Read Caribbean Javanese Galatia 6 Bible Online

Galatia 6 - Caribbean Javanese bible

Galatia 6

¹Para sedulur, yèn ana wong sing ketemu nglakoni panerak, kowé sing kasukman, kudu nuntun wong kuwi menyang dalan sing bener karo pikiran sing andap asor, karo njaga awakmu déwé, supaya kowé aja kena ing panggoda.

²Pada tulung-tinulunga ing nyangga kerépotan! Ya kaya mengkono kuwi enggonmu netepi angger-anggeré Kristus.

³Awit yèn ana sakwijiné wong sing rumangsa yèn awaké aji, nanging babar pisan ora aji, kuwi ngapusi awaké déwé.

⁴Betyiké saben wong ngujia penggawéané déwé; terus kena mongkok ndeleng kahanané déwé lan ora ndeleng kahanané wong liyané.

⁵Awit saben wong bakal mikul tanggungané déwé.

⁶Lan wong sing nampani piwulangé tembungé Gusti kuwi ngedumana samubarang sing betyik marang wong sing ngekèki piwulang kuwi.

⁷Aja pada kesasar! Gusti Allah ora kena digawé geguyon. Awit apa sing disebar karo wong, ya kuwi sing bakal diunduh.

⁸Awit sapa sing nyebar ing dagingé, bakal ngunduh karusakan sangka dagingé, nanging sapa sing nyebar ing Roh, ya bakal ngunduh urip langgeng sangka Roh kuwi.

⁹Aja nganti kita jelèh enggon kita nggawé kabetyikan, awit yèn wis tekan ing wantyiné, kita bakal ngunduh, anggeré kita ora nganti kesel.

¹⁰Awit sangka kuwi pumpung ijik ana kelunggaran, hayuk pada nggawé betyik marang wong kabèh, luwih-luwih marang sedulur-sedulur kita sing tunggal pertyaya.

¹¹Pada delengen, sak pira gedéné aksara-aksara sing tak tulis marang kowé nganggo tanganku déwé.

¹²Wong-wong sing tyara lair seneng ngegulké awaké déwé, ya wong-wong kuwi sing pada mbudidaya bisané meksa kowé supaya sunat, karepé mung supaya pada ora disia-sia awit sangka salipé Kristus.

¹³Awit wong-wong sing pada sunat kuwi ya pada ora netepi angger-anggeré Torèt. Nanging karepé supaya kowé pada sunat supaya wong mau bisa gemunggung ing bab kahananmu tata lair.

¹⁴Nanging aku ora pisan-pisan gelem gemunggung, kejaba ing salipé Gusti kita Yésus Kristus, awit sangka Panjenengané jagat wis dipentèng kanggo aku lan aku kanggo jagat.

¹⁵Awit sunat utawa ora sunat ora ana paédahé, nanging dadi gawéan sing anyar kuwi sing ana paédahé.

¹⁶Lan kanggo wong kabèh sing mlakuné ketuntun karo pepakoné iki, katentreman lan kabetyikan supaya mudun marang wong-wong kuwi lan marang Israèl duwèké Gusti Allah.

¹⁷Terus aja ana sing nggawé angèlku, awit ing awakku ana tilas-tilas tatu tanda duwèké Yésus.

¹⁸Kawelasané Gusti kita Yésus Kristus nunggal ing rohmu, sedulur-sedulur! Amin.