Read Caribbean Javanese 1 Timotius 3 Bible Online

1 Timotius 3 - Caribbean Javanese bible

1 Timotius 3

¹Iki tembung sing bener: “Wong sing kepéngin nggayuh lungguhan pamongé pasamuan, kuwi kepéngin nindakké penggawéan sing apik.”

²Mulané pamongé pasamuan kuwi kudu sing tanpa tyiri, sing bojoné siji, bisa ngwasani uripé, wityaksana, sopan, seneng ngekèki pondokan, pinter mulangi,

³ora kesemsem anggur, ora gampang nesu, sumanak, seneng ngrukunké, ora mata duwiten,

⁴dadi pemimpiné brayat sing betyik, sing dihurmati lan diajèni karo anak-anaké.

⁵Yèn wong ora bisa mimpin brayaté déwé, kepriyé enggoné bisa ngurus pasamuané Gusti Allah?

⁶Aja wong sing durung suwé enggoné mratobat, supaya aja dadi gemunggung lan kena paukuman kaya sing kelakon kanggo iblis.

⁷Menèh nduwèni jeneng sing betyik ing sak njabané pasamuan, supaya aja kena digugat wong lan tiba ing jireté iblis.

⁸Mengkono uga para diaken ya kudu wong sing kajèn, sing ora méntyla-méntylé, ora kesemsem anggur, ora srakah,

⁹nanging wong sing bisa nyimpen wewadiné pertyaya ing sak njeruhné pikiran atiné sing sutyi.

¹⁰Wong kuwi ya kudu dijajal ndisik, terus pada ditetepaké ing penggawéan ngladèni kuwi, sakwisé ketara yèn tanpa tyiri.

¹¹Mengkono uga bojoné kudu sing kajèn, sing ora seneng mitenah, bisa ngwasani uripé lan kena dipertyaya ing samubarang.

¹²Diaken kuwi kudu sing bojoné siji lan betyik enggoné ngurus anak-anaké lan brayaté.

¹³Awit wong-wong sing betyik enggoné ngladèni kuwi olèh lungguhan sing betyik, terus sak njeruhné pertyaya marang Kristus Yésus bisa ngekèki paseksi karo kendel.

¹⁴Kabèh kuwi tak tulis marang kowé, senajan pengarep-arepku bisa gelis niliki kowé.

¹⁵Dadi, yèn ana telatku kowé bisa weruh, kepriyé uripé wong sing dadi brayaté Gusti Allah, ya kuwi pasamuané Gusti Allah sing urip, tyagak panyangga lan dasaré kabeneran.

¹⁶Sak temené luhur wewadiné pangabekti kita kuwi: “Panjenengané sing wis ngétok nganggo ujut manungsa, wis dibeneraké awit karo Roh, sing ngétok marang para mulékat, diwartakké ing antarané para wong kapir, sing dipertyaya ing jagat, diangkat sak njeruhné kamulyan.”