Read Caribbean Javanese Kolosé 2 Bible Online

Kolosé 2 - Caribbean Javanese bible

Kolosé 2

¹Awit karepku, supaya kowé pada weruh, sepira gedéné kangèlanku sing tak alami kanggo kowé lan para wong ing Laodikia, lan ya kanggo sapa waé sing durung tau ngerti marang pribadiku,

²supaya pada olèh panglipur atiné, lan pada dadi siji sak njeruhné katrésnan, terus bisa nggayuh aji lan keyakinané pangertèn uga weruh wewadiné Gusti Allah ya kuwi Kristus,

³awit ing Panjenengané disimpen sak kabèhé ajiné kawityaksanan lan kaweruh.

⁴Bab iki tak omongaké marang kowé, supaya aja nganti ana wong sing mbujuk kowé nganggo tembung sing apik.

⁵Awit senajan aku déwé ora ing sak tengahmu, nanging ing sak njeruhné roh aku lan kowé pada dadi siji, lan aku rumangsa bungah weruh uripmu sing ketata lan pertyayamu sing kuwat ing Kristus.

⁶Kowé wis pada nampani Kristus Yésus, Gusti kita, mulané uripmu tetepa ing Panjenengané.

⁷Pada ngoyota ing Panjenengané lan dibangun ing nduwuré Panjenengané, mundak tambah-tambah kuwat pertyayamu, kayadéné sing wis diwulangké marang kowé lan atimu kebaka maturkesuwun.

⁸Ngati-ati, aja nganti ana sing mbanda kowé nganggo ngèlmu filsafaté sing omong kosong lan miturut piwulang turun-tumurun lan roh-rohé jagat, sing ora miturut marang Kristus.

⁹Awit ing Panjenengané kuwi, sak wutuhé kasampurnané Gusti Allah manggon ing Panjenengané,

¹⁰lan kowé wis pada kebak ing Panjenengané, sing dadi sirahé sak rupané pemrintah lan pangwasa.

¹¹Ing Panjenengané enggonmu pada disunat, duduk sunat sing ditindakké karo manungsa, nanging karo sunat Kristus sing rupa utyulé badan sangka dosa,

¹²awit ing Panjenengané kowé pada mèlu dikubur karo baptisan, lan ing Panjenengané mèlu ditangèkké uga lantaran pertyayamu marang penggawéané kuwasané Gusti Allah, sing wis nangèkké Panjenengané sangka antarané wong mati.

¹³Mengkono uga kowé, senajan mauné kowé pada mati karo panerakmu lan ora sunat sak tyara lair, wis diuripké karo Gusti Allah bareng karo Panjenengané, ya kuwi sakwisé Panjenengané ngapura sak kabèhé panerak kita,

¹⁴karo mbatalké layang tanda utang, sing dilandesi karo katentuan-katentuané angger-angger sing ndakwa lan ngantyam marang kita. Nanging kuwi wis dilebur karo kepaku ing kayu salip.

¹⁵Panjenengané wis mblèjèti para pemrintah lan para pangwasa lan pada didadèkké tontonan sing kebukak, ing arak-arakan kemenangan-Né.

¹⁶Awit sing mengkono, aja nganti ana wong sing ngadili kowé bab mangan lan ngombé, utawa bab dina riyaya sasi anyar lan dina sabat.

¹⁷Awit kuwi kabèh mung dadi ayang-ayangé apa sing bakal kelakon, nanging wujudé ya kuwi Kristus.

¹⁸Aja nganti kemenanganmu kuwi diwurungké karo wong sing kétoké andap asor lan ngabekti marang mulékat, lan menèh ngunggul-unggulké wahyu bab kahanan sing ora kétok, uga tanpa dasar enggoné gemunggung karo pikirané sing tyara kadonyan,

¹⁹nanging ora ngugemi marang sirah, sing njalari badan sekujur disangga lan ditalèni dadi siji karo otot-otot lan ros-rosan, tukul miturut tyarané Gusti Allah.

²⁰Yèn kowé wis mèlu mati bareng karo Kristus lan luwar sangka para rohé jagat, kenèng apa kowé kok ijik nuruti marang pernatan rupa-rupa, kaya kowé ijik pada urip ing ndonya,

²¹kayata: aja ndemèk iki, aja ngityipi kuwi, aja nyénggol iki,

²²kabèh kuwi mung rupa barang sing bakal rusak sak njeruhné dikanggokké lan mung nuruti préntah lan piwulangé manungsa.

²³Pernatan-pernatan mau senajan kétoké kebak kawityaksanan, nganggo pangabekti rerékané déwé, kayata: andap asor, nyiksa-badan, kuwi ora ana paédahé kejaba mung kanggo kemaremané urip kedagingan.