Read Caribbean Javanese Yosua 4 Bible Online

Yosua 4 - Caribbean Javanese bible

Yosua 4

¹Bareng umat kabèh wis pada nyabrang ing laut Yordan, GUSTI terus ngomong marang Yosua, mengkéné:

²“Kowé miliha wong rolas sangka bangsa kuwi, saben taler wong siji, kuwi pada préntahana mengkéné:

³Pada njupuka watu rolas iji sangka kéné, sangka sak tengahé laut Yordan iki, sangka panggonan mandeké tlapakané para imam, pada usungen menyang ing sabrangé kali, terus sèlèhna ing panggonan sing bakal kok inepi mengko mbengi.”

⁴Yosua terus nyeluk wong rolas, sing wis dipilih sangka antarané wong Israèl, saben taler wong siji,

⁵kuwi pada diomongi mengkéné: “Pada nyabranga ing ngarepé petiné GUSTI, Gusti Allahmu ing sak tengahé laut Yordan, terus njupuka watu siji miturut tyatyahé taler wong Israèl,

⁶supaya kuwi dadia tanda ing sak tengahmu. Nèk anak-anakmu mbésuk pada takon: Watu kuwi kanggo Panjenengané tegesé apa?

⁷Kowé terus pada ngomonga: ‘Yèn banyuné laut Yordan dipedot ing ngarepé peti perjanjiané GUSTI; waktu peti kuwi nyabrang ing laut Yordan, banyuné kali kuwi terus dipedot. Mulané watu-watu iki pada dadia pengéling-éling marang wong Israèl ing selawasé.”

⁸Wong Israèl terus pada nglakoni préntahé Yosua, pada ngusung watu sangka sak tengahé laut Yordan, kaya sing wis dadi préntahé GUSTI marang Yosua, miturut tyatyahé taler-taleré wong Israèl, terus pada diusungi menyang ing sabrangé kali menyang ing panggonan panginepan lan disèlèhké ing kono.

⁹Uga menèh Yosua terus ngedekké watu rolas ing sak tengahé laut Yordan, ing tilas panggonan tlapakané para imam, sing ngusung peti perjanjian. Watu-watu mau ijik ing kono nganti tekan saiki.

¹⁰Para imam sing pada ngusung peti mau pada terus ngadek ing sak tengahé laut Yordan, nganti wis rampung kelakon kabèh apa préntahé GUSTI marang Yosua, sing kudu dipréntahké marang bangsa kuwi, miturut karo apa sing dipréntahké Moses marang Yosua.

¹¹Bangsa Israèl terus gelis-gelis pada nyabrang, petiné GUSTI lan para imam terus pada mlaku, disawang karo para umat.

¹²Uga wong turunané Rubèn lan turunané Gad lan separo turunané Manasé pada nyabrang karo nggawa gaman ing ngarepé wong Israèl, kaya sing wis dipréntahké karo Moses marang wong-wong mau.

¹³Para suradadu sing wis tata-tata kanggo perang tyatyahé 40.000, kuwi pada nyabrang ing ngarepé GUSTI menyang ing tanah rata Yériko, pada arep ngadepi perang.

¹⁴Ing dina kuwi GUSTI ngluhurké jenengé Yosua ing ngarepé wong Israèl kabèh, nganti ing sakjeké urip wedi marang dèkné, kaya enggoné wedi marang Moses.

¹⁵GUSTI terus ngomong marang Yosua mengkéné:

¹⁶“Para imam sing ngusung petiné pernatané Gusti Allah pada kongkonen mentas sangka laut Yordan.”

¹⁷Yosua terus ngongkon marang para imam mengkéné: “Pada mentasa sangka laut Yordan!”

¹⁸Bareng para imam sing ngusung peti perjanjiané GUSTI wis pada mentas sangka tengahé laut Yordan lan ijik waé tlapakané ngantyik ing daratan, banyuné laut Yordan terus bali ing panggonané, lan mili kaya mauné nglubèrké ing pinggiré kabèh.

¹⁹Bangsa mau enggoné mentas sangka laut Yordan waktu tanggal kaping sepuluh sasi kaping pisan; terus pada manggon ing Gilgal, ing tapel watesé Yériko sing sisih wétané.

²⁰Yosua terus numpuk watu rolas sing dijukuk sangka laut Yordan mau ing Gilgal,

²¹lan terus ngomong marang wong Israèl: “Yèn mbésuk anak-anakmu pada takon marang bapaké, apa tegesé watu-watu iki,

²²kuwi pada wènèhana weruh mengkéné: Wong Israèl wis nyabrang ing laut Yordan iki karo mlaku ing gasikan,

²³awit GUSTI, Gusti Allahmu sing ngesatké laut Yordan ing ngarepmu, nganti kowé pada bisa nyabrang, pada kaya sing ditindakké GUSTI, Gusti Allahmu kanggo segara Abang, sing diesataké ing ngarepku kabèh, nganti kita pada bisa nyabrang,

²⁴kuwi supaya sakkèhé bangsa ing sak jagat weruh yèn tangané GUSTI kuwi kwasa, mulané pada tansah ngajèni marang GUSTI, Gusti Allahmu!”