Read Caribbean Javanese 2 Tésalonika 1 Bible Online

2 Tésalonika 1 - Caribbean Javanese bible

2 Tésalonika 1

¹Sangka Paulus, Silvanus lan Timotius, marang pasamuané ing Tésalonika, ing Gusti Allah, Bapak kita lan ing Gusti Yésus Kristus.

²Kawelasan lan katentreman sangka Gusti Allah, Bapak kita, lan sangka Gusti Yésus Kristus anaa ing kowé kabèh.

³Para sedulur, kita pada kuwajipan tansah pasrah maturkesuwun marang Gusti Allah awit kowé kabèh. Lan pantyèn pantesé mengkono, awit pertyayamu tambah mundak-mundak lan enggonmu pada trésna-tinrésnan mundak banget,

⁴terus ing pasamuan-pasamuané Gusti Allah kita déwé kebombong atiné kanggo kowé awit enggonmu pada mantep lan pertyaya ing sak njeruhné sak kabèhé panganiaya lan penindes sing pada kok alami.

⁵Kuwi dadi bukti kanggo pengadilané Gusti Allah sing adil, sing ndunungké yèn kowé kabèh kuwi pantes dadi wargané Kratoné Gusti Allah, kowé sing saiki pada ngalami sangsara awit kraton kuwi.

⁶Jalaran pantyèn adil kanggo Gusti Allah mbaleské penindes marang wong-wong sing pada nindes kowé kabèh,

⁷lan kanggo legané atimu sing pada ditindes, lan uga kanggo kita, yèn Gusti Yésus bakal ngétok sangka swarga diubengi para mulékaté sing gedé kwasané, ing sak njeruhné geni sing murup mulat-mulat,

⁸lan nibakké balesan marang wong-wong sing pada ora gelem kenal marang Gusti Allah lan ora mbangun turut marang Injilé Yésus, Gusti kita.

⁹Wong-wong kuwi bakal pada nampani paukuman sing nggawé rusak sak lawas-lawasé, didohké sangka ngarepé Gusti lan sangka kamulyané pangwasané,

¹⁰yèn Panjenengané teka ing dina kuwi, supaya diluhurké ing antarané para sutyi duwèké, lan supaya dadi nggumuné wong kabèh sing pertyaya, awit paseksi sing wis pada kita omongké marang kowé kabèh kuwi wis pada kok pertyaya.

¹¹Awit sangka kuwi, kita tansah pada ndedonga uga kanggo kowé kabèh, supaya Gusti Allah kita nganggep kowé pada wis pantes kanggo panggilan-Né lan karo kekuwatan-Né nyampurnakké sak kabèhé kepénginanmu nandangi betyik lan nyampurnakké sak kabèhé penggawéané pertyayamu,

¹²terus asmané Yésus, Gusti kita, diluhurké ing kowé kabèh lan kowé kabèh ing Panjenengané, miturut kawelasané Gusti Allah kita lan Gusti Yésus Kristus.