Read Caribbean Javanese 1 Tésalonika 1 Bible Online

1 Tésalonika 1 - Caribbean Javanese bible

1 Tésalonika 1

¹Sangka Paulus, Silvanus[1] lan Timotius marang pasamuané wong-wong ing Tésalonika, ing Gusti Allah, Bapak lan ing Gusti Yésus Kristus. Kawelasan lan katentreman anaa ing kowé kabèh.

²Kita tansah pada maturkesuwun marang Gusti Allah awit sangka kowé kabèh lan ngélingi kowé ing pandonga kita.

³Awit kita tansah éling marang penggawéané pertyayamu, budidayané katrésnanmu lan mantepé pengarep-arepmu marang Gusti kita Yésus Kristus ing ngarepé Gusti Allah lan Bapak kita.

⁴Lan kita pada weruh, hé para sedulur sing ditrésnani karo Gusti Allah, yèn Panjenengané wis milih kowé kabèh.

⁵Awit Injil sing kita wartakké kuwi, kanggo kowé kabèh kuwi ora mung lantaran tembung-tembung waé, nanging uga karo Roh Sutyi lan karo kekuwatan sing mantep. Pantyèn kowé pada weruh, kepriyé enggon kita pada nyambutgawé ing tengahmu awit sangka kowé kabèh.

⁶Lan kowé wis pada nuladani kita lan nuladani Gusti; sak njeruhné kasangsarané sing abot banget, kowé wis pada nampani tembungé kuwi karo bungah awit sangka penggawéané Roh Sutyi,

⁷terus kowé pada dadi tulada kanggo wong kabèh sing pertyaya ing bawah Makédonia[2] lan Akaya.[3]

⁸Awit sangka tengahmu tembungé Gusti ngumandang ora mung ing Makédonia lan ing Akaya waé, nanging ing sak kabèhé panggonan wis kesebar kabar bab pertyayamu marang Gusti Allah, mulané aku wis ora usah ngomongké apa-apa bab kuwi.

⁹Awit wong-wong kuwi déwé sing wis pada nyeritaké bab kita sak kantya, kepriyé enggonmu pada ngrumati kita, lan enggonmu pada ninggal brahala-brahala terus mratobat marang Gusti Allah lan ngladèni marang Panjenengané sing urip lan sejati,

¹⁰lan kanggo ngentèn-entèni tekané Putrané sangka swarga, sing wis tangi menèh sangka antarané wong mati, ya kuwi Yésus, sing ngluwari kita sangka bebendu sing bakal kelakon.