Read Caribbean Javanese 1 Timotius 2 Bible Online

1 Timotius 2 - Caribbean Javanese bible

1 Timotius 2

¹Awit sangka kuwi, sing ndisik déwé aku ngomongi: Pada masrahna penjaluk, pandonga lan maturkesuwun kanggo wong kabèh,

²kanggo para ratu lan kanggo sak kabèhé pemimpin, supaya urip kita bisa tentrem lan ayem ing njeruhné sak kabèhé pangabekti lan kehormatan.

³Ya kuwi sing betyik lan sing dadi kesenengané Gusti Allah, Juruslamet kita,

⁴sing ngarsakaké, supaya wong kabèh pada ditulungi slamet lan pada olèh kaweruh bab sing bener.

⁵Awit Gusti Allah kuwi sipaté siji, semono uga lantarané antarané Gusti Allah lan manungsa ya mung siji, ya kuwi Kristus Yésus sing dadi manungsa,

⁶sing wis masrahké Panjenengané piyambak kanggo tebusan marang wong kabèh: Kuwi paseksi ing wantyiné sing wis ditemtokké.

⁷Ya kanggo paseksi kuwi aku wis ditetepaké dadi juru pawarta lan rasul, sing tak omongké iki bener, aku ora goroh lan dadi guruné wong-wong kapir, sak njeruhné pertyaya lan apa sing bener.

⁸Awit sangka kuwi, aku kepéngin supaya ing kabèh panggonan wong lanang pada ndedonga karo ngunggahké tangan sing sutyi, aja nganggo nesu utawa padudon.

⁹Mengkono uga wong wadon, pada nganggoa sing pantes, sopan lan prasaja, rambuté aja diklabang-klabang, aja nganggo mas-masan, mutiara utawa sandangan sing larang-larang,

¹⁰nanging nganggoa sandangan sing ujut penggawé betyik, kaya sak pantes wong wadon sing ngabekti.

¹¹Wong wadon kuwi kuduné anteng lan nampani piwulang karo mbangun turut.

¹²Wong wadon ora tak wenangké mulangi lan ora tak wenangké ngwasani wong lanang, pada antenga waé.

¹³Awit Adam sing digawé ndisik, terus Hawa.

¹⁴Apa menèh duduk Adam sing digoda, nanging wong wadon kuwi sing digoda lan tiba ing dosa.

¹⁵Nanging wong wadon bakal ditulungi slamet awit sangka enggoné nduwé anak, angger ngantepi ing pertyaya lan katrésnan lan kasutyian karo prasaja.