Read Caribbean Javanese Filipi 2 Bible Online

Filipi 2 - Caribbean Javanese bible

Filipi 2

¹Dadi awit ing Kristus kuwi ana pepéling, ana panglipurané katrésnan, ana paguyupané Roh, ana katrésnan lan kawelasan.

²Mulané pada sampurnakna kabungahanku karo pada dadia siji ing tunggal katrésnan, tunggal pikiran, tunggal karep,

³ora nggolèk kepentingané déwé utawa pengalem sing tanpa guna. Nanging kosok baliné karo andap asor sing siji nganggepa marang sijiné luwih apik tenimbang awaké déwé;

⁴lan saben wong aja mung mikir marang kepentingané déwé, nanging élinga uga marang kebutuhané liyané.

⁵Ing sak njeruhné enggonmu pada urip bebarengan pada nduwèni angen-angen lan pikiran sing pada kaya Kristus Yésus,

⁶sing senajan nganggo rupa Gusti Allah, nanging enggoné pada karo Gusti Allah kuwi ora dianggep barang duwèké sing kudu digegemi,

⁷nanging malah wis ngosongké Panjenengané piyambak, lan nganggo rupa abdi, lan wis dadi pada karo manungsa.

⁸Apa menèh ing sak njeruhné wujud manungsa kuwi Panjenengané wis ngasorké Panjenengané lan manut nganti ninggal, malah nganti ninggal ing kayu salip.

⁹Ya kuwi sebabé Gusti Allah banget enggoné terus ngluhurké Panjenengané lan ngekèki asma marang Panjenengané ngungkuli kabèh asma,

¹⁰supaya ing asmané Yésus, samubarang ing langit lan ing bumi lan ing sak ngisoré bumi, pada sujut

¹¹lan sak kabèhé ilat pada ngaku: “Yésus Kristus kuwi Gusti”, kanggo kaluhurané Gusti Allah, Bapak!

¹²Para sedulur sing ditrésnani, kowé kuwi tansah pada manut, mulané pada tansah ngupayaa keslametanmu karo wedi lan gemeter, ora mung kaya wantyi aku ijik ing sak tengahmu, nanging luwih-luwih saiki ing wantyiné aku adoh karo kowé;

¹³awit ya Gusti Allah sing nyambutgawé ing kowé, ya ing bab kekarepan, ya ing bab penggawé miturut karepé Panjenengané.

¹⁴Lakonana samubarang kabèh tanpa grundelan lan bantah-bantahan,

¹⁵supaya kowé ora pada ala lan ora pada tyiri, pada dadi anaké Gusti Allah sing tanpa tyiri ing sak tengahé golongan sing béngkong atiné lan mblarah iki, supaya ing sak tengahé wong-wong kuwi kowé semlorot dadi kaya pepadangé lintang ing jagat,

¹⁶karo nyekel pitutur-pituturé sing urip, supaya aku bisa mongkok ing dinané Kristus, lan ora nglentung enggonku nglakoni balapan lan ora nglentung enggonku kangèlan.

¹⁷Nanging senajan getihku dikutahké ing kurban lan pangabektiné pertyayamu, aku bungah, lan aku bungah bebarengan karo kowé kabèh.

¹⁸Lan kowé ya pada bungaha kaya mengkono, lan bungaha bebarengan karo aku.

¹⁹Nanging ing sak njeruhné Gusti Yésus aku kepéngin Timotius gelis nemoni kowé, supaya ayem atiku yèn wis krungu bab kahananmu.

²⁰Awit aku ora nduwé wong liyané menèh sing tunggal pikiran lan tunggal angen-angené lan sing temen-temen nggatèkké kebutuhanmu;

²¹awit kabèh nguber butuhé déwé, duduk kebutuhané Kristus Yésus.

²²Kowé apa ora wis pada ngerti bab kasetiané sing wis diuji lan enggoné wis ngréwangi aku ing bab enggonku ngladèni Injil, kayadéné anak enggoné ngréwangi bapaké.

²³Ya kuwi sing terus arep tak kongkon, sakwisé tyeta kanggo aku kepriyé kedadiané perkaraku,

²⁴nanging ing Gusti aku pertyaya, yèn aku déwé uga bakal gelis teka.

²⁵Mung waé tak kira perlu aku kongkonan Epafroditus bali menèh marang kowé, ya kuwi sedulurku tunggal pertyaya lan kantya nyambutgawé lan kantyaku sak peperangan, sing kok kongkon nulungi aku ing bab kebutuhanku.

²⁶Awit banget kangené marang kowé kabèh lan uga kasusahan awit kowé krungu enggoné dèkné lara.

²⁷Pantyèn ya lara tenan nganti mèh mati, nanging Gusti Allah ngekèki kabetyikan, lan ora mung marang Epafroditus waé, uga marang aku, supaya kasusahanku aja numpuk-numpuk.

²⁸Ya kuwi sebabé enggonku kongkonan luwih gelis, supaya yèn ketemu kowé, kowé pada bisa bungah menèh lan kuwatérku suda.

²⁹Mulané tampanana ing kumpulané Gusti karo sak kabèhé kabungahan lan wong sing kaya mengkono kuwi pada ajènana.

³⁰Awit sangka penggawéané Kristus, nganti mèh ninggal ndonya lan ngetokké nyawané kanggo nggenepi apa sing ijik kurang sak njeruhné enggonmu pada ngladèni marang aku.