Read Caribbean Javanese Efésus 5 Bible Online

Efésus 5 - Caribbean Javanese bible

Efésus 5

¹Awit sangka kuwi pada nuladanana marang Gusti Allah, kaya anak-anaké sing ditrésnani

²lan pada uripa ing katrésnan, kayadéné Kristus Yésus uga wis trésna kowé kabèh lan masrahké Panjenengané kanggo kita kanggo pisungsung lan kurban sing apik kanggo Gusti Allah.

³Nanging, laku bédang lan sak rupané penggawé rusuh utawa kesrakahan kuwi aja nganti ketemu ing tengahmu, senajan mung disebut waé aja, kaya ngono sak pantesé kanggo para sutyi.

⁴Semono uga aja ngomong tetembungan sing kotor, tylemang-tylemong utawa sembrana - awit kuwi kabèh ora pantes - nanging luwih apik ngomonga pamuji maturkesuwun.

⁵Awit pada élinga tenan bab iki: Ora ana lonté, wong sing reget utawa sing srakah, ya kuwi sing nyembah brahala, pada olèh panduman ing kratoné Kristus lan Gusti Allah.

⁶Aja nganti kowé kena disasarké karo tetembungan sing omong kosong, awit perkara-perkara sing mengkono kuwi nekakké nesuné Gusti Allah kanggo wong-wong duraka.

⁷Awit sangka kuwi aja nganti kowé kekantyan karo wong-wong kuwi.

⁸Pantyèn, mbiyèn kowé kuwi pepeteng, nanging saiki kowé kuwi pepadang ing Gusti. Mulané uripa kaya anak-anaké pepadang.

⁹Awit wohé pepadang kuwi mung sak rupané kabetyikan, keadilan lan kabeneran.

¹⁰Lan tlitinen apa sing dadi senengé Gusti.

¹¹Aja mèlu-mèlu pertingkahé pepeteng sing ora ngetokké woh apa-apa. Nanging kosok baliné welèhna pratingkah-pratingkah kuwi:

¹²Awit mung ngutyapké waé apa sing ditindakké karo wong-wong kuwi ing pandelikan, kuwi wis jenengé saru.

¹³Nanging samubarang sing wis kebukak karo pepadang kuwi dadi kétok, awit kabèh sing kétok kuwi pepadang.

¹⁴Awit sangka kuwi ana tembung: “Melèka, hé kowé sing turu lan tangia sangka antarané wong mati, sak nalika Kristus bakal madangi kowé.”

¹⁵Awit sangka kuwi, pada nggatèkna tenan kepriyé mlakuné uripmu, aja kaya wong sing bodo, nanging kaya wong sing wityaksana,

¹⁶lan kanggokké waktu sing ijik ana, awit jaman iki ala.

¹⁷Mulané aja pada bodo, nanging ngupayaa supaya kowé ngerti, apa sing dadi karepé Gusti.

¹⁸Lan aja nganti kowé mendem anggur, awit anggur kuwi nggugah hawa-nepsu, nanging kebeka karo Roh,

¹⁹lan pada ngomonga kanggo siji lan sijiné nganggo masmur, kidung pamuji lan kidung kasukman. Ngidunga lan surak-suraka kanggo Gusti karo sak tulusé ati.

²⁰Tansah memujia maturkesuwun marang Gusti Allah lan Bapak, kanggo samubarang ing asmané Gusti kita Yésus Kristus.

²¹Andap asora marang siji lan sijiné ing sak njeruhné wedi lan ngajèni marang Kristus.

²²Para wong wadon, manut mituruta marang bojomu lanang kayadéné marang Gusti,

²³awit sing lanang kuwi sesirahé sing wadon, kayadéné Kristus ya sesirahé pasamuan. Ya Panjenengané sing dadi Juruslameté badané.

²⁴Awit sangka kuwi kayadéné pasamuan sujut marang Kristus, ngono uga para wong wadon marang sing lanang kanggo sembarang perkara.

²⁵Para wong lanang, pada trésnaa marang bojomu wadon kayadéné Kristus enggoné wis trésna pasamuané nganti masrahké Panjenengané kanggo pasamuan kuwi,

²⁶supaya dadi sutyi, sakwisé Panjenengané nyutyèkké pasamuan karo padusan banyu lan tembungé;

²⁷karo mengkono pasamuan dipapanaké ing ngarepé, apik tanpa tyiri lan ora njengkerut utawa sak rupané kuwi, terus pasamuan dadi sutyi lan tanpa tyiri.

²⁸Mengkono uga para wong lanang kudu trésna marang bojoné wadon kaya marang awaké déwé: Sapa sing trésna marang bojoné wadon déwé, kuwi nrésnani awaké déwé.

²⁹Awit ora tau ana wong sengit marang awaké déwé, nanging awaké mau malah diopèni lan diupakara, pada kaya Kristus marang pasamuan,

³⁰awit kita iki pérangané badan-Né.

³¹Awit sangka kuwi wong lanang bakal ninggal bapak lan ibuné lan rumaket marang bojoné, terus wong loro kuwi dadi daging siji.

³²Iki perkara gedé, nanging sing tak karepké ya kuwi gegayutané Kristus karo pasamuan.

³³Dadi kanggo kowé: Pada trésnaa marang bojomu déwé kaya marang awakmu déwé, nanging para wong wadon pada ngajènana marang sing lanang.