Read Caribbean Javanese 2 Tésalonika 2 Bible Online

2 Tésalonika 2 - Caribbean Javanese bible

2 Tésalonika 2

¹Bab tekané Gusti kita Yésus Kristus lan enggon kita bakal didadèkké siji karo Panjenengané, penjaluk kita marang kowé, para sedulur,

²supaya kowé aja pada gampang bingung lan sumelang, awit sangka pamedarané roh utawa awit sangka kabar-kabar utawa awit sangka layang sing ditulis sangka kita, kaya-kaya dinané Gusti wis kelakon.

³Kowé aja nganti pada disasarké nganggo tyara kepriyé waé! Awit sak durungé dina kuwi kelakon mesti didisiki anané wong murtad lan dikétokké ndisik manungsa duraka, sing kudu dientèkké,

⁴ya kuwi tukang mbruntak sing ngunggul-unggulké awaké déwé ngungkuli sak kabèhé sing diarani utawa disembah kayadéné Gusti Allah, nganti wani lungguh ing Griya Sutyiné Gusti Allah lan ngaku Gusti Allah.

⁵Apa kowé ora pada éling yèn bab kuwi wis kerep tak omongké marang kowé, nalika aku ijik ing tengahmu?

⁶Nanging saiki kowé pada weruh apa sing ngendek tekané, terus bakal njedul ing wantyiné sing wis ditemtokké.

⁷Awit karo tyara meneng-meneng, duraka kuwi wiwit nandangi, nanging saiki ijik ana sing ngendek. Yèn sing ngendek kuwi wis disingkirké,

⁸ing wantyiné kuwi manungsa duraka arep metu, nanging Gusti Yésus terus bakal matèni karo napasé tutuké lan yèn teka menèh, bakal ngentèkké karo semloroté kwasa-Né.

⁹Tekané manungsa duraka kuwi awit sangka penggawéané sétan lan bakal dibarengi kwasa werna-werna lan tanda-tanda uga mujijat-mujijat palsu;

¹⁰karo réka-daya ala rupa-rupa kanggo wong-wong sing bakal nemu karusakan, jalaran pada ora nampani lan nrésnani kabeneran sing ndadèkké keslametané.

¹¹Ya kuwi sebabé Gusti Allah enggoné nekaké sing nasarké marang wong-wong kuwi, sing njalari pada pertyaya marang sing goroh,

¹²supaya wong kabèh sing pada ora pertyaya marang kabeneran, lan seneng marang sing ala, diukum.

¹³Nanging para sedulur, kita kudu pada tansah maturkesuwun marang Gusti Allah awit sangka kowé kabèh, sing ditrésnani karo Gusti, awit Gusti Allah kawit wiwitan wis milih kowé kabèh[1] supaya dislametké ing sak njeruhné Roh, sing nyutyèkké kowé lan ing sak njeruhné kabeneran sing pada kok pertyaya.

¹⁴Kanggo sing mengkono kuwi Panjenengané wis nyeluk kowé kabèh lantaran Injil, sing pada kita wartakké, terus kowé pada dililani nampani kamulyan-Né Yésus Kristus, Gusti kita.

¹⁵Mulané, kowé pada sing kentyeng lan pada ngantepana piwulang-piwulang sing wis pada kok tampani sangka kita, karo tyara lésan utawa tulisan.

¹⁶Lan Panjenengané, Gusti kita Yésus Kristus lan Gusti Allah, Bapak kita, ing sak njeruhné katrésnané wis nrésnani kita lan sing wis ndadèkké panglipuran sing langgeng lan pengarep-arep betyik marang kita,

¹⁷supaya gelem ngekèki panglipuran lan nguwatké atimu ing kabèh penggawé lan tembung sing betyik.