Read Caribbean Javanese 1 Korintus 8 Bible Online

1 Korintus 8 - Caribbean Javanese bible

1 Korintus 8

¹Kanggo daging sesajèné brahala kuwi, kita pada weruh: “Kita kabèh pada nduwé kaweruh.” Kaweruh sing mengkono kuwi njalari kementus, nanging katrésnan kuwi mbangun.

²Yèn ana wong nduwé pangira, yèn nduwé kaweruh kuwi tegesé durung bisa nggayuh kaweruh sing kuduné digayuh.

³Nanging wong sing trésna marang Gusti Allah, kuwi dikenali karo Gusti Allah.

⁴Kanggo bab mangan daging sesajèné brahala, kita pada weruh: “Yèn brahala kuwi ing jagat sak temené ora ana, lan ora ana Gusti Allah liyané kejaba mung Panjenengané.”

⁵Awit, senajan ana sing disebut allah, dadia ing swarga, utawa ing bumi — lan pantyèn bener ana allah okèh, lan gusti okèh sing kaya mengkono kuwi—,

⁶nanging kanggo kita kabèh mung ana Gusti Allah siji, ya kuwi Bapak, sing dadi sumberé samubarang kabèh, lan kita pada urip ngladèni marang Panjenengané, lan Gusti ya mung siji, ya kuwi Yésus Kristus, sing lantaran Panjenengané samubarang digawé lan kita kabèh pada urip.

⁷Nanging sing nduwé kaweruh mengkono kuwi ora saben wong. Ana wong, sing awit sangka enggoné ijik ketyentyang karo brahala-brahala, enggoné mangan daging kuwi kaya mangan sesajèné brahala. Lan awit pikiran atiné ringkih terus dadi tyiri.

⁸“Pangan kuwi ora njalari kita kabèh mundak tyedak karo Gusti Allah. Kita kabèh pada ora kekurangan apa-apa yèn ora mangan, lan ora bati apa-apa yèn kita kabèh pada mangan.”

⁹Nanging kuduné kowé pada awas, aja nganti wewenangmu kuwi dadi sandungan kanggo wong sing pada ringkih.

¹⁰Awit yèn nganti ana wong sing weruh kowé sing nduwé kaweruh, ijik mangan ing omahé brahala, apa wong sing pikiran atiné ringkih ora bakal dikuwatké mangan daging sesajèné brahala?

¹¹Karo tyara mengkono wong sing ringkih, ya kuwi sedulurmu tunggal pertyaya, dadi nemoni pati awit sangka kaweruhmu, sakjané Kristus wis mati kanggo wong kuwi.

¹²Yèn karo tyara mengkono, kowé nggawé dosa marang para sedulurmu tunggal pertyaya lan natoni pikiran atiné sing ringkih, kuwi sejatiné kowé nggawé dosa marang Kristus.

¹³Mulané yèn pangan dadi sandungan kanggo sedulurku tunggal pertyaya, ing selawasé aku ora arep mangan daging menèh, supaya aja nganti dadi sandungan kanggo sedulurku.