Read Caribbean Javanese Kolosé 4 Bible Online

Kolosé 4 - Caribbean Javanese bible

Kolosé 4

¹Para bendara, tumindaka adil lan jujur marang peladènmu, élinga yèn kowé uga nduwé bendara ing swarga.

²Sing setia ndedonga, lan sak njeruhné kuwi pada jaga-jagaa karo maturkesuwun.

³Kita didongaké, supaya Gusti Allah ngekèki kelunggaran kanggo kita pada nyebar pitutur, lan bisa nyritakké bab wewadiné Kristus, sing njalari enggonku dikunjara.

⁴Karo mengkono kuwi aku bisa nerangké bab mau sing sak mestiné.

⁵Tumindaka karo sak kabèhé kawityaksanan kanggo wong njaba, lan pada kanggokké waktu sing ana.

⁶Tetembunganmu sing tansah kebak katrésnan, aja tyemplang, terus kowé ngerti, kepriyé enggonmu bakal pada nyauri pitakoné saben wong.

⁷ Sak kabèhé kabar bab kahananku bakal diomongké marang kowé kabèh karo Tikikus, sedulur kita sing ditrésnani, abdi sing setia lan kantya tunggal peladènan ing Gusti,

⁸sing tak kongkon nemoni kowé supaya kowé weruh kahanan kita lan supaya nglipur atimu.

⁹Mlakuné dibarengi karo Onésimus, sedulur kita sing setia lan ditrésnani, wong sangka tengahmu, kuwi bakal pada nyritaké marang kowé samubarang kabèh sing kelakon ing kéné.

¹⁰Salam keslametan marang kowé sangka Aristarkus, kantyaku pakunjara lan sangka Markus ponakané Barnabas —kanggo wong kuwi kowé apa ora wis diweling— yèn nekani kowé tampanana.

¹¹Salam keslametan sangka Yésus sing parapané Yustus. Sangka antarané para wong disunat, ya mung wong telu kuwi kantyaku tunggal-gawé kanggo Kratoné Gusti Allah; kuwi pada ndadèkké panglipuré atiku.

¹²Salam keslametan kanggo kowé sangka Epafras, sing asalé sangka tengahmu, kuwi abdiné Kristus Yésus, sing tansah terus-terus enggoné ndongakké kowé, supaya kowé tetep kuwat, kayadéné wong-wong sing déwasa lan sing yakin tenan marang apa sing dadi karepé Gusti Allah.

¹³Kanggo Epafras kuwi aku bisa ngekèki paseksi, bab enggoné kangèlan nyambutgawé kanggo kowé lan para wong Laodikia lan ing Hiérapolis.

¹⁴Salam keslametan marang kowé sangka Lukas, dokter sing ditrésnani lan sangka Démas.

¹⁵Salamku marang para sedulur tunggal pertyaya ing Laodikia; uga marang Nimfa lan pasamuan ing omahé.

¹⁶Lan menèh yèn layang iki wis diwatyaké ing tengahmu, ngupayaa supaya diwatyaké uga ing pasamuan Laodikia, lan layang sing marang Laodikia supaya uga diwatyaké ing ngarepmu.

¹⁷Lan Arkipus omongana ngéné: Kudu gatèkna, kuwajipané ngladèni, sing wis kok tampani sangka Gusti kuwi lakonana karo sak mestiné.

¹⁸Salam keslametan sangka aku Paulus. Salam iki tak tulis nganggo tanganku déwé. Elinga yèn aku dikunjara. Kawelasan nunggal ing kowé.