Read Caribbean Javanese Efésus 3 Bible Online

Efésus 3 - Caribbean Javanese bible

Efésus 3

¹Ya kuwi sebabé aku iki, Paulus, diukum awit sangka Kristus Yésus kanggo kowé wong-wong kapir.

²Kowé apa ora wis pada krungu bab penggawéané kawelasané Gusti Allah, sing dipertyayakké marang aku awit sangka kowé kabèh,

³ya kuwi enggonku wis dibukakké wewadi kuwi liwat wahyu, kaya sing wis tak tulis ing nduwur karo ringkes.

⁴Yèn kok watya, kowé bisa weruh pangertènku bab wewadiné Kristus,

⁵ing mbiyèn-mbiyèné ora diwartakké marang anak-anaké manungsa, nanging sing saiki dibukakké sak njeruhné Roh marang rasul-rasul lan nabi-nabiné Gusti sing sutyi,

⁶ya kuwi yèn wong-wong kapir, mèlu dadi juru waris lan golongan pérangané badan lan mèlu nduwé panduman ing perjanjiané sing dikèkké ing Kristus Yésus, liwat Injil.

⁷Sangka Injil kuwi aku wis dadi abdiné miturut ganjarané kawelasané Gusti Allah, sing dikèkké marang aku tyotyok karo penggawéané pangwasan-Né.

⁸Aku, wong sing asor déwé ing antarané para sutyi kabèh, wis dikèki kawelasan iki, kanggo ngabaraké marang wong-wong kapir bab kesugihané Kristus, sing ora bisa dikira-kira kuwi,

⁹lan kanggo nerangké marang wong kabèh apa isiné penggawéané perkara sing wis atusan taun kesimpen ing Gusti Allah, sing nyiptaké samubarang,

¹⁰supaya saiki kabèh kawityaksanané Gusti Allah dikétokké marang para pemrintah lan para pangwasa ing swarga lantaran pasamuan,

¹¹tyotyok karo karepé sing langgeng, sing wis ditindakké ing Kristus Yésus, Gusti kita.

¹²Ing Panjenengané kita pada olèh kekendelan lan dalan sing tekan ing ngarepé Gusti Allah karo kebak pengandel awit sangka pertyaya kita marang Panjenengané.

¹³Mulané penjalukku marang kowé kabèh, aja nganti pada semplak nyawang marang kasangsaranku awit sangka kowé, awit kasangsaranku kuwi kamulyanmu.

¹⁴Awit kuwi mulané aku sujut ing ngarepé Bapak,

¹⁵sing sangka Panjenengané sak kabèhé turunané ing swarga lan ing bumi pada dikèki jeneng.

¹⁶Aku ndedonga supaya Panjenengané, sangka gedéné kamulyan-Né nguwatké kowé karo pangwasa lantaran Rohé ing batinmu.

¹⁷Awit sangka pertyayamu, Kristus manggon ing atimu lan kowé pada ngoyota lan ndasarana ing katrésnan.

¹⁸Aku ndedonga, supaya kowé karo sak kabèhé para sutyi bisa weruh sepira ambané lan dawané lan duwuré lan jeroné katrésnané Kristus

¹⁹lan bisa weruh marang katrésnané sing ngungkuli sak kabèhé kaweruh kuwi. Aku ndedonga, supaya kowé pada kebak kasampurnané Gusti Allah.

²⁰Kanggo Panjenengané, sing kwasa nindakké luwih okèh tenimbangané apa sing kita ndongakké utawa kita pikiraké, kaya sing kétok pangwasa-Né sing nyambutgawé ing kita,

²¹ya Panjenengané kuwi sing dikèki kamulyan turun-temurun nganti sak lawas-lawasé ing pasamuan lan ing Kristus Yésus. Amin.