Read Caribbean Javanese 1 Tésalonika 5 Bible Online

1 Tésalonika 5 - Caribbean Javanese bible

1 Tésalonika 5

¹Nanging para sedulur, kanggo waktu lan wantyiné ora perlu ditulis kanggo kowé,

²awit kowé déwé wis pada weruh karo tyeta, yèn dinané Gusti kuwi tekané kaya maling ing wantyi mbengi.

³Yèn wong-wong pada omong: Kabèh tentrem lan ora ana bebaya - nanging dadakan wong-wong pada katekan tyilaka, kayadéné wong wadon meteng jalaran mbayi - mesti bakal pada ora bisa ngéndani.

⁴Nanging kowé, para sedulur, kowé pada ora urip ing pepeteng, nganti kowé pada kagèt ing dina kuwi sing tekané kaya maling,

⁵awit wong kabèh kuwi pada dadi anaké pepadang lan anaké awan. Kita kuwi duduk wong-wongé wengi utawa wong-wongé pepeteng.

⁶Awit sangka kuwi apiké kita aja pada turu kaya wong-wong liyané, nanging pada tangia lan jaga-jaga.

⁷Jalaran wong sing pada turu, kuwi turuné ing wantyi mbengi, lan sing pada mendem, kuwi enggoné mendem ing wantyi mbengi.

⁸Nanging kita iki wong-wongé awan, mulané kita pada sing ati-ati, kudu nganggokké jubahé pertyaya lan katrésnan lan kupluké pengarep-arepé keslametan.

⁹Awit Gusti Allah ora netepaké kita supaya nampani bebendu, nanging supaya olèh keslametan awit Yésus Kristus, Gusti kita,

¹⁰sing wis ninggal kanggo kita, supaya kita, dadia jaga-jaga, dadia turu, pada urip bareng karo Panjenengané.

¹¹Mulané kowé pada éling-élingna lan mbanguna marang pepada, kayadéné sing pantyèn pada kok lakoni.

¹²Penjalukku marang kowé kabèh, para sedulur, pada hurmatana wong-wong sing mempeng ing penggawé ing tengahmu, sing nuntun kowé ing Gusti lan sing ngekèki pepéling marang kowé,

¹³lan supaya pada kok ajèni sing banget karo katrésnan awit sangka penggawéané. Tansah pada uripa karo rukun ing tengahmu.

¹⁴Kita uga pada ngekèki pepéling marang kowé, para sedulur, wong sing uripé pada ora ketata, élingna; wong sing pada tyilik atiné bombongen; wong sing pada ringkih, bélanana; sing sabar marang wong kabèh.

¹⁵Pada gatèkna, supaya aja ana wong sing mbales ala marang wong sing nggawé ala, nanging tansah pada ngupayaa marang sing betyik, marang pepadamu lan marang wong kabèh.

¹⁶Tansah pada bungaha.

¹⁷Aja mandek enggonmu ndedonga.

¹⁸Pada maturkesuwun ing sembarang perkara, awit kuwi sing dikarepké karo Gusti Allah ing Kristus Yésus kanggo kowé.

¹⁹Aja nyirep Roh,

²⁰lan aja ngrèmèhké nubuat.

²¹Periksanen samubarang kabèh, lan tyekelen sing betyik.

²²Pada ngedohana sak rupané sing ala.

²³Supaya Gusti Allah sing nduwé katentreman kuwi nyutyèkké kowé ing sak kabèhé lan supaya roh, jiwa lan badanmu dijaga karo tanpa tyiri nalika tekané Yésus Kristus, Gusti kita.

²⁴Panjenengané sing manggil kowé kuwi setia, Panjenengané uga bakal nggenepi.

²⁵Para sedulur, kita pada dongakna.

²⁶Salamku kabèh marang para sedulur tunggal pertyaya karo ambungan sing sutyi.

²⁷Kanggo asmané Gusti penjalukku karo banget marang kowé, supaya layang iki diwatyakké marang sedulur tunggal pertyaya kabèh.

²⁸Kawelasané Yésus Kristus, Gusti kita, nunggal ing kowé kabèh.