Read Caribbean Javanese 1 Korintus 16 Bible Online

1 Korintus 16 - Caribbean Javanese bible

1 Korintus 16

¹Bab nglumpukké duwit sing tumuju marang para sutyi, kuwi pada tindakna miturut pituduh-pituduh sing wis tak wènèhaké marang pasamuan-pasamuan ing Galatia.

²Ing dina kaping pisan ing saben minggu, saben wong tunggalmu — karo apa sing pada kok tampa — pada nyisihna sak bagéan lan simpenen ing omah, supaya enggonmu pada nglumpukké kuwi aja nganti kok tindakké yèn aku teka.

³Nanging mbésuk sak tekané aku, aku arep kongkonan wong-wong sing kok delok betyik tak kongkon ngeterké pisungsungmu menyang Yérusalèm, dibarengi layang.

⁴Yèn perlu aku ya mèlu budal, wong kuwi mau bakal pada budal bareng karo aku.

⁵Nanging enggonku bakal nekani kowé, mbésuk sakwisé aku liwat ngliwati Makédonia, awit mlakuku metu Makédonia.

⁶Bisa uga ing Korintus aku bakal dadi siji karo kowé nganti sak untara suwé, utawa mbok menawa ing sak njeruhné waktu bediding, nganti kowé pada bisa ngekèki pitulungan ing bab enggonku nerusaké mlakuku.

⁷Awit karepku sepisan iki ora mung sak klélapan waé enggonku bakal niliki kowé, malah yèn Gusti nglilani enggonku dadi siji karo kowé kuwi bisa nganti rodok suwé.

⁸Nanging aku bakal lèrèn ing Efésus nganti riyaya Pantékosta.

⁹Awit ing kono, kelunggaran kanggo aku, kanggo nindakké penggawéan sing gedé lan penting, senajan okèh wong sing pada nglawan.

¹⁰Nanging yèn Timotius teka, pada ngupayaa supaya ing tengahmu kuwi aja nduwé rasa wedi, awit wong kuwi nglakoni penggawéan Gusti pada kaya aku.

¹¹Mulané aja nganti ana wong sing nyepèlèkké! Malah wènèhana pitulungan, supaya bisané nerusaké mlakuné karo slamet, supaya bali nemoni aku, awit tak entèn-entèni tekané karo para sedulur tunggal pertyaya liyané.

¹²Nanging kanggo sedulur Apolos, enggonku nyuwun wis bola-bali supaya niliki kowé bareng karo para sedulur tunggal pertyaya liyané, nanging durung dadi karepé nglakoni ing waktu saiki. Kabèh arep teka mengko yèn wis ana waktu sing betyik.

¹³Pada melèka! Pada sing kentyeng ing pengandel! Dadia wong lanang, sing kendel lan kuwat!

¹⁴Sak kabèhé penggawéanmu lakonana karo katrésnan.

¹⁵Ana menèh penjalukku marang kowé, para sedulur. Kowé pada weruh yèn Stéfanas sak brayaté kuwi sing wiwitan pada mratobat ing Akaya lan wis pada ngabdi marang peladènan kanggo para sutyi.

¹⁶Mulané pada manuta marang wong sing kaya mengkono kuwi lan saben wong sing mèlu nandangi ing nggawé lan pada nglakoni rekasa.

¹⁷Aku bungah awit sangka tekané Stéfanas, Fortunatus lan Akaikus, awit wong-wong kuwi pada kanggo gantimu;

¹⁸awit para sedulur kuwi pada nggawé segeré atiku lan atimu. Mulané pada ngajènana wong sing kaya mengkono kuwi.

¹⁹Salam keslametan kanggo kowé kabèh, sangka sak kabèhé pasamuan ing Asia Tyilik. Akwila, Priskila uga pasamuan ing omahé pada kirim salam keslametan sak njeruhné Gusti lubèr-lubèr marang kowé.

²⁰Sedulur tunggal pertyaya kabèh pada kirim salam keslametan marang kowé. Pada salam-salamana karo ambungan sutyi.

²¹Karo tanganku déwé, enggonku nulis iki: Salam keslametan sangka Paulus.

²²Sapa sing ora trésna marang Gusti, kuwi kenaa ing bebendu. Maranata!

²³Kawelasané Gusti Yésus, nunggal ing kowé kabèh.

²⁴Trésnaku anaa ing kowé kabèh sak njeruhné Kristus Yésus.