Read Caribbean Javanese Galatia 3 Bible Online

Galatia 3 - Caribbean Javanese bible

Galatia 3

¹Hé wong Galatia sing bodo, sapa ta sing ngenèng kowé? Yésus Kristus sing dipentèng kuwi apa ora wis didunungké karo jamblang ing ngarepmu?

²Sing arep tak ngertèni sangka kowé, mung iki: Apa enggonmu wis pada nampani Roh kuwi sangka nglakoni angger-anggeré Torèt, apa sangka pertyaya marang kabaré Injil?

³Apa nganti semono bodomu? Kowé wis miwiti karo Roh, apa kowé saiki arep mungkasi karo daging?

⁴Apa tanpa guna kabèh sing wis pada kok alami sing semono akèhé kuwi? Mosok tanpa guna!

⁵Dadi saiki kepriyé, apa Panjenengané sing ngekèki Roh marang kowé nganti lubèr-lubèr lan nindakké mujijat ing tengahmu, enggoné nindakké mengkono kuwi, awit kowé nglakoni angger-anggeré Torèt, apa awit pertyaya marang kabaré Injil?

⁶Ya karo tyara mengkono kuwi enggoné Abraham pertyaya marang Gusti Allah, lan ya kuwi sing njalari dianggep bener karo Gusti Allah.

⁷Dadi kowé ngerti yèn wong-wong sing urip sangka pertyaya kuwi pada dadi anaké Abraham.

⁸Lan Kitab, sing sak durungé wis weruh yèn Gusti Allah nganggep bener marang wong-wong sing duduk Ju awit sangka pertyaya, wis luwih ndisik ngabaraké kabar kabungahan marang Abraham: “Ya ing kowé sak kabèhé bangsa bakal diberkahi.”

⁹Dadi wong-wong sing urip sangka pertyaya, ya kuwi sing pada diberkahi bebarengan karo Abraham sing pertyaya kuwi.

¹⁰Awit wong kabèh, sing uripé sangka penggawéané angger-anggeré Torèt kuwi, ana ing ngisoré bebendu, awit ana tulisan ngéné: “Kenaa bebendu wong sing ora setia enggoné nglakoni samubarang sing ketulis ing kitab angger-anggeré Torèt.”

¹¹Lan ya wis tyeta yèn ora ana wong sing dianggep bener ing ngarepé Gusti Allah awit sangka nglakoni angger-anggeré Torèt, awit: “Wong sing bener kuwi, bakal urip sangka pertyaya.”

¹²Awit angger-anggeré Torèt kuwi dasaré duduk pertyaya, nanging sapa sing nglakoni angger-angger, kuwi bakal urip karo angger-angger.

¹³Kristus wis nebus kita sangka bebenduné angger-anggeré Torèt karo dadi bebendu piyambak awit sangka kita, awit ana tulisan ngéné: “Kenaa bebendu saben wong sing digantung ing kayu salip!”

¹⁴Yésus Kristus wis nandangi kuwi, supaya berkahé Abraham ing Panjenengané sumrambah marang bangsa-bangsa liyané, dadiné awit sangka pertyaya, kita bisa nampani Roh sing dijanjèkké.

¹⁵Para sedulur, betyiké aku tak nganggo tyonto urip sedina-dina. Layang perjanjian sing wis disahké kuwi, senajan sangka manungsa, ora ana wong sing bisa mbatalké utawa nambahi.

¹⁶Uga perjanjian kuwi kabèh diomongké marang Abraham lan marang turuné. Panjenengané ora ngomong: “Marang turun-turunané” sing kaya-kaya tegesé wong okèh, nanging mung wong siji: “lan marang turunanmu”, ya kuwi Kristus.

¹⁷Maksutku ya kuwi perjanjian sing sak durungé wis disahké karo Gusti Allah kuwi ora kena dibatalké karo angger-anggeré Torèt, sing ijik ana sakwisé 430 taun, nganti perjanjian kuwi ilang kekuwatané.

¹⁸Awit yèn sing disahké karo Gusti Allah kuwi asalé sangka angger-anggeré Torèt, mestiné kuwi asalé ora sangka perjanjian; nanging malah awit sangka perjanjian; Gusti Allah wis ngekèkké kawelasané marang Abraham.

¹⁹Yèn mengkono, apa tegesé angger-anggeré Torèt kuwi? Kuwi ditambahké awit sangka anané panerak-panerakké, nganti tekané turunan sing dikarepké ing perjanjian kuwi - lan angger-anggeré Torèt kuwi dikèkké lantaran mulékat-mulékaté marang tangané sakwijiné panglantar.

²⁰Nanging enggoné dadi panglantar kuwi ora mung makili wong siji waé, nanging Gusti Allah kuwi siji.

²¹Yèn mengkono, apa angger-anggeré Torèt kuwi tatapan karo sak kabèhé janjiné Gusti Allah? Babar pisan ora. Awit yèn angger-anggeré Torèt sing dikèkké kuwi bisa nguripké, mestiné apa sing bener kuwi pantyèn tukul sangka angger-anggeré Torèt.

²²Nanging Kitab wis ngurung samubarang marang pangwasané dosa, supaya sangka pertyaya marang Yésus Kristus janji mau dikèkké marang wong sing pada pertyaya.

²³Nanging sak durungé pertyaya kuwi ana, kita dikwasani karo angger-anggeré Torèt, dikurung nganti pertyaya kuwi wis kebukak.

²⁴Dadi angger-anggeré Torèt kuwi kanggo nuntun kita nganti Kristus teka, supaya kita dianggep bener awit sangka pertyaya.

²⁵Nanging saiki bareng kita wis pertyaya, wis ora dikwasani menèh karo sing nuntun mau.

²⁶Awit sangka pertyaya marang Yésus Kristus kowé pada dadi anaké Gusti Allah.

²⁷Awit kowé kabèh, sing pada dibaptis ing Kristus, wis pada nganggokké Kristus.

²⁸Ing bab iki ora ana wong Ju utawa wong Yunani, ora ana batur utawa wong merdéka, ora ana lanang utawa wadon, awit kowé kabèh pada dadi siji ing Kristus Yésus.

²⁹Nanging yèn kowé duwèké Kristus, tegesé kowé pada dadi turunané Abraham lan pada dadi marisi miturut perjanjianné Gusti Allah.