Read Caribbean Javanese 1 Timotius 4 Bible Online

1 Timotius 4 - Caribbean Javanese bible

1 Timotius 4

¹Nanging ana tembungé Roh karo tyeta, yèn ing tembé bakal ana wong sing pada murtad terus mèlu roh-roh sing nasarké lan piwulangé demit

²awit sangka bujukané para tukang ngapusi, sing dityap nganggo pikiran atiné déwé.

³Wong-wong kuwi nganakké larangan kawinan, larangan mangan pangan sing digawé karo Gusti Allah, supaya dipangan karo maturkesuwun karo para wong sing pertyaya lan sing wis kenal marang kabeneran.

⁴Awit kabèh sing digawé karo Gusti Allah kuwi betyik, lan siji waé ora ana sing haram, angger ditampani karo maturkesuwun,

⁵awit kabèh kuwi wis disutyèkké karo tembungé Gusti Allah lan karo pandonga.

⁶Karo ngélingké bab kuwi marang sedulur-sedulur kita, kowé bakal dadi abdiné Kristus Yésus sing betyik, sing digulawentah ing bab dasar-dasaré pertyaya lan ing bab piwulang sing betyik sing wis kok anut nganti saiki.

⁷Nanging dohana dongèng-dongèngané wong wadon tuwèk. Latihen uripmu ing pangabekti.

⁸Nglatih badan kuwi ana watesé paédahé, nanging pangabekti kuwi maédahi kanggo samubarang, awit kuwi isi janji kanggo urip saiki lan ing bakalé.

⁹Tembung iki bener lan wajip ditampani karo temen-temen.

¹⁰Ya kuwi sebabé enggon kita pada rekasa lan mbudidaya karo ngetokké kekuwatan, jalaran kita pada nduwèni pengarep-arep marang Gusti Allah sing urip, sing dadi Juruslameté wong kabèh, sing ndisik déwé para wong sing pertyaya.

¹¹Kuwi kabèh kabarna lan wulangna.

¹²Aja nganti ana wong sing ngrèmèhké kowé, awit kowé ijik nom. Dadia tulada kanggo para wong sing pertyaya, ing bab tembung-tembungmu, tindak-tandukmu, katrésnanmu, kasetianmu lan ing kesutyianmu.

¹³Sak terusé, nganti sak tekané aku temena enggonmu matyakké pérangan-pérangané Kitab, lan enggonmu mbangun lan mulangi.

¹⁴Aja nglalèkké enggonmu nggunakké kawelasan, sing wis dikèkké marang kowé karo nubuat lan karo tumpangan tangané para pinituwa.

¹⁵Kabèh kuwi mau gatèkna, uripa sak njeruhné kuwi kabèh, supaya kemajuanmu ketara marang wong kabèh.

¹⁶Awasana awakmu déwé lan piwulangmu. Temena enggonmu nindakké kuwi kabèh, awit karo mengkono, kowé bakal nylametké awakmu déwé lan wong kabèh sing pada ngrungokké piwulangmu.