Read Caribbean Javanese 1 Timotius 1 Bible Online

1 Timotius 1 - Caribbean Javanese bible

1 Timotius 1

¹Sangka Paulus, rasulé Kristus Yésus miturut préntahé Gusti Allah, Juruslamet kita, lan Kristus Yésus pengarep-arep kita,

²marang Timotius, anakku sing sejati sak njeruhné pertyaya: Kawelasan, kabetyikan, lan katentreman sangka Gusti Allah, Bapak lan Kristus Yésus, Gusti kita!

³Nalika aku arep nerusaké mlakuku menyang bawah Makédonia, kowé wis tak wanti-wanti, supaya tetep ing Efésus lan ngomongi wong-wong liyané, supaya aja mulangké piwulang liyané,

⁴utawa dongéng lan kitab turunané sing ora ana entèkké, sing olèh-olèhé mung angen-angené, lan duduk tatanan keslametan sing dikèkké Gusti Allah sak njeruhné pertyaya.

⁵Sing dituju ing pituduh kuwi, ya kuwi katrésnan sing tukul sangka ati sing sutyi lan pikirané ati sing murni lan sangka pertyaya sing jujur.

⁶Nanging ana wong sing nyimpang sangka kuwi lan terus kesasar ing omongan sing tanpa guna.

⁷Wong-wong kuwi arep dadi juru piwulang angger-anggeré Torèt, nanging ora ngerti marang tembung-tembungé déwé lan perkara-perkara sing diwulangké karo sak temené.

⁸Kita pada weruh, yèn angger-anggeré Torèt kuwi betyik, yèn bener enggoné nggunakké,

⁹ya kuwi karo pangertèn, yèn angger-anggeré Torèt kuwi ora kanggo wong sampurna, nanging kanggo wong duraka lan brangasan, wong lamis lan wong dosa, kanggo wong kadonyan lan sing tanpa agama, kanggo sing matèni bapak lan ibuné, kanggo wong sing kulina matèni,

¹⁰kanggo wong sing nandangi bédang lan bédang pada lanangé, kanggo wong sing kulina nyolong, kanggo wong sing tukang ngapusi, kanggo wong sing seneng sumpah palsu, lan sak terusé samubarang kabèh sing ora apik karo piwulang sing bener,

¹¹sing dilandesi karo Injilé Gusti Allah sing luhur lan dipuji, kaya sing wis dipertyayakké marang aku.

¹²Aku maturkesuwun marang Panjenengané, sing nguwatké aku, ya kuwi Kristus Yésus, Gusti kita, awit Panjenengané nganggep aku setia, lan masrahké peladènan iki marang aku,

¹³aku sing mauné tukang ngèlèk-èlèk, nglarani lan kereng, nanging wis olèh kabetyikan-Né, awit kuwi kabèh tak lakoni sangka ora ngertiku sak njeruhné ora pertyaya.

¹⁴Malah kawelasané Gusti kita kuwi wis dikèkké nganti lubèr marang aku karo pertyaya lan katrésnan sak njeruhné Kristus Yésus.

¹⁵Tembung iki nyata lan pantes dipertyaya tenan: “Kristus teka ing ndonya perlu mitulungi slamet marang wong dosa,” lan antarané para wong dosa kuwi aku iki sing gedé déwé dosané.

¹⁶Nanging malah awit sangka kuwi aku olèh kabetyikan-Né, supaya ing aku sing gedé déwé dosané iki, Yésus Kristus mbuktèkké sak kabèhé kesabaran-Né. Karo mengkono, aku dadia tulada kanggo wong sing bakal pada pertyaya marang Panjenengané lan pada olèh urip langgeng.

¹⁷Panghurmatan lan kamulyan tekan sak lawas-lawasé dipasrahké marang Ratuné sak kabèhé jaman, Gusti Allah sing langgeng, sing ora kétok lan sing siji! Amin.

¹⁸Kuwajipan iki tak pasrahké marang kowé, anakku Timotius, tyotyok karo apa sing wis dinubuatké kanggo kowé, supaya awit nubuat kuwi kowé ngupaya marang penggawéan sing apik karo pertyaya lan pikiran ati sing murni.

¹⁹Ana wong sak untara sing wis ngemohi pikirané ati sing murni kuwi, awit sangka kuwi pertyayané kandas,

²⁰kayata: Himénéus lan Alèksander, sing wis tak pasrahké marang sétan, supaya pada kapok enggoné ngèlèk-èlèk.