Read Caribbean Javanese Yosua 22 Bible Online

Yosua 22 - Caribbean Javanese bible

Yosua 22

¹Sakwisé mengkono Yosua nyeluk wong Rubèn lan wong Gad uga separoné taler Manasé,

²kuwi pada diomongi mengkéné: “Kowé wis pada netepi sak kabèhé préntahé Moses, abdiné GUSTI marang kowé, lan ya wis nggatèkké samubarang sing tak préntahké marang kowé.

³Para sedulurmu ora pada kok tinggal-tinggal wiwit waktu semono, nganti tekan ing dina iki; malah kowé wis pada ngemen-ngemenké manutmu marang pepakoné GUSTI, Gusti Allahmu.

⁴Nanging saiki GUSTI, Gusti Allahmu wis ngekèki tentrem marang para sedulurmu, kaya sing wis dadi perjanjiané; mulané saiki kowé pada muliha menyang tarupmu, ya menyang tanah duwèkmu, pawèhé Moses abdiné GUSTI marang kowé ana sabrangé laut Yordan.

⁵Mung sing temen tenan enggonmu pada netepi pepakon lan pernatan sing wis dipréntahké karo Moses abdiné GUSTI marang kowé, bab enggonmu pada trésna marang GUSTI Gusti Allahmu, lan pada mlakua ing sakkèhé dalan sing diduduhké, tansah netepi ing pepakoné karo rumaket marang Panjenengané, uga pada ngabektia karo sak kabèhé atimu lan sak kabèhé nyawamu.”

⁶Yosua terus ngekèki berkah marang wong mau lan pada dililani mulih terus mulih menyang tarupé.

⁷Nanging kanggo taler Manasé sing separo kuwi wis pada dikèki panduman karo Moses ing negara Basan; nanging separoné wis dikèki panduman karo Yosua ing antarané para seduluré ing kuloné laut Yordan. Kuwi wis uga dililani mulih menyang ing tarupé karo Yosua lan pada disangoni berkah,

⁸lan diomongi mengkéné: “Pada muliha menyang tarupmu karo nggawa kasugihan okèh lan kéwan-kéwan okèh banget, uga slaka, emas, tembaga lan wesi, lan sandangan sing luwih okèh. Barang rayahané sangka mungsuhmu kuwi edum-edumen karo para sedulurmu.”

⁹Mengkono dadi turunané Rubèn, turunané Gad lan separoné taler Manasé mau pada bali mulih, ninggal tunggal bangsa Israèl, budal sangka Silo ing tanah Kanaan menyang tanah Giléad, sing wis dadi duwèké lan wis dienggoni netepi préntahé GUSTI lantaran Moses.

¹⁰Sak tekané ing Giléad, ing pinggir laut Yordan, ing pangwasané tanah Kanaan, turunané Rubèn lan turunané Gad lan separoné taler Manasé mau terus pada nggawé mesbèh ing pinggir laut Yordan kono, mesbèh sing gedé.

¹¹Wong Israèl, terus pada krungu tembungé wong mengkéné: “turunané Rubèn lan turunané Gad lan separoné taler Manasé kuwi pada nggawé mesbèh madep marang ing tanah Kanaan, ing Gelilot pinggir laut Yordan sandingé panggonané wong Israèl.”

¹²Wong Israèl bareng krungu kabar mengkono, terus pada nglumpuk ing Silo, gelem ngluruk perang.

¹³Wong Israèl terus pada kongkonan nemoni turunané Rubèn, turunané Gad lan separoné taler Manasé menyang ing tanah Giléad, sing dikongkon imam Pinéhas, anaké Eléazar

¹⁴karo para penggedéné sepuluh, saben taler penggedéné siji, sangka sakkèhé taler Israèl; siji-sijiné dadi penggedéné brayaté ing sak tengahé brayaté Israèl.

¹⁵Bareng wis ketemu karo wong turunané Rubèn lan wong turunané Gad lan separoné taler Manasé ing tanah Giléad, wong-wong kuwi terus pada dipituturi mengkéné:

¹⁶“Tembungé umaté GUSTI kabèh mengkéné: nanging kowé pada nglakoni penggawé sing ora setia marang Gusti Allahé Israèl, kowé pada ninggal GUSTI ya kuwi enggonmu pada nggawé mesbèh kanggo kowé déwé, dadi ing dina iki pada mbruntak marang GUSTI?

¹⁷Mlakumu ngiwa awit sangka Péor kuwi apa durung tyukup kanggo kita; nanging tekan ing dina iki reget kita kuwi durung diresiki, sing njalari umaté GUSTI katekan ing bebendu;

¹⁸nanging kowé kuwi saiki kok pada ninggal GUSTI menèh. Yèn ing dina iki kowé pada nglawan marang GUSTI, sésuk bakal ana bebendu sing ditibakké marang umat Israèl kabèh.

¹⁹Nanging yèn tanah duwèkmu kuwi kanggonan reget, mara ta pada nyabranga menyang ing tanah duwèké GUSTI, ing panggonané Tarup Sutyiné GUSTI, lan pada manggona ing tengahku kana. Mung waé aja nglawan marang GUSTI, lan ya aja nglawan marang kita karo nggawé mesbèh kanggo awakmu déwé, kejaba sangka mesbèh duwèké GUSTI, Gusti Allah kita.

²⁰Waktu Akan anaké Sérah nglakoni ora setia kanggo barang tebusan, terus ana bebendu sing tiba ing umaté Israèl kabèh, tur ora mung wong siji kuwi waé sing mati awit sangka dosané.”

²¹Ing kono wong turunané Rubèn lan wong turunané Gad lan separoné taler Manasé pada nyauri marang para penggedéné ing brayaté Israèl:

²²“Gusti Allahé kabèh allah, GUSTI ya Gusti Allahé kabèh allah, GUSTI, kuwi sing weruh lan wong Israèl pantes uga weruh! Yèn kedadian kuwi awit sangka kekarepan arep mbruntak utawa ora setia marang GUSTI, kula wis aja nganti pada dikèki slamet karo GUSTI ing dina iki;

²³yèn enggèn kula nggawé mesbèh kuwi awit arep bakal ninggal GUSTI, utawa bakal kula kanggo pasrah kurban obongan lan kurban panganan, apa uga kula kanggo pasrah kurban keslametan, muga GUSTI déwé sing ngekèki mbales marang kita.

²⁴Sakjané enggèn kula nganti pada nandangi mengkéné kuwi, mung digawa sangka sumelangé bab sakwijiné perkara. Kula pada mikir: Menawa anak putu sampéyan ing mbésuk bakal pada nduwé omongan marang anak putu kula mengkéné: Kowé pada mèlu-mèlu apa karo GUSTI Gusti Allahé Israèl?

²⁵Apa ora laut Yordan kuwi sing wis dipestèkné karo GUSTI dadi wates ing antarané aku karo kowé, hé turunané Rubèn lan turunané Gad; kowé pada ora nduwé panduman bab kanggo GUSTI. Mengkono anak putu sampéyan iki mbok menawa bakal pada ngendek marang anak putu kula anggèné pada ngabekti marang GUSTI.

²⁶Mulané kula pada omongan: Apiké aku pada ngedekké mesbèh kuwi kanggo kita. Ora kanggo pasrah kurban obongan lan kurban sing dibelèh,

²⁷mung supaya mesbèh kuwi dadi seksi ing antarané kula karo sampéyan lan ing antarané turunan kita ing sakwisé kita, yèn kita bakal pada tetep ngabekti marang GUSTI ing ngarepé nganggo kurban obongan, kurban sing dibelèh, lan kurban keslametan; supaya anak putu sampéyan ing mbésuk aja nganti ngomong marang anak putu kita: Kowé pada ora nduwé panduman kanggo GUSTI.

²⁸Sak terusé kita pada omongan: Yèn mbésuk pada nduwé tembung marang kita utawa marang turun kita kaya mengkono, terus kita bakal pada nyauri: Pada delengen ta modèlé tiruan mesbèhé GUSTI gawèané para leluhurmu; kuwi ora kanggo kurban obongan, kurban panganan utawa kurban sing dibelèh, nanging kuwi dadi seksi ing antarané kita lan kowé.

²⁹Tenan adoha sangka kita, yèn kita pada nglawan marang GUSTI, utawa pada ninggal GUSTI ing dina iki, awit nggawé mesbèh kanggo kurban obongan, kurban panganan utawa kurban sing dibelèh, sak jabané sangka mesbèh duwèké Gusti Allah kita, GUSTI ing ngarepé tarup sutyi-Né.”

³⁰Imam Pinéhas lan para penggedéné umat lan para penggedéné brayaté wong Israèl sing pada mèlu, bareng pada krungu tembung sing diutyapké karo turunané Rubèn lan turunané Gad lan turunané Manasé, bab kuwi terus dianggep apik.

³¹Imam Pinéhas, anaké Eléazar terus ngomong marang turunané Rubèn lan turunané Gad lan turunané Manasé: “Saiki kita pada weruh yèn GUSTI ing tengah kita, awit kowé ora pada nyimpang sangka kasetianmu marang GUSTI; awit sangka kuwi kowé nganti pada ngluwari wong Israèl sangka paukumané GUSTI.”

³²Imam Pinéhas, anaké Eléazar karo para penggedéné mau terus pada ninggalké turunané Rubèn lan turunané Gad ing tanah Giléad, mulih menyang tanah Kanaan, nemoni wong Israèl karo nglaporké kabar mau.

³³Nanging semaur mau ya dianggep apik karo wong Israèl lan wong Israèl terus pada memuji marang Gusti Allah, lan wis ora rembukan menèh bab ngluruk perang lan arep ngrusak negara sing dienggoni karo turunané Rubèn lan turunané Gad.

³⁴Turunané Rubèn lan turunané Gad terus pada njenengaké mesbèh mau: Seksi, awit kuwi dadi seksi ing antarané kita, yèn GUSTI kuwi Gusti Allah.