Read Caribbean Javanese Efésus 1 Bible Online

Efésus 1 - Caribbean Javanese bible

Efésus 1

¹Sangka Paulus, rasulé Kristus Yésus awit sangka karepé Gusti Allah, marang para sutyi ing Efésus, ya para wong sing pada pertyaya ing Kristus Yésus.

²Kawelasan lan katentreman sangka Gusti Allah, Bapak kita, lan sangka Gusti Yésus Kristus anaa ing kowé kabèh.

³Pinujia Gusti Allah lan Bapaké Gusti kita Yésus Kristus, sing wis mberkahi kita ing Kristus karo sak rupané berkah kasukman ing swarga.

⁴Awit ya ing Panjenengané kuwi Gusti Allah wis milih kita sak durungé jagat digawé, supaya kita pada sutyi tanpa tyiri ing ngarepé.

⁵Awit sangka kawelasan-Né kawit wiwitan Panjenengané wis gelem netepaké kita diangkat dadi para anaké, awit sangka Yésus Kristus, miturut kekarepan-Né.

⁶Supaya pinujia kawelasan-Né sing luhur, sing dikèkké marang kita ing Panjenengané sing ditrésnani.

⁷Awit ya ing Panjenengané, kita dikèki tebusan, ya kuwi pangapurané dosa awit sangka getihé, miturut gedéné kawelasan-Né,

⁸sing wis dilubèraké marang kita karo gedéné kawityaksanan lan pangertèn.

⁹Awit Panjenengané wis medaraké wewadiné karepé marang kita, miturut rantyaman-kekarepan-Né, ya kuwi sing kawit wiwitan wis ditetepaké ing Kristus.

¹⁰Kanggo tyetyawisan genepé waktu enggoné ndadèkké siji samubarang kabèh ing Kristus, sing dadi pemimpiné samubarang ing swarga uga ing bumi.

¹¹Ing Kristus, awit ya ing Panjenengané kuwi, kita pada olèh warisan sing dijanjèkké - kita sing sangka wiwitan wis pada dipilih karo Panjenengané tyotyok karo karepé Gusti Allah, sing nindakké samubarang miturut putusané karepé -

¹²supaya kita sing sak durungé wis pada nduwé pengarep-arep ing Kristus, dililani dadi lantarané pamujiné kaluhuran-Né.

¹³Ing Panjenengané kowé kabèh uga pada dityap karo Roh Sutyi sing dijanjèkké kuwi, —awit kowé wis pada ngrungokké tembung kabeneran, ya kuwi Injilé keslametanmu,— sakwisé kowé kabèh pada pertyaya.

¹⁴Nanging Roh Sutyi kuwi sing dadi jaminané warisan kita nganti kita pada nampa tebusan sing njalari kita dadi duwèké Gusti Allah, supaya memuji kaluhuran-Né.

¹⁵Mulané, aku iki sakwisé krungu kabar bab pertyayamu ing Gusti Yésus lan bab trésnamu marang sak kabèhé para sutyi,

¹⁶ora mandek enggonku maturkesuwun awit sangka kowé kabèh. Lan aku tansah ngélingi kowé sak njeruhné pandongaku,

¹⁷supaya Gusti Allah, Gusti kita Yésus Kristus, ya kuwi Bapak sing mulya kuwi, gelem ngekèki Rohé kawityaksanan lan wahyu marang kowé, supaya mbangun turutmu marang Panjenengané karo bener.

¹⁸Lan supaya Panjenengané madangké mripaté atimu, supaya kowé ngerti marang pengarep-arep apa sing nang njeruhné kabèh panggilan-Né: Tenan gedéné warisan kamulyané kanggo para wong sutyi,

¹⁹lan tenan gedéné pangwasané kanggo kita, sing pertyaya, tyotyok karo kekuwatan pangwasan-Né sing gedé,

²⁰sing ditindakké ing Kristus karo enggoné nangèkké sangka antarané wong mati lan njagongké ing swarga ing sisih tengen-Né,

²¹banget enggoné ngungkuli luhuré sak kabèhé pemrintah lan pangwasa lan wibawa lan kraton lan saben jeneng sing kena disebut, ora mung ing ndonya iki waé, nanging uga ing jaman sing bakal kelakon.

²²Uga samubarang wis dipapanaké ing sak ngisoré sikilé Kristus lan Panjenengané wis dikèkké marang pasamuan kanggo sesirahé samubarang sing ana.

²³Nanging pasamuan kuwi sing dadi badan-Né, ya kuwi kebak kasampurnan ing Panjenengané, sing ngebaki samubarang.