadi sandungan lan kanggo wong kapir dianggep bodo,

²⁴nanging kanggo para sing dipanggil, embuh wong Ju, embuh wong sing duduk Ju, Kristus kuwi dadi kekuwatané Gusti Allah lan kawityaksanané Gusti Allah.

²⁵Awit apa sing dianggep bodoné Gusti Allah kuwi luwih wityaksana tenimbang karo manungsa, lan keringkihané Gusti Allah kuwi luwih rosa tenimbang manungsa.

²⁶Pada ngélingana waé, para sedulur, kepriyé kahananmu nalikané kowé pada dipanggil, miturut ukurané manungsa ora okèh sing klebu wong wityaksana, ora okèh wong sing klebu gedé wibawané, ora okèh sing klebu wong luhur.

²⁷Nanging sing dianggep bodo kanggo jagat, dipilih karo Gusti Allah kanggo ngisinké para wong wityaksana, uga sing dianggep ringkih kanggo jagat, dipilih karo Gusti Allah kanggo ngisinké sing rosa,

²⁸lan sing asor lan ala kanggo jagat, kuwi dipilih karo Gusti Allah, malah sing ora ana ajiné dipilih karo Gusti Allah kanggo ngilangké sing aji,

²⁹supaya aja ana manungsa siji waé sing gemunggung ing ngarepé Gusti Allah.

³⁰Nanging awit sangka Panjenengané, kowé wis pada ing Kristus Yésus sing sangka Gusti Allah wis dadi kawityaksanan kanggo kita. Panjenengané wis mbenerké, nyutyèkké lan nebus kita,

³¹mulané kaya sing ketulis, tembungé: “Sapa sing gemunggung, kuwi gemunggunga ing Gusti.”