Read Caribbean Javanese 1 Korintus 6 Bible Online

1 Korintus 6 - Caribbean Javanese bible

1 Korintus 6

¹Apa ana wong ing tengahmu sing tukaran karo pada sedulur, wani nggolèk keadilan marang wong sing pada ora pertyaya, ora marang para sutyi?

²Utawa apa kowé pada ora weruh, yèn para sutyi bakal ngadili jagat? Lan yèn pengadilané jagat kuwi ing tanganmu, apa kowé ora saguh ngrampungké perkara-perkara sing sepélé waé?

³Apa kowé pada ora weruh, yèn kita bakal ngadili para mulékat? Apa menèh perkara-perkara urip sedina-dina.

⁴Senajan mengkono yèn kowé arep ngurus perkara-perkara urip sedina-dina, apa terus kok pasrahaké marang wong sing ora kepitung ing pasamuan?

⁵Bab iki tak omongké, supaya kowé pada rumangsa isin. Apa siji waé ora ana ta ing tengahmu sing wityaksana, sing bisa ngrampungké perkarané para seduluré sing tunggal pertyaya?

⁶Apa sedulur sing tukaran karo sedulur liyané, malah nggolèk keadilan marang wong-wong sing ora pertyaya?

⁷Bab anané perkara sing tukul ing tengahmu kuwi waé, wis mbuktèkké kekalahanmu. Kenèng apa kowé ora luwih betyik ngalami sangsara awit digawé sak wenang-wenang? Kenèng apa kowé ora luwih betyik ngalami rugi?

⁸Nanging kowé déwé malah pada nandangi sak wenang-wenang lan pada nggawé rugi karo ngapusi, lan kuwi malah kok tindakké marang para sedulurmu tunggal pertyaya.

⁹Utawa kowé pada ora weruh, yèn wong sing pada ora adil kuwi bakal ora nampa warisan Kratoné Gusti Allah? Aja pada kesasar. Wong sing mlaku bédang, nyembah brahala, seneng mlaku bédang, wong lanang sing kewirangané karo pada lanang, lan wong-wong mau,

¹⁰sing nyolong, srakah, seneng mendem-mendeman, tukang mitenah lan tukang ngrayah, kuwi ora bakal nampa warisan Kratoné Gusti Allah.

¹¹Sakwijiné tunggalmu mbiyèn ya kaya mengkono kuwi, nanging kowé wis pada masrahké awakmu supaya diresiki, kowé wis pada disutyèkké, wis pada dibeneraké ing jenengé Gusti Yésus Kristus lan ing Rohé Gusti Allah kita.

¹²“Samubarang éntuk tak lakoni”, nanging ora samubarang maédahi. Samubarang éntuk tak lakoni, nanging awakku tak jaga aja nganti dikwasani karo apa waé.

¹³Pangan kuwi kanggo weteng, lan weteng kanggo pangan: nanging loro-loroné bakal dilebur karo Gusti Allah. Awak kuwi ora kanggo mlaku bédang, nanging kanggo Gusti lan Gusti kanggo awak.

¹⁴Gusti Allah wis nangèkké Gusti; kita ya bakal ditangèkké awit sangka pangwasané.

¹⁵Apa kowé pada ora weruh, yèn awakmu kuwi dadi pérangané Kristus? Ing perkara kuwi pérangané Kristus apa bakal tak jupuk, lan tak pasrahké pérangané kanggo mlaku bédang? Babar pisan ora!

¹⁶Utawa, apa kowé ora weruh, yèn sapa sing rumaket marang lonté, kuwi dadi nunggal sak badan? Apa ora ana tembungé ngéné: “Loro-loroné bakal dadi daging siji.”

¹⁷Nanging sapa sing rumaket karo Gusti, kuwi dadi nunggal roh karo Panjenengané.

¹⁸Pada ngedohana mlaku bédang! Sak rupané dosa liyané sing dilakoni wong kuwi tumindaké sak njabané badané. Nanging wong sing nindakké mlaku bédang kuwi tegesé dosa marang badané déwé.

¹⁹Apa kowé pada ora weruh, yèn awakmu kuwi pada dadi griyané Roh Sutyi sing manggon ing kowé, Roh Sutyi sing dikèkké marang kowé karo Gusti Allah, lan yèn awakmu kuwi duduk duwèkmu déwé?

²⁰Awit kowé wis pada dituku lan wis dibayar kabèh: Mulané pada ngluhurna Gusti Allah karo awakmu!