Read Caribbean Javanese Yosua 7 Bible Online

Yosua 7 - Caribbean Javanese bible

Yosua 7

¹Nanging wong Israèl pada nerak kasetiané, ya kuwi njupuk barang-barang sing disutyèkké mau, awit Akan anaké Karmi, anaké Sabdi, anaké Sérah, sangka taler Yéhuda, njupuk barang sing disutyèkké kuwi. Mulané GUSTI terus nesu marang wong Israèl.

²Yosua kongkonan wong sangka Yériko menyang ing Ai, sing sisih ing sak tyedaké Bèt-Awèn, ing wétané Bétel, wong-wong mau pada diweling mengkéné: “Pada lungaa mbrana, negara kuwi indiken.”

³Wong mau terus pada budal, ngindik kuta Ai. Sakwisé ngindik terus pada bali nemoni Yosua, lan ngomong: “Kanggo ngluruk ora perlu wong sak bangsa kabèh, mung wong 2000 utawa 3000 waé, sing budal ngrebut kuta Ai kuwi; aja nganti nggawé rekasané wong sak bangsa kabèh, pada kedadian mbrana, awit ing kana wongé mung setitik.”

⁴Mulané sing ngluruk mung wong 3000; nanging kuwi pada mblayu ing ngarepé wong Ai.

⁵Awit wong Ai pada bisa matèni wong kuwi mau telung puluh enem; wong Israèl diuyak wiwit sangka ngarepé gapurané kuta nganti tekan ing Syembarim, enggoné pada merangi ing pèrèng-pèrèng. Atiné para umat dadi semplak.

⁶Yosua terus nyuwèk sandangané lan sujut sendeku ing bumi ing ngarepé petiné GUSTI nganti tekan ing wayah soré, bebarengan karo para tuwa-tuwané Israèl, karo ngewur-ewuri lebu ing sirahé.

⁷Yosua terus ngomong: “Duh Gusti GUSTI kula, kenèng apa bangsa kuwi nganti Gusti mréntah nyabrang ing laut Yordan? Apa supaya kula pada dipasrahké ing tangané wong Amori, terus pada dientèkké? Luwih apik yèn kula pada mutusi tetep ing sisih kanané laut Yordan waé!

⁸Duh Gusti, kula bakal ngomong apa, sakwisé wong Israèl mlayu ngunduri mungsuh-mungsuhé?

⁹Yèn bab kuwi dikrungu wong Kanaan lan kabèh wong negara iki, mesti kula pada bakal dikepung lan jeneng kula bakal dientèkké sangka bumi. Apa sing bakal Panjenengan tindakké nggawé mulihké asma Panjenengan sing gedé kuwi?”

¹⁰Terus GUSTI ngomong marang Yosua: “Kowé ngadeka, kenèng apa kowé kok sujut-sujut mengkono?

¹¹Wong Israèl wis pada nggawé dosa, wis pada nerak perjanjian-Ku sing wis Tak omongké marang dèwèké kabèh, ya kuwi pada njupuk barang sing disutyèkké, pada nyolong, terus didelikké dityampur karo barang duwèké.

¹²Mulané wong Israèl ora bisa menang ing ngarepé mungsuhé, pada ngunduri mungsuhé, awit wis pada ditetepaké bakal tak entèkké, Aku ora bakal nunggal karo kowé menèh, yèn kowé pada ora ngentèkké barang sing disutyèkké kuwi sangka tengahmu.

¹³Wis kowé ngadeka, bangsa kuwi sutyèkna lan préntahana mengkéné: Pada sutyèkké uripmu tekan ing dina sésuk, awit tembungé GUSTI Allahé Israèl mengkéné: Ing tengahmu ana barang sing disutyèkké, hé Israèl, kowé bakal ora bisa menang ing ngarepé mungsuhmu sak durungé kowé pada nyingkirké barang sing disutyèkké kuwi sangka tengahmu.

¹⁴Sésuk ésuk pada majua miturut taleré déwé-déwé, nanging taler sing bakal dituding karo GUSTI kuwi majua miturut turunané déwé-déwé, lan turunané sing bakal dituding karo GUSTI kuwi majua miturut brayaté déwé-déwé. Sak terusé brayaté sing dituding karo GUSTI kuwi wong pada majua ijèn-ijèn.

¹⁵Lan sapa bakal dituding, yèn kanggonan barang sing disutyèkké mau, kuwi kudu diobong ing geni, dèkné déwé uga sembarang duwèké kabèh, awit nerak perjanjiané GUSTI lan nglakoni reget ing tengah-tengahé wong Israèl.”

¹⁶Yosua terus tangi wayah ésuk mruput, terus nyeluk wong Israèl pada dikongkon maju miturut taleré, nanging sing dituding kuwi taler Yéhuda.

¹⁷Bareng turunané Yéhuda pada dityeluk maju, turunané Sérah sing ketemu. Turunané Sérah mau bareng dityeluk maju miturut brayaté, brayaté Sabdi sing ketemu.

¹⁸Brayaté kuwi bareng dityeluk maju, wong lanang ijèn-ijèn terus sing ketemu Akan, anaké Karmi, anaké Sabdi, anaké Sérah taleré Yéhuda.

¹⁹Tembungé Yosua marang Akan: “Anakku, ajènana GUSTI, Gusti Allahé Israèl lan ngakua ing ngarepé; ngomonga marang aku apa sing kok lakoni, aja sélak ing ngarepku!”

²⁰Akan terus nyauri marang Yosua tembungé: “Tenan, kula nggawé dosa marang GUSTI, Gusti Allahé Israèl, awit mengkéné sing kula lakoni:

²¹ing tengah-tengahé barang sing direbut kuwi, kula ndelok ana jubahé siji sing apik, gawéan Sinéar lan slaka 200 sèkel, uga emas sak lonjor boboté sèket sèkel; awit sangka kepéngin terus kula tyolong; lan barangé pada kula delikké ing lemah ing njeruhné tarup kula, slakané ing ngisor déwé.”

²²Yosua terus kongkonan wong menyang ing tarupé kuwi lan nyata barang-barangé didelikké ing tarupé Akan, slakané ing ngisor déwé.

²³Kabèh kuwi terus dijukuki sangka tarupé, digawa menyang ing ngarepé Yosua lan menyang ing ngarep sakkèhé wong Israèl, terus disuntak ing ngarepé GUSTI.

²⁴Yosua lan wong Israèl kabèh terus pada nyekel Akan anaké Sérah lan slakané, jubahé sing apik lan emas sak lonjor mau, uga anaké lanang lan wadon, sapiné, kimaré lan wedusé, uga tarupé lan sak duwèké kabèh, terus digawa menyang ing panggonan Akor.

²⁵Tembungé Yosua: “Kaya enggonmu nekakké tyilaka marang kita, mengkono uga GUSTI ing dina iki uga nekakké tyilaka marang kowé.” Akan terus dibandemi watu karo wong Israèl kabèh, terus diobong ing geni lan dikrutuki watu.

²⁶Sakwisé kuwi ing nduwuré didekké tumpukan watu gedé-gedé sing ijik nganti sepréné. Nesuné GUSTI terus sirep. Mulané panggonan kono diarani panggonan Akor nganti tekan ing dina iki.