Read Caribbean Javanese Galatia 1 Bible Online

Galatia 1 - Caribbean Javanese bible

Galatia 1

¹Sangka Paulus, rasul ora sangka manungsa lan ora karo kekarepané manungsa, nanging awit Yésus Kristus lan Gusti Allah, Bapak, sing wis nangèkké Panjenengané sangka antarané wong mati.

²Marang pasamuan-pasamuan ing Galatia lan sangka sak kabèhé sedulur tunggal pertyaya sing bareng karo aku.

³Kawelasan anaa ing kowé kabèh lan katentreman sangka Gusti Allah, Bapak kita, lan sangka Gusti Yésus Kristus.

⁴Panjenengané sing wis masrahké awit dosa-dosa kita, supaya kita ditulungi sangka jagat-ala sing saiki iki, miturut karepé Gusti Allah lan Bapak kita,

⁵kanggo Panjenengané diluhurké tekan selawas-lawasé! Amin.

⁶Aku nggumun, awit kowé gelis temen pada nyingkur Panjenengané, sing sangka katrésnané Kristus wis nyeluk kowé, saiki terus mèlu marang injil liyané,

⁷sing sak temené duduk Injil; mung jalaran ana wong sing ngisruhké kowé lan sing arep ngingar-ngingerké Injilé Kristus.

⁸Nanging senajan kita utawa mulékat sangka swarga ngabaraké marang kowé injil sing béda karo Injil sing wis pada tak wartakké marang kowé, wong kuwi kenaa bebendu!

⁹Kaya enggonku mbiyèn wis pada mituturi, saiki kuwi tak omongké sepisan menèh: yèn ana wong sing ngabaraké marang kowé kabèh injil sing béda karo sing wis kok tampani, wong kuwi kenaa bebendu!

¹⁰Dadi kepriyé saiki: sing tak golèki kuwi senengé manungsa apa senengé Gusti Allah? Apa aku ngupaya nggawé senengé manungsa? Yèn aku ijik kepéngin nggawé senengé manungsa, dadi aku duduk abdiné Kristus.

¹¹Awit aku wis tau nerangké karo tyeta marang kowé, para sedulur, yèn Injil sing tak wartakké kuwi duduk injil sing sangka manungsa.

¹²Awit enggonku nampani ora sangka manungsa, lan ya duduk manungsa sing mulangké bab kuwi marang aku, nanging awit sangka wahyuné Yésus Kristus.

¹³Awit kowé wis pada krungu bab uripku mbiyèn ing njeruhné agama Ju: Luwih banget enggonku nguya-nguya lan ngupaya ilangé pasamuané Gusti Allah.

¹⁴Malah, ing bab agama Ju aku ngungkuli kantya-kantya okèh tunggal bangsa sak baraanku; aku dadi wong sing sregep banget nguri-uri adat tata-tyarané para leluhurku.

¹⁵Nanging bareng Gusti Allah, sing wis milih aku wiwit aku ijik ing wetengé ibuku, lan nyeluk aku awit katrésnan-Né,

¹⁶nglilani ngétokké Putrané marang aku, supaya aku ngabaraké Panjenengané ing antarané bangsa kapir, aku babar pisan ora njaluk rembuké manungsa.

¹⁷Aku uga ora lunga menyang Yérusalèm nemoni para wong sing wis dadi rasul sak durungé aku, nanging aku menyang negara Arab, lan sangka kono bali menèh menyang Damaskus.

¹⁸Sakwisé telung taun aku terus menyang Yérusalèm perlu nemoni Kéfas lan aku nginep ing omahé limalas dina.

¹⁹Nanging aku ora ketemu rasul liyané siji-sijia, kejaba Yakobus, seduluré Gusti Yésus.

²⁰Pada gatèkna: Ing ngarepé Gusti Allah aku mestèkké, yèn sing tak tulis marang kowé iki nyata. Aku ora goroh.

²¹Sakwisé kuwi aku terus menyang panggonan Siria lan Kilikia.

²²Nanging pasamuan-pasamuané Kristus ing Yudéa tetep ora pada kenal marang praupanku;

²³mung pada krungu, yèn wong sing mbiyèn nguya-nguya wong-wong mau, saiki ngabaraké pertyaya sing mbiyèn diarah ilangé.

²⁴Lan wong-wong mau terus pada ngluhurké Gusti Allah awit aku.