Read Caribbean Javanese Efésus 6 Bible Online

Efésus 6 - Caribbean Javanese bible

Efésus 6

¹Para botyah, manuta marang wong tuwamu ing njeruhné Gusti, mengkono kuwi sing bener.

²“Kowé ngajènana bapak ibumu”, iki pepakon sing gedé, kaya sing nyata ing perjanjian iki,

³“supaya kowé slamet lan dawa umurmu ing ndonya.”

⁴Lan kowé para bapak, aja pada nggawé larané atiné anak-anakmu, nanging gulawentahen karo piwulang lan pepéling sing sangka Gusti.

⁵Para batur, manuta marang bendaramu ing ndonya karo wedi lan geter lan karo sak tulusé ati, pada kaya enggonmu mbangun turut marang Kristus,

⁶aja mung yèn ing ngarepé waé kanggo nyenengké atiné wong, nanging kaya abdiné Kristus sing karo sak kabèhé ati nindakké karepé Gusti Allah,

⁷lan sing éklas enggoné ngladèni, kaya wong sing ngladèni marang Gusti lan ora marang manungsa.

⁸Kowé pada weruh, yèn saben wong, apa batur tukon, apa wong merdéka, yèn wis nindakké kabetyikan, bakal nampa upahé sangka Gusti.

⁹Lan kowé para bendara, ya ngono uga tumindakmu marang para peladènmu lan aja nganggo antyaman. Elinga, yèn Gustiné wong-wong mau lan Gustimu ing swarga, lan Panjenengané kuwi ora pilih-sih.

¹⁰Pungkasané, pada dadia kuwat ing njeruhné Gusti, lan ing kekuwatané pangwasan-Né.

¹¹Pada nggawaa gegaman perangé Gusti Allah, supaya kowé bisa nglawan apus-apusané iblis;

¹²awit enggon kita perang kuwi ora nglawan daging lan getih, nanging para pemrintah, para pangwasa, para penggedéné jagat sing peteng iki, para roh ala ing langit.

¹³Mulané pada nggawaa sak kabèhé gaman perangé Gusti Allah, supaya kowé bisa nindakké lawanan ing tekané dina sing ala kuwi lan tetep ngadek jejek, sakwisé kowé ngrampungké kuwi kabèh.

¹⁴Mulané pada ngadeka sing jejek, bangkèkanmu sabukana karo kabeneran lan nganggoa klambi waja rupa keadilan,

¹⁵sikilmu nganggoa sepatuné keéklasan kanggo ngabaraké Injilé katentreman;

¹⁶ing kahanan apa waé pada nganggoa pengandel kanggo tamèng, awit ya tamèng sing kaya mengkono kuwi sing kena kok enggo nangkis sak kabèhé panah geni sangka si duraka,

¹⁷karo menèh pada nampanana kupluké keslametan lan pedang Roh, ya kuwi pitutur-pituturé Gusti Allah,

¹⁸karo sak kabèhé pandonga lan penjalukmu, pada tansah ndedongaa ing kumpulané Roh, lan pada jaga-jagaa ing sak njeruhné pandongamu kuwi karo penjaluk sing tanpa mandek kanggo para sutyi kabèh;

¹⁹uga kanggo aku, supaya yèn aku ngomong, aku dikèki tetembungan sing bener, lan supaya karo kendel enggonku ngabaraké wewadiné Injil,

²⁰sing tak ladèni nganti aku dadi utusan sing diukum. Pada ndedongaa, supaya aku bisa ngétokké bab kuwi karo kendel, awit pantyèn kudu mengkono.

²¹ Supaya kowé uga pada weruh marang kahananku, mulané Tikikus, sedulur kita tunggal pertyaya sing ditrésnani lan abdi sing temen ing Gusti, bakal ngekèki weruh marang kowé bab kuwi kabèh.

²²Ya karo maksut sing mengkono mau enggonku kongkonan Tikikus nemoni kowé kabèh, supaya kowé pada ngerti kahananku lan supaya nglipur atimu.

²³Katentreman lan katrésnan karo pertyaya sangka Gusti Allah, Bapak lan sangka Gusti kita Yésus Kristus nunggal ing para sedulur kabèh.

²⁴Kawelasan nunggala karo wong kabèh, sing pada nrésnani Gusti kita Yésus Kristus karo katrésnan sing ora bisa entèk.