Read Caribbean Javanese 1 Korintus 2 Bible Online

1 Korintus 2 - Caribbean Javanese bible

1 Korintus 2

¹Mengkono uga nalikané aku nemoni kowé, para sedulur, tekaku ora karo tembung sing muluk-muluk utawa nganggo kawityaksanan sing luhur enggonku nglantarké wewadiné Gusti Allah marang kowé.

²Awit aku wis mutuské yèn ora nduwé karep weruh apa-apa ing tengahmu kejaba Yésus Kristus, ya kuwi Panjenengané sing dipentèng.

³Lan menèh tekaku nemoni kowé kuwi karo ringkih lan wedi banget nganti gemeter.

⁴Enggonku guneman utawa enggonku ngabaraké ora nganggo tembung-tembungé kawityaksanan sing ngyakinaké, nanging karo buktiné kekuwatané Roh,

⁵supaya pertyayamu aja gumantung marang kawityaksanané manungsa, nanging kekuwatané Gusti Allah.

⁶Senajan mengkono aku ngomongké kawityaksanan ing golongané wong sing wis pada mateng, nanging duduk kawityaksanané jagat iki, lan duduk kawityaksanané para pangwasané jagat iki, ya kuwi pangwasa sing bakal diilangaké.

⁷Nanging sing pada tak wartakké kuwi kawityaksanané Gusti Allah sing kesimpen lan ora dingertèni, sing wis dityawiské karo Gusti Allah ing sak durungé jagat digawé, kanggo kamulyan kita.

⁸Lan pangwasané jagat iki ora ana sing weruh kawityaksanan iki, awit yèn pada weruh mesti ora nganti pada nyalip Gusti sing Mahaluhur.

⁹Nanging kaya sing ketulis, tembungé: “Sing ora tau dideleng karo mripat, lan ora tau krungu karo kuping, lan sing ora tau tukul ing atiné manungsa, wis dityawiské karo Gusti Allah, kuwi kabèh kanggo para sing pada nrésnani Panjenengané.”

¹⁰Awit Gusti Allah wis ngomongké bab kuwi marang kita karo Roh, awit Roh kuwi nliti samubarang kabèh, uga bab sing kesimpen karo Gusti Allah.

¹¹Awit sapa ta ing antarané manungsa sing bisa weruh apa sing ketemu ing atiné, kejaba mung rohé manungsa kuwi déwé ing atiné? Mengkono uga ora ana wong sing weruh apa sing manggon ing Gusti Allah kejaba Rohé Gusti Allah.

¹²Kita ora nampani rohé jagat, nanging Roh sing asalé sangka Gusti Allah, supaya kita pada bisa weruh apa sing dadi pawèhé Gusti Allah marang kita.

¹³Lan kita pada ngekèki katerangan bab kasukman marang wong-wong kasukman, enggon kita ngomongké bab kawelasané Gusti Allah kuwi nganggo tetembungan sing ora diwulangké marang kita awit kawityaksanané manungsa, nanging awit Roh.

¹⁴Nanging manungsa kadonyan ora nampani apa sing asalé sangka Rohé Gusti Allah, awit bab kuwi kanggo wong mau dianggep bodo; lan wong kuwi ora bisa ngerti, awit bab mau mung bisa digagas sak tyara kasukman.

¹⁵Nanging wong kasukman kuwi mriksa samubarang kabèh, nanging awaké déwé ora dipriksa karo liyané.

¹⁶Awit: “Sapa ta sing weruh pikirané Gusti, nganti bisa ngekèki rembukan marang Panjenengané?” Nanging kita pada kanggonan pikirané Kristus.