Read Caribbean Javanese 2 Korintus 10 Bible Online

2 Korintus 10 - Caribbean Javanese bible

2 Korintus 10

¹Aku Paulus, wong sing jirèh yèn adu-arep karo kowé, nanging wani marang kowé yèn adoh, aku ngélingké kowé marang Kristus sing andap asor lan grapyak.

²Penjalukku marang kowé: Kowé aja meksa aku ngétokké kekendelanku ing ngarepmu kayadéné niyatku arep nindakké sing atos marang wong-wong liyané sing ngira yèn urip kita kuwi pada nuruti pernatan kadonyan.

³Kita iki pantyèn ijik urip ing ndonya, nanging kita ora pada perang tyara kadonyan,

⁴awit gamané perang kita kuwi duduk gaman kadonyan, nanging gaman sing nduwèni pangwasané Gusti Allah, sing bisa ngembrukké bèntèng.

⁵Kita pada ngentèkké sak kabèhé tyarané manungsa lan ngembrukké saben bèntèng gembunggungé manungsa kanggo nglawan pangertèné Gusti Allah, lan pada mbanda sak rupané angen-angené, ditelukké marang Kristus,

⁶lan wis pada siap ngukum sak kabèhé duraka, yèn mbangun-turutmu wis dadi sampurna.

⁷Sawangen apa ing ngarepé mripatmu! Yèn ana wong sing yakin tenan dadi duwèké Kristus, kuwi supaya mikir ing sak njeruhné atiné, yèn kita uga pada dadi duwèké Kristus kaya wong mau.

⁸Malah yèn aku rodok kokèhan enggonku nggedèkké wewenang sing dikèkké karo Gusti marang kita kanggo mbangun, ora kanggo ngrusak kowé, aku ora bakal kisinan.

⁹Nanging aku emoh yèn kétoké kaya aku arep medèn-medèni kowé karo layang-layangku.

¹⁰Awit, miturut omongané wong, layang-layangé pantyèn teges lan atos, nanging yèn adu-arep kétok ora sak piraa lan tembung-tembungé rèmèh.

¹¹Nanging wong sing omong mengkono kuwi kuduné ngerti yèn enggonku nandangi ing wantyi adu-arep, pada waé karo tembung-tembungku ing layang-layangku, karo ing wantyi aku ora adu-arep.

¹²Pantyèn kita ora wani nggolongké utawa mbandingké kita karo wong-wong sing ngelem awaké déwé. Wong kuwi ngukur awaké nganggo ukurané déwé lan mbandingké awaké mung karo awaké déwé. Bodo banget wong kuwi!

¹³Kosok baliné kita ora gelem nggedèkké urip kita nganti ngungkuli wates, nanging mung tetep ing sak njeruhné watesé aturan sing wis ditetepaké karo Gusti Allah kanggo kita, mrambat nganti tekan kowé uga.

¹⁴Awit enggon kita pada ngabaraké Injilé Kristus wis luwih ndisik tekan panggonanmu, dadiné kita ora ngliwati watesé panggonané penggawéan, kaya-kaya durung tekan panggonanmu.

¹⁵Kita ora nggedèkké penggawéan sing ditandangi karo wong liyané, ing panggonan penggawéan sing duduk kanggo kita , nanging pengarep-arep kita, yèn pertyayamu saya mundak, kita bakal olèh panghurmatan luwih gedé menèh ing tengahmu, yèn ditandingké karo panggonan penggawéan sing ditemtokké kanggo kita.

¹⁶Ya, urip kita iki pantyèn supaya bisa ngabaraké Injil menyang bawah sing luwih adoh tenimbang karo panggonanmu, lan ora ngunggul-unggulké wohé penggawéan sing wis ditindakké karo wong liyané ing panggonan sing ditemtokké kanggo wong mau.

¹⁷“Nanging sapa sing ngunggul-unggulké, kuwi ngunggul-unggulna ing Gusti.”

¹⁸Awit duduk wong sing ngelem awaké déwé sing tahan uji, nanging wong sing dielem karo Gusti.