Read Caribbean Javanese 2 Korintus 8 Bible Online

2 Korintus 8 - Caribbean Javanese bible

2 Korintus 8

¹Sedulur-sedulur, kita pada ngekèki weruh marang kowé bab kawelasan sing dikèkké marang pasamuan-pasamuan ing Makédonia.

²Awit ngalami pantyoba sing abot ing ujut kasangsaran werna-werna, kebungahané ngluwihi lan senajan pada mlarat banget, nanging sugih karo kawelasan.

³Awit aku nyeksèni yèn wong kuwi wis pada pawèh miturut kekuwatané, malah ngungkuli kekuwatané.

⁴Lan metu sangka karepé atiné déwé pada njaluk marang kita, supaya uga pada olèh panduman mèlu ing sak njeruhné penggawéan ngladèni, lantaran pawèh kanggo para sutyi ing Yérusalèm.

⁵Nanging sing pada dipasrahké kuwi ngungkuli kita pikir, awit pada masrahké awaké déwé marang Gusti Allah ndisik, terus sangka karepé Gusti Allah, ya marang kita uga.

⁶Awit sangka kuwi kita pada ndesek marang Titus, supaya nekani kowé lan ngrampungké peladènan katrésnan, sing mbiyèn wis miwiti peladènan kuwi.

⁷Mulané saiki, pada kaya enggonmu wis sugih ing samubarang, - ing pertyaya, ing tetembungan, ing kaweruh, ing ketemenanmu enggonmu ngréwangi, lan ing kawelasanmu marang kita - semono uga kowé ya pada malubèr ing njeruhné peladènan katrésnan iki.

⁸Enggonku ngomongi mengkono kuwi ora tegesé préntah, nanging mung awit sangka enggonku kepéngin nguji éklasé katrésnanmu karo nduduhké sak kabèhé pangupayané wong-wong sing pada ngekèki bantuan.

⁹Awit kowé wis pada weruh kawelasané Gusti kita Yésus Kristus, ya kuwi yèn Panjenengané, sing sangka kowé dadi mlarat, senajan Panjenengané kuwi sugih, supaya kowé dadia sugih sangka kemlaratané Gusti Yésus.

¹⁰Ya iki panemuku kanggo bab kuwi, mbok menawa maédahi kanggo kowé. Pantyèn wis wiwit taun sing kepungkur enggonmu wiwit nindakké lan arep ngrampungké uga.

¹¹Mulané saiki, rampungna sing kok tindakké kuwi! Dadiné enggonmu ngrampungké kuwi barengana karo éklasé atimu lan tindakna karo ngélingi sak pira sing kok duwèni.

¹²Awit yèn enggonmu pawèh kuwi karo éklas, pawèhmu kuwi mesti bakal ditampani, yèn pawèhmu kuwi jalaran karo apa sing kok nduwèni, ora karo apa sing ora kok nduwèni.

¹³Awit enggonmu diemoti kuwi ora supaya wong liyané pada kèntèngan, nanging supaya dadi timbang.

¹⁴Mulané betyiké saiki kalubèranmu kanggo nyukupi kekurangané liyané, supaya kalubèrané liyané mengko gentèn nyukupi kekuranganmu, dadiné terus ana timbang.

¹⁵Kaya sing ketulis, “Wong sing pada olèh okèh, ora turah lan sing pada olèh setitik ora kurang.”

¹⁶Nanging maturkesuwun marang Gusti Allah, sing ngekèki katemenan sing kaya mengkono uga ing atiné Titus ing bab enggoné ngréwangi kowé,

¹⁷nanging nganti nuruti penjalukku, malah sangka bangeté temené enggoné tandang ing gawé, terus metu sangka karepé déwé budal nemoni kowé.

¹⁸Mlakuné tak barengi karo sedulur kita, sing wis pada olèh pengalemané pasamuan kabèh bab enggoné nggelarké Injil.

¹⁹Lan ora mung kuwi waé! Sedulur mau uga wis dipiji karo pasamuan-pasamuan kanggo ngantyani kita nindakké peladènan katrésnan iki, sing kita tindakké kanggo kaluhurané Gusti lan kanggo bukti bab éklasé ati kita.

²⁰Kita arep nyingkiri bab iki: Yèn ana wong sing nyalahké enggon kita nindakké peladènan katrésnan sing wohé okèh banget kuwi.

²¹Awit kita pada mikirké sing apik, ora mung ing ngarepé Gusti waé, nanging uga ing ngarepé wong.

²²Uga wong loro mau pada tak barengi sedulur kita liyané, sing wis tak uji lan kétok enggoné tansah mbudidaya ngréwangi, lan saiki mundak banget enggoné mbudidaya awit sangka gedéné pertyayané marang kowé.

²³Gegandèngan karo Titus, kuwi kantyaku lan réwangku nyambutgawé kanggo kowé; lan sedulur-sedulurku liyané kuwi pada dadi utusané pasamuan-pasamuan lan kanggo kaluhurané Kristus.

²⁴Awit sangka kuwi buktiné katrésnanmu lan pengalemané kita marang kowé kabèh, kuwi kétokké marang para sedulur ing ngarepé pasamuan-pasamuan.