Read Caribbean Javanese 2 Korintus 9 Bible Online

2 Korintus 9 - Caribbean Javanese bible

2 Korintus 9

¹Bab ngladèni marang para sutyi ora perlu aku nulis menèh marang kowé.

²Awit aku wis weruh kanggo sak legané atimu, mulané kowé pada tak elem ing ngarepé wong Makédonia. Omongku: “Akaya wis tata-tata wiwit taun sing kepungkur.” Kesregepanmu wis dadi semangaté kanggo wong okèh.

³Nanging enggonku kongkonan sedulur-sedulur kuwi supaya pengalemku marang kowé aja nganti ketemu tanpa guna, nanging supaya ketara enggonmu tata-tata karo tenan kaya sing wis tak omongké,

⁴supaya, yèn wong-wong Makédonia teka bareng karo aku, aja nganti weruh enggonmu durung tata-tata, terus kita - supaya ora nyebut kowé kabèh - rumangsa pada kewirangan ing bab pertyayaku kuwi.

⁵Mulané tak anggep perlu, yèn sedulur-sedulur kuwi tak kongkon gelis budal ndisiki, supaya bisa ngurus luwih ndisik pawèh sing wis dadi kesaguhanmu mbiyèn, banjur mengko wis tyumawis kanggo tanda-buktiné kawelasané atimu lan duduk pawèh peksan.

⁶Iki gatèkna: Wong sing nyebar setitik, ya bakal manèni setitik, lan wong sing nyebar okèh, uga bakal manèni okèh.

⁷Saben wong ngekèki kaya sing dadi éklasé atiné, aja karo sedih utawa awit kepeksa, awit Gusti Allah kuwi nrésnani wong sing ngekèki karo bungah.

⁸Lan Gusti Allah kwasa nglubèrké werna-werna kawelasan marang kowé kabèh, supaya kowé pada tansah ketyukupan ing samubarang lan pada kalubèran enggonmu nglakoni sak rupané penggawé betyik.

⁹Kaya sing ketulis, “Panjenengané ngedum-edum, Panjenengané ngekèki marang wong mlarat, keadilané tetep ing sak lawas-lawasé.”

¹⁰Panjenengané sing nyawiské wiji kanggo sing nyebar lan roti kanggo pangan, Panjenengané uga bakal nyepakké wiji marang kowé lan ditikelké lan nukulké pametuné kabeneranmu;

¹¹kowé bakal disugihké karo sak rupané kawelasan ati sing nukulké tembung maturkesuwun marang Gusti Allah awit sangka kita.

¹²Awit peladènan katrésnan sing kok tindakké iki ora mung nyukupi kepentingané para sutyi waé, nanging uga nglubèrké tembung maturkesuwun marang Gusti Allah.

¹³Lan awit sangka enggonmu mantep ing sak njeruhné ngladèni iki, wong kuwi pada ngluhurké Gusti Allah awit sangka manutmu ing bab ngakoni Injilé Kristus lan sangka kawelasané atimu ing bab ngedum-edum samubarang kanggo wong-wong mau uga wong kabèh.

¹⁴Lan menèh sak njeruhné pandongané, kowé uga pada dikangeni awit sangka kawelasané Gusti Allah sing nglubèri kowé.

¹⁵Pamuji maturkesuwun marang Gusti Allah awit sangka kawelasan pawèhé Gusti sing ora bisa diomongké karo tembung kuwi!