Read Caribbean Javanese 1 Korintus 5 Bible Online

1 Korintus 5 - Caribbean Javanese bible

1 Korintus 5

¹Pantyèn wis krungu, yèn ing tengahmu ana sing mlaku bédang, malah enggoné mlaku bédang mau, tyarané ora tau kelakon ing antarané para bangsa kapir, ya kuwi ana wong sing ngepèk bojoné bapaké.

²Nanging kowé kok pada gemunggung. Apa ora luwih betyik kowé pada priatén, terus nyingkirké wong sing nduwé penggawé mengkono sangka tengahmu?

³Awit aku, senajan ing sak tyara badan adoh, nanging sak tyara kasukman adu-arep, lan karo tyara sing mengkono, kaya aku wis mulangi paukuman marang wong sing nglakoni mengkono kuwi.

⁴Yèn kowé pada kumpul ing asmané Gusti Yésus, lan aku uga nunggal sak njeruhné Roh, karo pangwasané Yésus, Gusti kita,

⁵wong kuwi kudu dipasrahké marang sétan, terus dagingé rusak, supaya kasukmané dislametké mbésuk ing dinané Gusti.

⁶Ora betyik gumunggungmu kuwi. Apa kowé pada ora weruh, yèn ragi setitik kuwi mrasuk ing jladrèn kabèh?

⁷Buwangen ragi sing lawas kuwi, supaya kowé pada dadi jladrèn sing anyar, awit kowé pantyèn tanpa ragi. Awit tyempé Paskah kita uga wis dibelèh, ya kuwi Kristus.

⁸Mulané hayuk kita pada pésta, ora nganggo ragi sing lawas, ragi sing ala utawa duraka, nanging nganggo roti sing tanpa ragi, ya kuwi sing murni lan kabeneran.

⁹Aku wis nulis ing layangku marang kowé, supaya kowé aja srawungan karo wong sing pada mlaku bédang.

¹⁰Sing tak karepké kuwi ora karo sak kabèhé wong sing mlaku bédang ing jagat iki, utawa karo wong kabèh sing srakah lan tukang ngrayah, utawa wong kabèh sing pada nyembah brahala, awit yèn ta ngono kowé mesti kudu pada metu sangka jagat iki.

¹¹Nanging, enggonku nulis marang kowé kuwi ngéné: kowé aja nganti srawungan karo wong, sing senajan wong mau ngaku sedulur tunggal pertyaya, nyatané mlaku bédang, srakah, nyembah brahala, kulina mitenah, seneng mendem-mendeman utawa tukang ngrayah; kowé aja pisan-pisan mangan bebarengan karo wong sing kaya mengkono kuwi.

¹²Awit kanggo apa aku pada ngadili wong-wong sing ana sak njabané pasamuan? Wong-wong ing sak njeruhné pasamuan kuwi apa ora sing kuduné kok adili?

¹³Para wong sing pada ing sak njabané pasamuan, kuwi bakal diadili karo Gusti Allah. Wong sing pada nibakké sing ala kuwi tundungen sangka tengah-tengahmu.