Read Caribbean Javanese Galatia 5 Bible Online

Galatia 5 - Caribbean Javanese bible

Galatia 5

¹Supaya kita merdéka tenan, Kristus wis merdékakké kita. Awit sangka kuwi ngadeka sing jejek lan aja gelem dipasangi pasangan dadi batur menèh.

²Sak temen-temené, aku, Paulus ngomong marang kowé: Yèn kowé sunat, Kristus bakal ora migunani babar pisan kanggo kowé.

³Sepisan menèh tak omongké marang saben wong sing sunat, yèn wong kuwi wajip nglakoni sak kabèhé angger-anggeré Torèt.

⁴Yèn kowé ngarah supaya dianggep bener awit sangka angger-anggeré Torèt, kowé dadiné utyul sangka Kristus; kowé urip ing sak njabané kawelasan.

⁵Awit sangka Roh, lan awit sangka pertyaya kita ngentèn-entèni pada dibeneraké kaya sing kita arep-arep.

⁶Awit kanggo wong-wong ing Kristus Yésus, bab sunat utawa ora sunat kuwi ora ana paédahé, kejaba mung pertyaya sing kerja awit katrésnan.

⁷Mbiyèn enggonmu mèlu pertandingan kuwi karo betyik. Sapa ta sing ngalang-alangi kowé, terus kowé ora nuruti kabeneran menèh?

⁸Kowé dibingungké supaya ora manut menèh, kuwi ora sangka Panjenengané sing nyeluk kowé.

⁹Ragi setitik wis bisa njalari jladrèné mekar.

¹⁰Ing Gusti aku yakin kanggo kowé, yèn kowé ora pada nduwèni panemu liyané kejaba panemu iki. Nanging sapa sing ngisruhké kowé, kuwi bakal nyangga paukumané, senajan sapa waé wong kuwi.

¹¹Lan menèh, kanggo aku, sedulur-sedulur, yèn aku ijik ngabaraké bab sunat, kenèng apa aku ijik disia-sia? Awit yèn mengkono, salip kuwi ora dadi sandungan menèh.

¹²Betyiké wong-wong sing pada mbingungké kowé kuwi pada mbiri awaké déwé waé!

¹³Para sedulur, kowé wis pada dityeluk, supaya merdéka, nanging aja nganti kowé nggunakké kamerdikan kuwi dadi jalaran kanggo urip pernatan kedagingan, nanging pada ladèn-ladènana karo katrésnan.

¹⁴Awit angger-anggeré Torèt kabèh kuwi ketyakup ing tembungé siji iki, ya kuwi: “Kowé trésnaa marang sak pepadamu kaya marang awakmu déwé.”

¹⁵Nanging yèn kowé pada kerah lan pada tyokot-tyokotan, pada awas, aja nganti pada patèn-patènan.

¹⁶Maksutku ya kuwi: Mlakumu pada manuta, marang Roh, terus kowé ora nuruti kepénginané daging.

¹⁷Awit kepénginané daging kuwi ora nuruti karepé Roh lan karepé Roh kuwi ora nuruti kepénginané daging - awit loro-loroné pada mungsuhan - terus kowé saben-saben ora nindakké apa sing kok karepaké.

¹⁸Nanging yèn kowé pada masrahké awakmu supaya dituntun karo Roh, mesti kowé pada ora dikwasani karo angger-anggeré Torèt.

¹⁹Nanging penggawéané daging wis tyeta: mlaku bédang, mlaku rusuh, hawa nepsu,

²⁰nyembah brahala, sulap, satru, tukaran, mèri, nesu, kepentingané déwé, padudon, tyetyongkrèhan,

²¹sengit, mendem-mendeman, pésta-pésta lan liya-liyané. Kanggo sak kabèhé kuwi kowé tak élingké - kaya sing wis tak tindakké mbiyèn - yèn sapa sing nindakké bab-bab sing kaya mengkono kuwi, ora bakal nampa warisan Kratoné Gusti Allah.

²²Nanging wohé Roh ya kuwi: katrésnan, kabungahan, katentreman, sabar, kawelasan, kabetyikan, kasetian,

²³andap-asor, bisa ngwasani uripé déwé. Ora ana angger-angger sing nglawan kuwi mau kabèh.

²⁴Lan sapa sing dadi duwèké Kristus Yésus, kuwi wis nyalip dagingé uga sak kabèhé hawa nepsu lan kepénginané.

²⁵Yèn kita urip sangka Roh, urip kita uga ketuntun karo Roh

²⁶lan kita aja mendem drajat, aja pada tantang-tantangan, lan aja pada sesengitan.