Read Caribbean Javanese 2 Korintus 4 Bible Online

2 Korintus 4 - Caribbean Javanese bible

2 Korintus 4

¹Awit kita wis pada nampani penggawéan iki, sangka kabetyikané Gusti Allah, mulané ati kita ora semplak.

²Nanging kita pada nampik sak kabèhé penggawéan ndelik-ndelik sing ngisin-isinké; kita ora ngapusi lan ora malsu tembungé Gusti Allah, kosok baliné kita ngomongké kabeneran lan awit sangka kuwi kita masrahké kita déwé supaya ditimbang-timbang karo wong kabèh karo sak obahé atiné, ing ngarepé Gusti Allah.

³Yèn Injil sing pada kita wartakké ijik ketutupan uga, mesti kuwi ketutupan kanggo wong sing bakal pada nemu karusakan,

⁴ya kuwi wong sing ora pertyaya, sing angen-angené wis dilamurké karo allah-allah jaman iki, banjur wong mau ora pada weruh padangé Injilé kamulyané Kristus, sing dadi gambaré Gusti Allah.

⁵Awit sing pada kita wartakké kuwi duduk awaké déwé, nanging Yésus Kristus Gusti, lan kita sing pada dadi abdimu awit sangka karepé Yésus.

⁶Awit Gusti Allah sing wis ngomong: “Sangka pepeteng bakal ana pepadang sing semlorot!” Panjenengané uga sing nylorotké pepadangé ing ati kita, supaya kita kepadangan ing kaweruh bab kamulyané Gusti Allah sing kétok ing praupané Kristus.

⁷Nanging banda iki diwadahi ing kendi lempung, supaya ketara yèn kekuwatan sing ngidap-idapi kuwi asalé sangka Gusti Allah, ora sangka kita déwé.

⁸Kanggo samubarang kita pada ditindes, nanging ora remuk ketyepit; kita pada kentèkan akal, nanging ora kélangan pengarep-arep;

⁹kita pada disia-sia, nanging ora ditinggal ijèn; kita pada kebanting, nanging ora nemu tyilaka.

¹⁰Kita tansah nggawa patiné Yésus ing awak kita, supaya uripé Yésus uga kebukak ing awak kita.

¹¹Awit kita sing ijik urip iki, tansah dipasrahké marang pati awit sangka Yésus, supaya uripé Yésus uga kebukak ing awak kita sing ora langgeng iki.

¹²Karo mengkono kuwi, pati tansah nibakké kekuwatané ing awak kita, nanging urip nibakké kekuwatané ing kowé.

¹³Nanging awit kita pada kanggonan rohé pertyaya sing pada, kaya sing ketulis: “Aku pertyaya, mulané aku ngomong”, awit sangka kuwi kita ya pertyaya lan awit sangka kuwi kita uga ngomong.

¹⁴Awit kita pada weruh yèn Panjenengané sing wis nangèkké Gusti Yésus, ya bakal nangèkké kita bareng karo Yésus. Lan bebarengan karo kowé kabèh diadepaké ing ngarepé Gusti.

¹⁵Jalaran kuwi kabèh kedadiané awit sangka kowé, supaya kawelasan sing mundak gedé, gegandèngan karo mundak akèhé wong sing dadi pertyaya, njalari mundak lubèré pamuji maturkesuwun marang kaluhurané Gusti Allah.

¹⁶Awit sangka kuwi kita pada ora rumangsa semplak, malah senajan kamanungsan kita sing kétok mundak rusak, nanging kamanungsan kita sing batin dianyarké saben dina.

¹⁷Awit kasangsarané sing èntèng saiki iki, kuwi ngéntukké kamulyan langgeng sing ngungkuli samubarang kanggo kita kabèh, luwih gedé enggoné ngungkuli kasangsaran kita.

¹⁸Awit sing pada kita gatèkké duduk sing kétok, nanging sing ora kétok, awit sing kétok kuwi anané mung sak untara waktu, nanging sing ora kétok kuwi langgeng.