Read Caribbean Javanese 2 Timotius 1 Bible Online

2 Timotius 1 - Caribbean Javanese bible

2 Timotius 1

¹Sangka Paulus, rasulé Kristus Yésus awit sangka karepé Gusti Allah, supaya ngabaraké perjanjian bab urip ing sak njeruhné Kristus Yésus,

²marang Timotius, anakku sing ditrésnani: Kawelasan, kabetyikan lan katentreman sangka Gusti Allah, Bapak lan Kristus Yésus, Gusti kita, anaa ing kowé.

³Aku maturkesuwun marang Gusti Allah, sing tak ladèni karo pikirané ati sing resik, kaya sing dilakoni karo para leluhurku. Lan aku tansah ngélingi kowé sak njeruhné penjalukku awan wengi.

⁴Yèn aku kèlingan enggonmu nètèské eluh, aku terus kepéngin weruh kowé menèh, supaya atiku kebak karo kabungahan.

⁵Awit aku kèlingan marang pertyayamu sing jujur, ya kuwi pertyaya sing wiwitan ing embahmu wadon Lois lan ibumu Eunike lan aku yakin kuwi ya ing kowé.

⁶Awit sangka kuwi kowé tak élingké supaya tetep nggawé ngrembakané pawèhé Gusti Allah ing kowé karo enggonmu wis ditumpangi tanganku.

⁷Awit Gusti Allah ngekèki kita duduk roh sing njalari jirèh, nanging roh sing nukulké kekuwatan, katrésnan lan ketertipan.

⁸Mulané aja isin nglairké paseksi bab Gusti kita lan aja isin awit sangka aku, sing dadi wong pakunjara awit sangka Panjenengané, nanging mèlua ngalami sangsara kanggo Injilé karo kekuwatané Gusti Allah.

⁹Panjenengané sing nylametké kita lan nyeluk kita karo panggilan sing sutyi, ora karo penggawé kita, nanging karo karepé lan katrésnané Panjenengané, sing wis dikèkké marang kita ing Kristus Yésus sak durungé wiwitané jaman.

¹⁰Lan saiki diwujutké ing tekané Juruslamet kita Yésus Kristus, sing lantaran Injil wis ngentèkké pangwasané pati lan nekakké urip sing ora bisa rusak.

¹¹Ya kanggo Injil iki aku wis ditetepaké dadi juru pawarta, dadi rasul lan dadi guru.

¹²Ya kuwi sing njalari kasangsaranku iki kabèh, nanging aku ora isin, awit aku weruh sapa sing tak pertyaya lan aku yakin yèn Panjenengané kuwi kwasa njaga marang apa sing wis dipertyayakké Panjenengané marang aku nganti tekan dinané Gusti.

¹³Samubarang sing kowé wis krungu sangka aku, kuwi antepana, dadia tulada piwulang sing bener lan lakonana sak njeruhné pertyaya lan katrésnan ing Kristus Yésus.

¹⁴Banda sing apik, sing wis dipertyayakké Panjenengané, karo Roh Sutyi, sing manggon ing kita, kuwi jaganen.

¹⁵Kowé wis pada weruh, yèn wong-wong ing panggonané Asia Tyilik kuwi pada nyingkur aku; klebu Figelus lan Hérmogenes.

¹⁶Supaya Gusti gelem ngekèki kawelasan marang Onésiforus sak brayat, sing wis bola-bali nggawé senengé atiku. Wong kuwi ora isin niliki aku ing pakunjara.

¹⁷Nalika ing Rum, wis ngupaya nggolèki aku lan ya wis bisa nemoni aku.

¹⁸Supaya Gusti gelem ngekèkké kabetyikané marang wong mau mbésuk ing dinané Gusti. Sak pira enggoné ngladèni ing Efésus, kowé luwih ngerti tenimbang aku.